GWAY GI IDAWUU’D.
36.
Gwon dhaŋ oki a’di jin ta thus ki thus gwo mo ki ’kula’kul eya dum piti mo. Moŋḵo/ isa kamu/ yisa di’da goma Arumgimis e bwambor jis/em piti mo. 
Haali/ a’di o gwo maŋ ka maḵ gom is piti mo e em pitiŋ gana/ mo ki miinthus piti minu ’koki gam mo dhali shi/i e mo. 
Gwo ’peni ’twam piti mo tani uni tana pibi mo dhali mo jin hekuwa he’k e mo. A’di daḵki’d mo ’peni mo jin miina a’di ki yuḵ yuḵ mo dhali mii ki ’bore/ mo. 
A’di c̱i is piti ki gwo ma pibi ma wu’th mo ki a’di di’d mmo/isha aŋkar piti mo. A’di ki kar is piti e bway jin diki ’bor mo. A’di diki ush tonthus mo. 
Mo/en pini jin ṯeli sho’k mo tani, ayy Tap̱a, a’di jithirki’d e momis mo, dhali mii gi isiŋ ganam pini eya raḵ mo. 
Mii ma ḵar/em pini a’di wana e ki wosh kun turatur kun ta ku ma Arumgimis mo, gwon dwall pini kun toru gwo ’twa/a ’cesh mo uni wana e ki dhan ’kul yi’de/ mo. ’Kwani dhali tombwaasho takina /e is ki me’d mo, ayy Tap̱a. 
Mo/en pini jin ṯeli sho’k mo tani wa’di yinthowa, ayy Arumgimis. Uc̱i gi ’kwaniny’cesh uni bu’thki mo jin huru jwa eya ḵashira/ ma bim pini mo. 
Uni yuḵkina yuḵ e gu’b pini jin isha to ka enthus mo, dhali /e c̱iki uni to mmop̱i mo ’peni yi’de/ jin ’kunykina /e bwa mo. 
Haali/ e /e mo tani /e a’di ta mondiki/e jin kashki’d mo. E moŋkush pini mo tani am p̱arkina moŋkush e mo. 
Ayy ṯikiri mo/en pini jin ṯeli sho’k ki sule/ gom uni gwansan kun mishki /e mo, dhali bway gi mowoṯẖ pini gom uni kun dhelel ma du ki dhelel mo. 
Dhalku/ ki dhal sho’k gi a’di jin kar ’ba/ ki ca mmop̱u’da p̱o/ aha/ mo, walla me’d gi a’di jin ta thus ki thus mmobor aha/ mmosi’da/ si’d mo. 
’Kwani kun ta imanmii tonthus ishkin ki rap̱ rap̱ mo, uni kun torkunu ’ko’da ’cesh mo, mmomol cu mo.