1 O amine beng guk sini' sidi napa' girii sini' ka Anutu wari indita' tanimita' waraga' sukanting. Adi indita' siamo' naknga wap adining mindine ning u nimita'. Ka adi wap ka u nimita' wara' beng sini' indi adining mindine ning kuma' ikem. Ka aming ka napa' kamaganangni ga'sa' sukiting adi Anutuning iik wara'ning ki kabi'sini' guk mo' kating wara' adi indi Anutuning mindine ikitam undu' mo' nipkedating. 2 Beng sini' amane karesi kami yara'ganang indi Anutuning mindine ning ikem, ka inga' indining iikni' wa indining sini' kadofinimo' wara'ning wa kafakafa ko mo' nakem. Ka indi napa' ka inga' Kasira Aming Jisas wari tubobu abo'ganang wa adigok dabik ningsa' igira adenam ga', ning tanga adining iikning ki u sareng sini' kigedasasu'nanam ga' wara'ningsa' wa giri naknga ikem. 3 Ka aming ka Kasira Aming Jisas ning iik wa napa' beng guk ning sura ikiting adi Jisas wa aming didimeng sini' kadagang kabi'guk mokngang, ning sura iting anasining kabaksi' undu' tipgidaba tanga didimengsa' ikiting.

4 Beng sini' kadagang wa kadapmang ka midi tapni u tarakayoting wara'ganangsa' kadofita', wara' aming ka kadagang titing wa Anutuning kadapmang tapni u udagating. 5 Ka kuyane sidi kuma'sa' naking Kasira Aming Jisas adi kadagang kabi'guk mokngang, ka adi aming indining kadagang u udaga waraga'sa' tanga kadofinga yagu'. 6 Wara' aming ka Kasira Aming Jisas ganang sini' irota' adi kaba ka kadagang titiga' tipmarak ning wara'guk mo' ita'. A aming ka kaba ka kadapmang kadagang titining wari adining kaba ganang irota' wa adi Kasira Aming Jisas ning ki a adining iik kabi'sini' guk mo' kata', mokngang sini'.

7 O naktangka aming sabane sidi aming fam wari kadapmang nua'ni ubu ma sanggekni' wara' na sareng ning sanotik, Kasira Aming ning iik wa didimeng sini' wara' aming ka kadapmang didimeng sini' tinting unggungsa' wa Anutu wari aming didimesi ning yabita'. 8 Beng sini' kadagang munumung sini' wa timinggi' aming kadagang Setan wari tugu' wari kadofigu', wara' aming ka kadagang u tanga abuting wa Setan ning arantagim. Ka Anutuning mindingni adi kamaganang i afugu' wara'ning ki kubaniksa' wa Setan ning kane kadagang u udangama tipmirisasu'na waraga'sa' tanga afugu'. 9 Ka aming ka Anutuning mindingni ning kuma' kadofinga ikita' adi kadagang titining kadapmang guk mo' yareta', mokngang. Adi Anutu wari aming inga'ni nua'bu tipkadofiinga adi kaba kareng ka Anutu ana ikita' wara'guk kuma' ita' wara' adi kadagang titiga' guk mo' sukita'. 10 Ka Anutuning mindine arantagim wa nua'ni sini', a Setan ning mindine arantagim undu' nua'ni sini' kadapmang naro' naro'sa' tanga ikiting. Wara' aming ka kadapmang didimeng mo' titing a aming ka kuyase fam ga' naknga kafakafa guk mo' tiamiting wa indi Anutuning mindine mo' ning u sarengsa' yapkedantam.

11 Beng sini' midi ka tangkunang sini' ka tim Anutuning midi munumung saninga naking wa ning, indi kuyane famga' kabakni' guk siamo' nakantam, ning saninga naking. 12 Ka midi ka wa beng guksa'. Wa ning, indi kadapmang kadagang ka tim Adam ning mindingni Ken wari tugu' ningwara' mo' tantam. Ken adi aming kadagang Setan adining arantagim sini' wara' adi adining kuyang kabasi' Abel u ugumogu'. Ka adi ananing kuyangni sini' u ugumogu' wara'ning kini wa ning nakedantam, Ken adining kadapmang wa kadagang, a kuyangni ning kadapmang wa kareng waraga'sa' tanga wa Ken adi kaba kadagang naknga u ugumogu' wang.

