GWAY GI IDAWUU’D.
61.
Ciḵi gwom pem mo ma, ayy Arumgimis, kari ’ce gom mon’thom pem mo, 
’peni ’pemen gi mony’cesh mo tani aha/ yuḵkina /e mo me’d jin ’thin ma dum pem buye/ mo be. Susi /e aha/ mo e wosh c̱aan jin turatur mmobol aha/ e mo, 
haali/ /e ta jim pem jin hurga/ jwa mo, /e ta a’di jin waki gu’ba turga/ jin ’bitha’bi’th ap̱o/ ’kwani kun ta ’kup̱ ki aha/ mo. 
Dhalki aha/ c̱a’ba e gu’b burrinyem pini ki sule/ sule/ mo. Ayy mmodi ki ’dantar e bwaŋ’kwariny ma darha’dam pini jin ta’da bi mo. Doshi ma dhali ’cunycuri yan mo. 
Haali/ /e, ayy Arumgimis, ciḵki gwom pem jin oka/ is mo, /e c̱iki aha/ mal gi uni gwansan kun ḵo/ki gway pini mo. 
Galali mondiki/e ma maliḵ mo. Dhali dhalki yil piti ’dim ’kup̱ ntaga risa nyaḵum yil gi ’kwaniny’cesh mo. 
Dhalki a’di karuwa ḵursi ma maliḵ ki sule/ sule/ ibwambor ma Arumgimis mo. Dhalku/ ki non mo/en jin ṯelu sho’k mo dhali mii ma isiŋ gana/ mmotim a’di ap̱o/ mo. 
Dhali aha/ mina yuḵ gway mo mmomaŋ gway pini mo, me’d jin c̱ikika/ gwom pem jin oka/ is ’ko’da tee ’ko’da tee mo.