GWAY GI IDAWUU’D.
51.
Miiyi mii ap̱o/ aha/ mo ma, ayy Arumgimis, isi ki gwo gi mo/en pini jin ṯelu sho’k mo, isi ki gwo gi mii ma ’them pini jin ishki’d ka enthus mo tani ’koshi aris gwon dhaŋ pem mo ma. 
Lami aha/ ’pena taŋkara/ ’peni miinthus pem mo, dhali dheleli aha/ mo ’peni miinthus pem mo. 
Haali/ aha/ misha gwon dhaŋ pem mo, dhali miinthus pem di’d ka yempa/ e bwambori aha/ mo. 
Ap̱o/ /e, /e ’de/ mo tani a’di imiikika/ miinthus mo, dhali mii a’din thus yin jin shi/a shi/ e bwambori jis/em pini mo, wakan /e karu ki mo ma ḵar/e e gwom pini jin tora /e ’twa/a ’cesh mo, dhali dar gi mii ’ba/ e gwon dwall pini mo. 
Hili mo mo ma, aha/ ḵalunu ka pije/ e miinthus mo, dhali e miinthus mo tani ata’dam pem bwaaki aha/ mo be. 
Hili mo mo ma /e ona bwa ki gwoŋ gana/ e isi bwaman ma dum ’per mo. Dhali gom gwo gi wakan mo tani ṯori aha/ gwo gom moyuḵ mo eya dum pem ki kup̱ mo. 
Dhagami aha/ mo ki cwa jin wana e ka ’tasha jalbip̱ mo, dhali aha/ mina dheleladhelel mo. Lami aha/ mo dhali aha/ mina c̱a’bki bany bany mmobola wasa/ e mo. 
’Tu’di aha/ ki bwam ’borga/ mo dhali ki bwaŋ ’kunyga/ mo. Dhalka sima/ jin ’ce’da /e mo ’kunya bwa mo si’da/. 
Bagi jis/em pini ’peni miinthus pem mo dhali ’koshi aris miinthus pemi ’baar mo. 
Uḵi e aha/ adun dhelelga/ mo, ayy Arumgimis, dhali kar jin this dhali jin ’boro’d e bwaman shi/in pem mo. 
Dhalku/ ki biṯ aha/ asho ’peni buŋ’kus pini mo, dhali dhalku/ ki bu’th Shi/in dhelel dhelel pini ’peni aha/ mo. 
Wari bwaŋ ’kunyga/ is e aha/ mo e bway gi mowoṯẖ pini mo, dhali buthi aha/ me’d ki bwa gi shi/in mo. 
Dhali yan’ko’d aha/ mina ṯor imandhaŋ gwo bway pini mo, dhali imanmii miinthus mo mini ṯu’k mo e /e mo be. 
’Cuḵi aha/ mo ’pena bas gi aha/ jin dina mii i’ba/ mo, ayy Arumgimis, /e jin tana Arumgimis mo tani ita bway gi mowoṯẖ pem mo be, dhali ale’d pem midi yuḵ gway ki ’kal ’kal gom mony’cuḵ pini mo be. 
Ayy Tap̱a, ḵa’di /e ’twa/ pem mo ma, dhali ’twa/ pem midi ṯor momaŋ pini mo. 
Haali/ /e dina bwa ki ’kuny mo e mo jin ’ciṯẖu/ to ’kus mmomiiya bas mo. Waḵki/ aha/ mina ’taki c̱i to ki me’d mmoc̱i’th ki o’d mo tani /e mini ’taki diki ’bor bwa mo be. 
To jin ’ciṯẖu/ ’kus mmomiiya bas jin mish ma Arumgimis bu’th mo tani a’di ta shi/in jin ’ce’dkunu mo. Dhali mo ma du jin ’ce’du mo dhali adu jin waki’d mo tani, ayy Arumgimis, /e mini diki usha ush mo. 
Miiyi ki ’bore/ gom Sihyuun mo e bwaŋ ’kunygam pini mo. Nyaŋi doḵ/e agoŋ gi Pa Urushaliim mo. 
Dhali yan’ko’d /e mina bwa ’kuny mo e to jin c̱inu ki me’d mo mmo’ciṯẖ ’kus jin ’boro’d mo, dhali e to jin c̱inu ki me’d mo mmoc̱i’th ki o’d mo dhali kun c̱ithu/ ki o’d ka ’bimpil mo, dhali yan’ko’d gwasimbip̱ uni minu ’ciṯẖ ’kus eya gwaṯam pini mo.