GWAY GI IDAWUU’D.
43.
Yeyi aha/ mo, ayy Arumgimis dhali ’ce’di gwo she/ gom to jin raḵi aha/ mo ap̱o/ ’kwani kun ’koki mii miiŋḵar/e mo, dhali ’peni ’kwani kun ta imanhe’k e mo, dhali ’peni ’kwani kun ’konuki dhu ki mo ma ḵar/e mo tani ’cuḵi aha/ mo. 
Haali/ /e tana Arumgimis a’di jin bu’thka/ mom pem jin hurga/ jwa mo be. Katinta biṯa /e aha/ asho kan mo? Dhali tonta imiga/ c̱a’b jasi gwolu/ kan mo gom uni kun siri’c aha/ ki sho’k mo kun ta ’kup̱ pem mo? 
Ayy, hashi moŋkush pini mo dhali gwoŋ ganam pini mo. Dhalki uni shu aha/ bway mo. Dhalki uni sus aha/ mo e ’kuwosh pini jin ḵogu mo dhali mom pini jin c̱a’ba /e mo. 
Dhali yan’ko’d aha/ mina ya mo e mo ma gwaṯa/ jin ’ciṯẖu/ to ’kus goma Arumgimis mo, eya Arumgimis jin ’kunyka/ bwa ki ’kuny icine/ kagahara mo. Dhali aha/ mina maŋ /e ka dheŋdhenye/ jin ’kon ma shu/i pesu/ mo, ayy Arumgimis jin ta Arumgimis pem mo. 
Katinta ibiṯu/ /e eya ’cesh mo, ayy aḵashiram pem mo, dhali atinta i/usha /e me’d kan e aha/ mo? Tayi ka ’teŋ kap̱e/ eya Arumgimis mo. Haali/ aha/ mina doḵ/e maŋ a’di mo, a’di jin ta’da manwoṯẖ pem dhali Arumgimis pem mo.