ṮAKWIIN.
4.
Dhala Aadam mishki’da Hawwa jin ta ash mo, dhali ayim bwaaki’d mo dhali dhodha Kayiin mo mmo/o gwo mo ki: Aha/ gamkina a’ciŋgwaṯẖ ki mowoṯẖ gi Tap̱a mo. 
Dhali doḵ/e ayim dho’thki’da kam piti jin yuḵu gway ka Habiil mo. Dhala Habiil ta’da manhil ḵa’bal mo dhala Kayiin ta’da manḵora ’cesh mo. 
Dhali ki eŋ kamu/ mo tani Kayiin a’di ki ’doyi maman to kun sinu eya ’cesh mo mmoc̱i ki Tap̱a mo, 
dhala Habiil a’di ki ’doyi ushi ḵa’bal kun tana bwanyara/ mo ’pena ma’diny ḵa’bal piti mo dhali ’peni unim buni kun ’thiḵa’thiḵ ki tuntum tuntum mo. Dhali Tap̱a ki c̱iya hirdhe/ gom to ma Habiil jin c̱ina a’di ki me’d mo, 
hili goma Kayiin dhali tom piti kun c̱ina a’di ki me’d mo tani a’di diki c̱iya hirdhe/ mo be. Wakan a’di shwakin ma Kayiina nyor kagahara mo dhali jis/em piti bushura/ bushur mo. 
Dhali Tap̱a ki owa Kayiin gwo mo ki: Atinta shwana /e anyor kan mo dhali atinta ’bushurkina jis/em pini ki ’bushur kan mo? 
Waḵki/ /e mini mii ki ’bore/ mo tani a/e minu diki mish bu’th mowa? Dhali waḵki/ /e diki mii ki ’bore/ mo tani miinthus a’di wup̱ki’d e ’twaŋkal gu’b mo. A’di ona bwa ki /e mo, hili /e mini mii ta tap̱a ap̱o/ a’di mo. 
Kayiin ki owa Habiil gwo jin ta’da kam piti mo ki: Dhalki ana iina ka pije/ e bwam bunto mo. Dhali ki uni ’kokin e bwam bunto mo tani aKayiin cuki mis ap̱owa kam piti jin ta’da Habiil mo dhali ’kosh a’di jwa mo. 
Dhali yan’ko’d Tap̱a ki owa Kayiin gwo mo ki: Mana Habiil jin ta’da kam pini mo? A’di ki o gwo mo ki: Mishgaa? Aha/ tana manhila kam pema? 
Dhali Tap̱a ki o gwo mo ki: Atinta miikina /e? ’Twa/ ma bas ma kam pini a’di gwoki’d ’twa/ i aha/ ’pena ’cesh mo. 
Dhali shwane/ /e jeekunu ’pena ’cesh mo, a’di jin ḵa’dki ’twa/ mo mmolosa bas ma kam pini ’peni me’d pini mo. 
Ki /e mini ḵora ’cesh mo tani a’di midi doḵ/e dho’th to kagahara gom /e ’peni mom’bi’th is piti mo yisa. /E mini ta jwa ki jwa mo dhali ya yany c̱a/ e mony’ceshi ’baar mo. 
Kayiin ki o Tap̱a gwo mo ki: Miim pem jin di aha/ ’ba/ a’di caaca gom aha/ mmoḵal mo. 
Hili mo mo ma, /e urki aha/ ka pije/ ka cim yansan mo ’pena ’cesh mo. Dhali ’peni jis/em pini mo tani aha/ minu bag mo, dhali aha/ mina ta jwa ki jwa mo dhali ya yany c̱a/ e mony’cesh mo dhali ma a’diyin jin midi gam aha/ mo tani midi ’kosh aha/ jwa mo. 
Dhali yan’ko’d Tap̱a ki o a’di gwo mo ki: Midi wakan yisa. Waḵki/ jan ṯal ’deŋ kamu/ midi ’kosha Kayiin jwa mo tani mori’c midi di ap̱o/ a’di me’di pesu/ mo. Dhali Tap̱a ki c̱iya Kayiin jamas mo, isi ciki/ ki a’din ’de/ yin jin midi ya ap̱o/ a’di midi diki ’kosh a’di jwa mo. 
Dhali yan’ko’da Kayiin yaki’d ka pije/ ’peni buŋ’kus gi Tap̱a mo dhali c̱a’b e mony’cesh gi Pa Nud mo, e mom’pesho’k ma Idin mo. 
Dhala Kayiin mishki’da ’bom piti mo dhali ayim bwaaki’d mo dhali dhodha Hanuuk mo. Dhali a’di nyaŋki dhan ’peŋkuman bampa/ mo dhali yuḵ ’peŋkuman bampa/ gway mmobaṯẖ gway gi ya/m piti ka Hanuuk i’ko’d mo. 
Dhali Hanuuk dho’th ya/ jin yuḵu ka Irad mo. Dhala Irad ta’da baba ma Mahuya/iil mo dhala Mahuya/iil ta’da baba ma Matusha/iil mo dhala Matusha/iil ta’da baba ma Laamak mo. 
Dhala Laamak ki mash up̱i su/ mmota i/ash mo. Dhali gway jan ’de/ mo tani yuḵu ka Aadah dhali gway ka kamu/ yuḵu ka Sillah mo. 
Aadah a’di dho’thki’da Yabal mo. A’di ta’da baba gi uni gwansan kun ’kon e gu’b burrinye/ dhali ta gi to/e mo. 
Dhali gway ma kam piti yuḵu gway ka Yubal. A’di ta’da baba gi uni gwansan kun p̱ikina dheŋdhenye/ kun ’kon ma shu/i pesu/ mo dhala baraŋku/ mo. 
Dhala Sillah dho’thki’da Tubalkayiin mo. A’di ta’da mandor to kun kaaka mo dhali gurany mo dhali toŋḵuthu’d mo. Dhali ’bwaham ma Tubalkayiin yuḵu gway ka Naama mo. 
Dhala Laamak ki o up̱ gwo mo ki: Aadah dhala Sillah, ciḵi gwo ’peni ’twam pem mo. Um kun ta up̱ ma Laamak mo tani ciḵi gwo jin miga/ o mo: Aha/ ’koshkina wathi/ jin ’koshki aha/ mmotaḵ jama/ mo, wathi/ jin ta dhuru’c jin ’koshki aha/ mo. 
Waḵka Kayiin ri’ckunu me’di pesu/ mo tani ka jiŋ gana/ si’da/ Laamak minu ri’c me’di iss ’kwanimpa ikwara i’ce’dka ’kume’d i’ce’dka pesu/ mo. 
Dhala Aadam mishki’da ’bom piti doḵ/e mo, dhali ayim dho’thki’da ’ci jin ta ya/ mo dhali yuḵ a’di gway ka Shiiṯ mo, haala yim o gwo mo ki: Arumgimis karki aha/ ’pen ka pije/ mmodhodha ’ciŋ kamu/ mmodhalka Habiil e i is mo, haala Kayiin ’koshki a’di jwa mo. 
Dhala Shiiṯ si’da/ ta’dki ya/ jin dho’thkina a’di mo dhali a’di ki yuḵ a’di gway ka Anuush mo. Dhali ka tee c̱aan mo tani ’kwani ṯelki mii ’pen mo mmoko ’twa/ ap̱o/ Tap̱a mo.