13 Beng sini' kuyane kadapmang ka aming wari kuyase ga' bibi' ninakning wa timinggi' ningsa' kuma' tanga ira abuting wara' aming kamaganangnisa' ka Anutuga' guk mo' sukiting wari sidita' bibi' naknga kadagang saramikinga wa sidi kadapmang kuni' ni ning kanga kabaksi' mamareng mo nakanting. 14 Ka aming ka kuyane fam ga' guk mo' nakita' adi kadagang guk wara' adi kungkumak titining ko ita'. A aming ka naktangka tanga ikem indi ningwara' mo', mokngang. Indi kuyane famga' siamo' naknga ikem wara' indi ning nakem, tim indi kungkumak titining bingi sa' tanga yagum ka kami yara'ganang wa indi ka' ningsa' iik wara'ning ning ubu kuma' ikem. 15 Aming ka kuyane famga' kabaksi' kadagang guk naknga ikiting wa adi kadagang ka aming wari aming nua'ni urasep ning ningda'ning tanga ikiting. Ka indi midi ka aming ka aming dipmiting wara'ning undu' kuma'sa' nakitam. Wa ning, aming ka kadagang ningwara' titing wa adi Anutu guk ka' fikifiki ningsa' iikning guk mokngang. 16 Beng sini' Kasira Aming Jisas adi indi yotangkanip waraga' sura iibisa' tinga ananing fugu ning ka' iyak u tipmiriging. Ka indi u kanga ning nakedantam, kadapmang ka u tugu' warisa' wa indi kuyane famga' siamo' ninak waraga' ningtintingnara'. Wara' indindu' waraga' sura kabakni' ka kuyane famga' siamo' naknga adi yotangkayap waraga' tanga mamareng ka Jisas adi bemgu' ningsa' bemtam undu' girisa'. 17 Ka aming nua'ni ka mambong kamaganangni kangasi tanga ira ka adi kuyangni nua'ni wari napa'ga' nafek tanga mamareng guk irota' u kanga kabubure tanga yotangkangam guk mo' tota' wa adi midi ka na Anutuga' siamo' nakitik ning tuguta' wa beng guk mokngang, mandaga' gikneta'. 18 O beng sini' naktangka aming sabane indi kadapmang ka kuyane ga' siamo' ninak ning wa mani' warisa' sige mo' tontam, mokngang sini', indi indining kabakni'ganang sini' naknga bibiri' yapma yotangkayap tanga beng guksa' tontam.

19-20 Ka indi kadapmang ka beng guksa' ka ningwara' u tantam wa indi o Anutu adi u bemnabo' wa ma mo' unda' bemnabo'ga' ning sukantam ganang wa kadapmang didimeng kuma' tantam wara' indi kabakni' tiptangkanga o Anutu adi napa'napa' mang sini' u yapkedata' wara'ning ki sini' wara' adi naning kabakna undu' kuma'sa' kara' ning tonga kabakni' kugurangsa' naknga ikantam. 21 Ka beng sini' kuyane karesi midi ka wa beng guksa', indi indining kadapmang wa didimengsa' giri kuma' tem ning u sura naknga Anutuning de ganang adenga napa'niga' anonga wa indi mutu guk mo' tanga tangkunangsa' adenga anintam. 22 Ka indi adining midi kadapmang sa' yaranga kadapmang didimeng ka adi titiga' nakita' u titam wara' indi napa'ni ninim ga' sura anitam wa adi naknim sa' tanga nimita'. 23 Ka Anutuning midi kadapmang wara'ning ki sini' wa ning, indi adining mindingni Kasira Aming Jisas waraga' naktangka sini' tanga Jisas ning midi ka indi kuyane famga' siamo' ninak waraga' ninita' u yaranga tanga ning tantam. 24 Ka indi Anutuning midi kadapmang unggungsa' yaranga tantam wa indi Anutuganang sini' ikinga adindu' indiganang sini' irota'. Beng sini' Anutu wari adining mini unggo wa indining kabakni'ganang kuma' kaminimgu' wara' indi o warisa' tanga wa adiganang beng sini' ikem ning sura nakedatam.