1 Dhalka ris ’kwani ’baar ka ’deṯe/ ’deṯe/ dhu is ’ko’di me’d ma hakuuma jin ta gi ’bi’th mo. Haali/ mom’bitha kamu/ yisa di’da. Hili isi ciki/ ’peni Arumgimis mo be. Dhali uni gwansan kun ’kokin mo tani uni dhukin ma Arumgimis mo be. 2 Dhali wakan mo tani uni gun roc̱kin ki mom’bi’th mo tani roc̱kin ki a’di jin ṯorkin ma Arumgimis uni mo. Dhali uni gwansan kun roc̱kin mo tani uni mini ’dap̱ uni ka nyoḵ gi gwon dwall ki is buni mo. 3 Haali/ imanjiya ji ’koki ta ku gi minu ḵo/ mo gom miim ’borga/ mo, hili gom mii shigga/ ’te/ mo. /E mini ’taki diki ḵo/ a’di jin ta gi mom’bi’th ’taa? Dhali waḵki/ wakan mo tani miiyi a’di jin ’boro’d mo ma dhali /e mini bu’th momaŋ piti mo be. 4 Haali/ a’di ta c̱iŋkina/ ma Arumgimis gom mom’boro’d pini mo be. Hili waḵki/ /e tham to mii mo tani ḵo/ki is mo ma. Haali/ a’di diki ḵal gandala turgam piti ka kar ’kup̱ ’te/ mo. A’di ta c̱iŋkina/ ma Arumgimis mo haali/ a’di ta’da mandaḵ bwan dwall gwom piti ’kup̱ ka nyor piti mo goma mantham mii mo be. 5 Haali/ a’di wakan mo tani dhalki a’din ’de/ midi mii kar is piti ’ko’di me’d mo, yisa jasi gom mmothera nyor ma Arumgimis ’te/ yisa, hili si’da/ gom ’twa/ ma du mo be. 6 Haali/ gom ’kup̱ gwo jin nyaḵki’d kan mo tani um mini c̱iya thulp̱a/ mo haali/ uni gun ta gi mom’bi’th mo uni ta imanmii to goma Arumgimis mo, ḵuthi is mo ki sule/ e to yan ka jiŋ gana/ mo. 7 C̱ika ris uni to kun ta kun cila uni mo. C̱ika thulp̱a/ e uni gun cil ma thulp̱a/ mo, dhali c̱iki uni to gun woṯẖi/ to ’kup̱ mo dhali ḵoki uni gun minu ḵo/ mo dhali taḵi uni gun minu taḵ mo.

8 Dhalku/ ki di ka mure/ i’ba/ gom to gi wathiŋ kamu/ mo, hili isi ciki/ mmo/ena en ka rem ’kup̱ mo. Haali/ a’di jin ene’da mannyaḵ c̱a’b piti mo tani thimki gwoŋḵan jin c̱inu mo be. 9 Gwoŋḵan kun ’kwarkunu mo kun o gwo mo: /E mini dhalku/ c̱al ki mii mii mo. /E mini dhalku/ ki mii ’kosha ’kosh mo. /E mini dhalku/ ki mii ḵwal to mo. /E mini dhalki bwa ki mii ’thoṯẖ mo. Dhali gwoŋḵana kamu/ ma jin ’dap̱a’d ki gwon tul ’kup̱ yan mo tani o gwo mo ki: /E mini mii ena mannyaḵ c̱a’b pini me’d is piniŋ gana/ mo be. 10 Mo/en diki ta to jin ṯẖudhu mii mo goma mannyaḵ c̱a’b mo. Dhali wakan mo tani mo/en ki thim gwoŋḵan jin c̱inu mo be.

11 Goma ’ban yansan mo tani /e ki mish mo mo. Ka tente/ p̱u’dki’d mo hila/ jin mina /e mer e mo ’peni mo/ish e mo. Haali/ woṯẖ ’disha’dish mo e ana shwane/ ki ana gamkina gwo is nṯwa/a/ mo be. 12 Mon’thiny a’di ’baarki’d mo dhali montee a’di p̱u’dki’d hila/ mo. Wakan dhalki ana ṯaga mii gi mondhurumi’d ka pije/ mo dhali hitha goŋgoro/ gi moŋkush mo. 13 Dhalki ana miina ki is bana ki dher mo ma, me’d jin miinu e montee mo. Yisa mmomii ki ra’b e moŋ’kup̱a su mo dhali e mo jin ’kosh ma suwa ’kosh mo. Yisa e mo jin tanu dhora su dhali e mo jin kanuwa kanthi/ mo. Yisa e mo jin waluwa wal mo dhali e mo jin tanuwa ṯacum bwa mo. 14 Hili hithi Tap̱a Yesus Ḵrisṯẖos i is mo ma dhali dhalki gwo ki mii kulum ibwa nṯwa/a/ gom buŋgwar is mmoṯe a’di e mon’dap̱ e mo.