ṮAKWIIN.
36.
Uni gwansan ita emen ma Iisu mo (a’di jin ta Aduum mo). 
Iisu bu’thki’da ris up̱ ’peni ’Kwaniŋ Kanaan mo: Ada jin ta ’bwa/ ma Iiluun jin ta Wathi/ Hiṯẖṯẖa mo dhala Uhulibaamah jin ta ’bwa/ ma Ana jin ta ya/ ma Sib/uun mo jin ta Wathi/ Hiwwi mo. 
Dhala Basmah jin ta ’bwa/ ma Isma/iil dhali ’bwaham ka Nabayuut mo. 
Dhala Ada dho’thki’da Iisu a/Elip̱aas mo dhala Basmah dho’thki’da Ra/u/iil mo. 
Dhala Uhulibaamah dho’thki’da Ya/uush dhala Yalaam dhala Guurah mo. Uni gwansan ita iya/ ma Iisu mo kun dho’thkunu a’di mo me’d jin dikina a’di e Paŋ Kanaan mo be. 
Dhali yan’ko’da Iisu bu’thki’da ris up̱ piti mo dhali aris iya/m piti mo dhali aris i’bwa/m piti mo dhali arisa waḵ gi gu’b piti mo dhali to/em piti mo dhali aris toŋkal piti ’baar mo dhali aris mal piti ’baar mo kun gamkina a’di adu is mo ’peni bampa/ gi Paŋ Kanaan mo dhali a’di yaki’d mo e bampaŋ kamu/ mo ’pena kam piti ka Yakuub mo be. 
Haali/ tom buni kun gamkina uni mo tani uni caaca kagahara mo gom uni mmo’ko imonṯal ’de/ mo haali/ mony’cesh jin tana uni ac̱a/ ap̱o/ mo tani midi mol uni thip̱ mo gom to/em buni mo. 
Wakana Iisu a’di c̱a’bki’d mo e bampa/ gi paŋ ’kuwosh ma Si/iir mo. Iisu a’di ita wathi/ Aduum mo. 
Uni gwansan ita emen ma Iisu mo jin ta’da baba gi ’Kwani gi Pan Aduum mo e bampa/ paŋ ’kuwosh ma Si/iir mo be. 
Gway gi iya/ ma Iisu uni annihe/ mo: Elip̱aas jin ta ya/ ma Ada mo jin ta asha Iisu mo dhala Ra/u/iil jin ta ya/ ma Basmah jin ta asha Iisu mo. 
Dhali iya/ ma Elip̱aas uni annihe/ mo: Temaan dhala Awmaar dhala Sap̱wa dhala Ja/ṯẖaam dhala Ganaas mo be. 
(Timnaa/ a’di ita’da ’bom lac̱a/ goma Elip̱aas mo a’di jin ta ya/ ma Iisu mo. Ayim a’di idho’thki’da Amaliik ka Elip̱aas mo.) Uni gwansan ita iya/ ma Ada jin ta asha Iisu mo be. 
Uni gwansan ita iya/ ma Ra/u/iil mo: a’di jin yuḵu gway ka Nahaṯẖ dhala Saarah dhala Shammah dhala Missa mo. Uni gwansan ita iya/ ma Basmah mo jin ta asha Iisu mo. 
Uni gwansan ita iya/ ma Uhulibaamah mo a’di jin ta ’bwa/ ma Ana mo jin ta ya/ ma Sib/uun mo jin ta asha Iisu mo. Ayim dho’thki a’di aYa/uush mo dhala Yalaam dhala Guurah mo be. 
Uni gwansan ita iya/ ma Iisu kun tana ris tap̱a mo. Iya/ ma Elip̱aas a’di jin ta’da bwanyara/ ma Iisu mo: Temaan dhala Awmaar dhala Sap̱wa dhala Ganaas uni ita tap̱a mo. 
Guurah dhala Ja/ṯẖaam dhala Amaliik uni gwansan si’da/ ita tap̱a ’pena Elip̱aas e bampa/ gi Pan Aduum mo uni kun ta iya/ ma Ada mo. 
Uni gwansan si’da/ ita iya/ ma Ra/u/iil jin ta ya/ ma Iisu mo: Nahaṯẖ dhala Saarah dhala Shammah dhala Missa mo uni gwansan ita tap̱a ’pena Ra/u/iil mo e bampa/ gi Pan Aduum mo. Uni gwansan ita iya/ ma Basmah mo jin ta asha Iisu mo. 
Uni gwansan ita iya/ ma Uhulibaamah jin ta asha Iisu mo uni kun ta itap̱a mo: Ya/uush dhala Yalaam dhala Guurah mo. Uni gwansan ita tap̱a ’pena Uhulibaamah jin ta ’bwa/ ma Ana a’di jin ta asha Iisu mo be. 
Uni gwansan ita iya/ ma Iisu mo (jin ta Aduum mo) dhali itap̱am buni anann mo be. 
