1 Ka Jisas wari ibang u tonga biinga ning tanga arantagimni u inagira Jerusalem yong u kabinga kabi'ning amanga ama kubak Kidron u fenga aranga Oliv feng gwaya bingking kareng u anga amoging. 2 Ka aming tipkadofi titining Judas adindu' Jisas wari fikifiki arantagimni guk gwaya ka wara'ganang bak anga fatiaging wara' adi fafong. 3 Ka Judas adi Jisas wari arantagimni guk mugoging u kuma' nakedanga ning tanga soldia a plisman arantagim ka pris girisi a Farisi wari yangkareging u inagira ning tanga Jisas u bemonga suguk kwak tanga marara kamang garanga gwaya kabasi' waraga' mandang yaura aging. 4 Ka Jisas adi mamareng wara'ning nasi' nasi' ka adiganang kadofingamonga tugu' udi kuma'sa' nakedagu'. Wara' adi adita' wenanga aging u kuma' yapkedanga anasa' ararenga abanga ning yanggu', nisi'ga' fawening. 5 Ka adibu ning aniging, mo' Jisas Nasaretni waraga' wenanga abem. Ka Jisas wari ning yanggu', u toing wa nagasa' yang. Ka Judas ka tipkadofi tugu' adindu' aming wara'siguk kubap unggung adenga Jisas ning midi u kuma' naku'. 6 Ka Jisas wari aming ka bimbem titiga' u aging adi Jisas wari aming ka u toing wa nagasa' ning yanggu' u naknga yuguk aranga paparap senga kumade kadak tubobu sungnanga anga kamaganang mangdek yangaging. 7 Ning tinga Jisas wari ning yanggu', nisi'ga' wening ning sanarik. Ka adibu toging, mo' Jisas Nasaretni ga' wenem. 8 Ka Jisas wari ning yanggu', wa kuma' sanirik wang naga'sa' yang. Sidi nagata' wening wara' aming arantagim ka i adeing ya iibi tinga gi' mani'. 9 (Ka Jisas adi midi ka arantagimni ga' u togu' wa tim beni Anutuga' ibang tonga ganang ka arantagim ka gu namgung ya ni ka kadaga guk mo' tara' ning urang togu' wara'ning wa gi'sa' ibiinga mugo ga' u yanggu' wang.) 10 Ka Saimon Pita adi bainat guk sosipma fentaragu' wara' adi aming wari Jisas bemonga tiging u yapma bainatni u wengbema pris girii ning kane aming wapni Malkas u gufonga tanga magi sa' gufadagagu'. 11 Ka Jisas wari u kanga Pita u ning anisefigu', ai gu ning guk mo' totang. Bainat u yorini ganang tubobu dase'. Napa' ka sibeng wari kuma' kabiinga kadofinamonga tara' wa na bimbem sa' totik.

12 Ning tanga soldia arantagim a adisining girisi' guk ka Juda ning plisman arantagim wara'guk wari Jisas u bemging. Bema ning tanga aya tangkunang wari kafong fama' u iptatangkaging. 13 Ning tanga tim ka pris girii timini Anas ka pris girii tim iyak inga'ni Kaiafas ning ipmangni waraga' nagira aging. 14 Pris girii Kaiafas ka wa tim Jisas ga' midi toging ganang wa adi aming kubaniksa' wari kumakinga aming beng wa gi' giri iikga' urang togu' warisa' ka pris girii gurak ka wara'ganang tanga mareiagu' wara'ning ipmangni ga' nagira aging.

15 Ka Saimon Pita guk ka Jisas ning arantagim nua'ni guk adi Jisas nagira aging u kubap yaranga agumu'. Ka arantagimni nua'ni adi pris girii Anas udi fafong wara' adi Jisas u yak wara'ning sinim iyung nagira amoging undu' unggung yaura amogu', a Pita adi fugang unggung fidegu'. 16 Ka arantagimni nua'ni ka Anas wari fafong karagu' wari Pita ga' sura taming nua'ni ka yak ning sinim wara'ning iming u katatorarugu' u aniinga aigangam tinga sinim iyung bane ga' wa inga' nagira amogumu'. 17 Ka taming wari Pita ning nonda u kanga ning anigu', ai gundu' aming ka adining arantagim unda'. Ka Pita adi isasura tanga ning togu', mokngang na adining arantagim mo'. Ning aninga sinim iyung u amogu'. 18 Amanga ning tanga aming girii ning kane aming a plisman fam wari sibim ning kama kadofigu' wara' adi sibim naknga kudip sanga mafaging wara'ganang anga adisigok kudip u kubap sanga fideging.

19 Ning tanga pris girii Anas wari Jisas u adining midiganang kaminga ning tanga midi ka ki ka nasi'ga' tanga adi arantagimni u inagiku' abanga midi ka arantagimni u fianggetarugu' wa nasi' midi faingetarugu' waraga' anigagu'. 20 Ka Jisas adi ning togu', na midi wa kapmo' guk mo' tugutik. Mokngang na aming dabik ning maasi' ganang sarengsa' tuguinga nakiting. Na fikifiki siring yak fam a siring yak girii tempel a kama ka Juda aming wari bak kukiting wara'ganangsa' yangara sarengsa' ituanga yaretik. 21 Ka waraga' wa naga mo' nanotang. Gu aming ka midi ka naga u faituatik fanakiting u yangkautang udi kuma'sa' gangting. 22 Jisas wari ning tuguinga plisman nua'ni ka du' unggung adegu' wari Jisas ning fangi fefinga ning kafang anigu', ai gu pris girii wa kadapmang didimeng mo' tanga anirang gabarik. 23 Ka Jisas wari ning anigu', midi kadagang udep tuguinga nutang wa sareng toya'. A mokngang udep wa sigesa' nutang. 24 Ning tanga pris girii wari midi fam nua'bu guk mo' aniganga ning tanga pris girii tim iyak inga'ni Kaiafas ga' ubu anigareinga kafong iip guk ningsa' nagira aging.

