1 Tap̱a a’di ijiki’da ji mo. Dhalki mony’cesh ’kunya bwa mo.

Dhalka ris ’kwani kun ’kon e mony’cesh ki yanagap̱ ’kunya bwa mo.

2 Araḵ dhali araḵ kun ’ceṯẖina ku’dum ki mondhurumi’d mo tani a’di ’kamki a’di is mo.

Mo ma ḵar/e dhali mii ma ḵar/e uni ita moŋḵa’b ma ḵursi ma maliḵ piti mo.

3 O’d yayi’di bwambori a’di mo,

dhali shwa jin minu shwa ’kup̱ piti ki o’d mo tani ’kamki a’di is mo.

4 Awara sho’k piti a’di kushki mony’cesh mo mo.

Mony’cesh p̱arki a’di e mo dhali dee ki bir bir mo.

5 Dhan wosha turga/ uni wakin me’d mandha/ dham mo ibwambori Tap̱a mo,

ibwambori Tap̱a gi mony’ceshi ’baar mo.

6 Momis a’di bahki mo ma ḵar/em piti mo,

dhali aris ’kwani ’baar mo p̱arki monycam piti e mo be.

7 Aris uni ’baar mo kun luŋki tomp̱inycon mo tani uni dhunu ki mo ma ’the is mo,

uni kun dhu ’bam buni ki ca mo gom to jin mol ha me’d jin ta tomp̱inycon mo.

Arisa rum p̱inycon mini luŋ ki jiŋ ’kup̱a’dup̱uni bwambori a’di mo.

8 Sihyuun ciḵki gwo mo tani dhali a’di ’kunya bwa mo,

dhali i’bwa/ gi ’Kwani Yahuuda/ uni ’kunya bwa mo,

haali/ gom gwon dwall pini jin toru gwo ’twa/a ’cesh mo, ayy Arumgimis.

9 Haali/ /e, ayy Tap̱a, /e a’di icaaca ap̱o/ mony’ceshi ’baar mo,

/e a’di ikarkunu ki ca ap̱owa risa rum p̱inyconi ’baar mo.

10 Tap̱a a’di enki uni gwansan kun shi/ki tonthusi e mo.

A’di ’tashki mondiki/e gi unim piti kun dhunu ki she/ ki dhelel dhelel ’twa/ ’peni tonthus mo.

A’di ’cuḵki uni ’peni me’d gi uni kun ta thus ki thus mo.

11 Moŋkush kushki mo mo gom uni kun miin ka ḵar/e mo,

dhali moŋ’kuny bwa gom uni kun dhelel ma du mo.

12 ’Kunyi bwa e Tap̱a mo, ayy uma ḵar/e mo,

dhali c̱i a’di mo jin ’boruwa ’bor bwa i is gom a’di jin ḵogu mo.