GWAY GI IDAWUU’D.
116.
Aha/ mina en Tap̱a mo haali/ a’di ciḵki ko gi ’twam pem mo jin ’thoka/ ka di’b me’di is mo. 
Haali/ a’di ḵa’dki bwany’cem piti ki aha/ mo wakan aha/ mina yuḵ a’di isi ki me’d jin dika/ ki e mo. 
Agume/ gi mowu uni ’kamki aha/ is mo, anyoḵ ma Haawiya uni bu’thki aha/ mo. Aha/ ’kosha is ka nyor mo eya c̱is pem mo dhali ’pe’d she/ mo. 
Yan’ko’d aha/ ki yuḵ gway gi Tap̱a mo mmo/o gwo mo ki: Ayy Tap̱a, aha/ yuḵa /e mo, tayi mondiki/em pem is ki me’d mo. 
Tap̱a a’di ta’da ’the ka ’the mo dhali ta’da ḵar/e mo, Arumgimis bana jin miimii mo. 
Tap̱a a’di ’tashki uni ’twa/ mo uni kun wana she/ is is kan mo, ki aha/ guyunu ka luŋgu’b e moŋgwa’dga/ mo tani a’di taki aha/ is ki me’d mo. 
Doḵi ka nyaŋ’ko’d, ayy ḵashiram pem, e mosi/is pini mo, haali/ Tap̱a a’di ṯu/ulki’d nyaḵki /e ki mii jin isha to ka enthus gom /e mo. 
Haali/ /e ’cuḵkina ḵashiram pem ’peni mowu mo, dhali em pem ’peni jabu’th jin wolki’d mo, dhali sho’k pem ’peni mo jin gwoluwa gol mo. 
Aha/ yakina e bwambori Tap̱a mo e mony’cesh jin ’konuki/e mo. 
Aha/ karkina moŋgam gwo is pem mo, isi kani me’d jin okika/ gwo mo ki: Aha/ tashu ka dhan mo jin jwakaṯkunuwa jwakaṯ jin shiyi’d mo. 
Aha/ ona gwo e mom pem jin dumbulkika/ bway mo ki: ’Kwani ’baar mo tan ga ’teŋ kap̱e/ jin ta jim ma p̱e’th mo. 
Ata a’di jin miga/ c̱i ki Tap̱a mo goma ris tom piti ’baar kun ishkin ka enthus gom aha/ mo? 
Aha/ mina ’deka ḵubbaaya gi mowoṯẖ ma Arumgimis ki mis mo dhali yuḵ gway gi Tap̱a mo. 
Aha/ mina c̱i gwom pem jin oka/ is ki Tap̱a mo e buŋ’kus ma ris ’kwanim piti ’baar mo. 
Yinthoŋ gana/ e jis/e gi Tap̱a mo, a’di ita wu ki unim piti kun dhunu ki she/ ki dhelel dhelel mo. 
Ayy Tap̱a, aha/ tana c̱iŋkinam pini mo. Aha/ tana c̱iŋkinam pini mo, a’di jin ta ya/ gi nyaranyc̱iŋkinam pini mo be. /E ki ’cuḵ mondeḵ pem mo. 
Aha/ mina c̱i to jin ’ciṯẖu/ ’kus ki bwa jin ’boruwa ’bor i is mo dhali yuḵ gway gi Tap̱a mo. 
Aha/ mina c̱i gwom pem jin oka/ is ki Tap̱a mo e buŋ’kus ma ris ’kwanim piti ’baar mo, 
eya pije/ gi gu’b gi ’kup̱ ḵany gi Tap̱a mo, e bwaman um mo tani, ayy Urushaliim. Maŋi Tap̱a mo.