25 Ka Saimon Pita adi kudip sanga fideging ganang unggung ningsa' ko fidegu'. Ka aming ka kudip kubap sanga fideging wari Pita u kanga kigeda tanga ning aniging, ai adining arantagim nua'ni ka gu ibanda' ina. Ka Pita adi isasura tanga mokngang na adining arantagim mo' ning togu'. 26 Ning tanga adeging. Ka pris girii ning kane aming nua'ni ka Pita wari magi urang doptagagu' wara'ning amingni nua'ni wari Pita u nua'bu anigu', ade gwaya kabasi' ganang do adigok adenging udi, gaga'sa' gapmak udi. 27 Ka Pita wari isasura tanga mokngang ning nua'bu togu'. Ning tinga wara'ganangsa' wa kagare' wari ku katigu'.

28 Ning tanga aming wari Jisas u nagira tonga pris girii Kaiafas ning yakganang kamiging u nua'bu nagira anga Romni kiap girii Pailat wara'ning yak girii wara'ganang ubu tonga kamiging. Ka kamindap gaa' fabubureng sini' ka Juda aming wari Pasova ning tangsana wara'ning kama fagagu' wara'ganang nagira aging. Wara' adi aming arantagim nua'ni ka Juda mo' wara'ning yakganang amanga geng nua'bu tanga Pasova guk mo' ma nanam ning tonga sura Pailat ning yak iyung bane ganang guk mo' amoging. Mokngang adi fugang ningsa' anga adeging. 29 Ning tinga Pailat warisa' afanga fugang adenga aming u ning yangkagu', aming ya nasi' kadagang tugu' kanga midiganang kamonga nagira abing. 30 Ka adibu ning toging, adi aming kadagang titiing. Aming kareng ganang wa gu ganang ning guk mo' nagira abianam. 31 Ka Pailat wari ning yanggu', a wa naning kane mo'. Sidasa' bema tonga Juda sidining kadapmang ganangsa' yaranga kaminga kani'. Ka Juda aming girisi wari Pailat u ning aniging, udi giri ka Juda aming indi kadapmang ka aming ugumak ning waraga' wa Rom sidi tapni tang urang tanipking wang ning aniging. 32 Ka tim Jisas adi kadapmang ka adi kungkumak ning ka aming wari ukinga kungkumak waraga' undu' kuma'sa' togu'. Wara' wara'ganang wa adisining midi wari midi ka Jisas ana u togu' wara'ning beng u tipkadofiging.

33 Ning tanga Pailat wari adining midi yak wara'ganang tubobu amanga adenga Jisas u katingana ning anigagu', ma' gu Juda aming ning girii king wa. 34 Ka Jisas wari ning anigu', midi ka u torang wa ga'sa' u sura torang, ma aming nua'ni wari ganinga torang. 35 Ka Pailat wari ning anigu', a na Juda aming mo' wara' nakeda tanga tounga. Ganing amige a ganing girisiga warisa' naganing kafana ganang ginagira tabanga gipming. Ka gu nasi' kadagang tugung wara' i ginagira abing. 36 Ka Jisas wari ning togu', beng sini' torik kadapmang ka naga girii ira aming yaptatora wara'ning wa kamaganang i titining mo'. Naga kamaganang ingging sa' tanga iik ning ganang wa naning kane aming arantagim wari marara ami' tinga Juda aming girisi adi bemnap guk mo' tianing, mokngang. Ka naning tangkunang ka aming yaptatora wara'ning wa kamaganang yara'ning mo', undu' kadapmang nua'ni. 37 Ka Pailat wari u naknga ning anigu, a beng sini' ningwara' gu king nua'ni ba. Ka Jisas wari ning anigu', ga kuma' torang una, na king wari aderik. Ka na kamaganang i afuinga simeng wari nibegu' wa kane kubaniksa' ka midi beng guk itua waraga' afuguk. Ning tinga aming ka midi beng guk waraga' naking adi naganing midi u ninaksa' ting. 38 Ka Pailat wari ning anigu', ka midi beng guk wa nasi', aming wari waraga' ninak ning guk wa. Ning tonga ning tanga fugang tubobu amanga Juda aming girisi u ning yanggu', mokngang, na adiganang kadagang ni guk mo' katuarik wara' na mamareng sigesa' amimi ning guk mokngang. 39-40 Ka sidi kadapmang nua'ni ka fikifiki sande Pasova ning ganang wa na ai' tasama aming kalabus ganang ikiting wara'ning kubanik sige fadara ipmasamitik. Ka kami ya indining totik, Juda sidining king iba kabisamotik, ma'. Ka Juda aming kabi'mo' adibu ku urapsa' ning katiging, a wa mo', sige wa Barabas u kabiniminga mawa' ning katiging. Ka Barabas ka u kabiam ga' toging wa aming kareng mo' aming kadagang digirap tanga kubu sasop titiing waraga' toging.