GWAY GI IDAWUU’D.
63.
Ayy Arumgimis, /e tana Arumgimis pem mo, dhali aha/ simmkina /e e mo. Aḵashiram pem ’kosha ṯe/ /e mo. Buŋgwar is pem ’thina buye/ gom /e mo me’d mo jin ḵuthaḵu’th mo dhali mony’cesh jin ta toŋkor jin dina yi’de/ ki di mo be. 
Wakan aha/ hilkina ap̱o/ /e e mo jin ḵogu mo mmohil mom’bi’th pini mo dhali monyca mo. 
Haali/ mo/en pini jin ṯelu sho’k mo tani a’di ’borki’d mo mmobol mondiki/e e mo, ’twa/ pem midi maŋ /e mo be. 
Wakan aha/ mina ’bor /e mii mo isi me’d jin miga/ di ki e mo. Aha/ mina ’de’k me’d pem ’kup̱ ki mis mo dhali yuḵa yuḵ ap̱o/ gway pini mo. 
Aḵashiram pem a’di ’kunykina bwa mo me’d ki monoro’d mo dhali c̱a’bki momoṯ momoṯ mo dhali ’twa/ pem a’di maŋki /e ki moŋ’kuny bwa jin ta ’twa/ mo. 
Ki aha/ kulumkina gwo ibwa gom /e ap̱owa cim pem jin ishka/ mo dhali kulum gwo ibwa gom /e mon’thiny kun timka/ tim mo. 
Haali/ /e tana manwoṯẖ aha/ mo, dhali eya la ma bim pini mo tani aha/ yuḵkina gway gom moŋ’kuny bwa mo be. 
Aḵashiram pem koṯẖki /e me’d mo. Dhali me’da bim poros pini bu’thki aha/ mo. 
Hili uni gwansan kun simmki mondiki/em pem e mo mmo’ce’d a’di sho’k mo tani uni mini ii ka luŋgu’b e mony’cesh jin ’kula’kul mo. 
Uni mini c̱iku/ e mom’bi’th gi gandal jin kaaka mo. Uni min ma jala/ i’kwar ka gwap̱i/ mo. 
Hili amaliḵ mina bwa ’kuny eya Arumgimis mo. Aris uni gun thulkunu me’da p̱o/ ki a’di mo tani uni mini ca mo, haali/ ’twa/ gi uni kun tana ṯor ka ṯor mo tani minu ’dap̱ ’twa/ mo be.