Uni gwansan si’da/ ita iya/ ma Si/iir jin ta Wathi/ gi Pan Huri mo a’di jin cila bampa/ yan mo: Luthan dhala Shubal dhala Sib/uun dhala Ana mo. 
Dishun dhala Iisar dhala Dishan mo uni gwansan ita itap̱aŋ ’Kwani gi Pan Huri mo kun ta iya/ ma Si/iir e bampa/ Pan Aduum mo. 
Iya/ ma Luthan mo tani ita iHuri dhala Hemam mo, dhali ’bwah ma Luthan mo tani a’di ita’da Timnaa/ mo. 
Uni gwansan ita iya/ ma Shubal mo: Alwaan dhala Manaahah dhala Eebaal dhala Shap̱wa dhala Unam mo. 
Uni gwansan ita iya/ ma Sib/uun mo: Ayyah dhala Ana a’di jin ta’da Ana jin gamki yi’de/ jin kasha e ki kash jin ’batha’ba’th e mombwaasho mo me’d jin urkina a’di aris thuluny ma Sib/uun jin ta’da babam piti mmoc̱iya shon dhii/i’d mo. 
Uni gwansan ita uc̱i ma Ana mo: Dishun dhala Uhulibaamah a’di ta ’bwa/ ma Ana mo. 
Uni gwansan ita iya/ ma Dishan mo: Hamdaan dhala Ashbaan dhala Yiṯẖraan mo dhala Karaan mo. 
Uni gwansan ita iya/ ma Iisar mo: Bilhaan dhala Sawaan dhala Agaan mo. 
Uni gwansan ita iya/ ma Dishun mo: Uus dhala Araan mo. 
Uni gwansan ita itap̱aŋ ’kwani bampa/ Huri mo, uni kun ta itap̱a mo: aLuthan dhala Shubal dhala Sib/uun dhala Ana mo. 
Dishun dhala Iisar dhala Dishan uni gwansan ita itap̱a gi ’Kwani Huri mo isi me’da bas buni kun tana uni mo e Pan Si/iir mo. 
Uni gwansan ita imaliḵ mmoji/a ji e bampa/ Pan Aduum mo nṯwa/a/ ka maliḵ ’deŋ kamu/ diki ji/a ji ap̱o/ ’Kwani ma Israyiil mo be. 
Baala/ a’di jin ta ya/ ma Ba/uur mo a’di ijiki’da ji ap̱o/ Pa Aduum mo dhali ’peŋkuman bampam piti yuḵkunu gway ka Dinhaabah mo. 
Baala/ a’di iwuki’d mo dhala Yubab jin ta ya/ ma Saarah ’pena Busrah mo tani a’di ijiki’da ji i embul piti mo. 
Yubab a’di iwuki’d mo dhala Husham ’peni bampa/ ’Kwani gi Pan Temaan a’di ijiki’da ji mo i embul piti mo. 
Husham a’di wuki’d mo dhala Hadaad jin ta ya/ ma Badaad a’di jin p̱iki ’Kwani Midyaan e mo e bampa/ ’Kwani Pam Muwab mo tani a’di ki ji/a ji i embul piti mo dhali gway ’peŋkuman bampam piti mo tani a’di yuḵu gway ka Awiit mo. 
Hadaad a’di iwuki’d mo dhala Samlah ’pena Masriigah a’di ijiki’da ji i embul piti mo. 
Samlah a’di iwuki’d mo dhala Sha/uul ’pena Rahubut ’peni ’kwani Yi’deŋ Ḵumma/ ma Elp̱uraat mo tani a’di ijiki’da ji i embul piti mo. 
Sha/uul a’di iwuki’d mo dhala Baalhanaan a’di jin ta ya/ ma Akbuur a’di ijiki’da ji i embul piti mo. 
Baalhanaan a’di jin ta ya/ ma Akbuur a’di iwuki’d mo dhala Hadaar a’di ijiki’da ji i embul piti mo dhali gway gi ’peŋkuman bampam piti mo tani a’di iyuḵkunu gway ka P̱a/u mo. Ash yuḵkunu gway ka Mahithab/iil mo a’di jin ta ’bwa/ ma Mathrid mo a’di jin ta ’bwa/ ma Maadahab mo. 
Uni gwansan ita gway itap̱a uc̱i ma Iisu mo isi me’d jin tana uni awaḵ buni mo dhali moŋ’kom buni jin ’kona uni mmoyer mo gway ki she/ ki she/ mo. Itap̱a ita iTimnaa/ mo dhala Alwaah mo dhala Yatiit mo. 
Uhulibaamah dhala Iilah dhala P̱inun mo. 
Ganaas dhala Temaan dhala Mibsar. 
Majdi/iil dhala Iraam uni gwansan ita itap̱a ’Kwani Aduum (a’di Iisu jin ta’da baba gi ’Kwani Aduum mo) mo isi me’d moŋ’kom buni mo e mony’cesh jin takina uni mo be.