Muqeddes Kalam (latin yéziq) Zebur 59

59-küy

1 Neghmichilerning béshigha tapshurulup, «Halak qilmighaysen» dégen ahangda oqulsun dep, Dawut yazghan «Mixtam» küyi; (bu küy Saul padishah Dawutning öyini közleshke paylaqchilarni ewetip, uni öltürüwetmekchi bolghan chaghda yézilghan): —

I Xudayim, düshmenlirimning changgilidin qutquzghaysen;

Manga qarshi turghanlardin méni égizde aman saqlighaysen.□ ■

2 Méni yamanliq qilghuchilar changgilidin qutquzuwalghaysen,

Qanxor ademlerdin méni qutquzghaysen.

3 Chünki mana, ular jénimni élish üchün paylimaqta,

Zorawanlar manga qarshi top bolushup qestleshmekte;

Bu qilghini mende bolghan birer asiyliq üchün emes,

Yaki gunahim üchün emes, i Perwerdigar;

4 Mende héch sewenlik bolmisimu, ular yügürüp manga qarshi sep salidu;

Méning yardimimge kélishke oyghan,

Halimni neziringge alghaysen.

5 I Perwerdigar, samawiy qoshunlarning Serdari bolghan Xuda, Israilning Xudasi,

Barliq el-yurtlarni sotlap-jazalashqa ornungdin turghaysen;

Qestleshni niyet qilghüchilarning héchqaysisigha rehim qilmighaysen.

Sélah.

6 Ular kéchisi qaytip kélip, ghaljir ittek ghazh-ghuzh qilip,

Sheherni aylinip laghaylap yürmekte.□

7 Qara, ularning aghzidin éqiwatqan shölgeylirini!

Lewliridin qilichlar chiqip turidu;

Ular: «Kim angliyalaydu?» — deydu.■

8 Lékin Sen Perwerdigar ularni mesxire qilisen;

Barliq ellerni mazaq qilisen!■

9 I méning küchüm Bolghuchi!

Men Sanga telmürüp qarap yürimen;

Chünki Xuda méning yuqiri panahgahimdur.

10 Manga özgermes muhebbitini körsetküchi Xuda méning aldimda mangidu;

Xuda manga düshmenlerning meghlubiyitini körsitidu.

11 Biraq, i Xuda, bularni qetl qilmay turghay;

Bolmisa méning xelqim Séni untuydu.

Öz küchüng bilen ularni sersan qilghaysen,

Ularning béshini éghirlashturghaysen;

I Reb, bizning qalqinimiz!

12 Ularning aghzining buzuqluqi tüpeylidin,

Lewlirining sözliri tüpeylidin,

Ulardin chiqiwatqan qarghashlar hem aldamchiliqlar tüpeylidin,

Ular öz tekebburluqi ichide tuzaqqa chüshkey!

13 Gheziping bilen bu ishlargha xatime bergeysen,

Xatime bergeysen!

Shuning bilen ular yoq bolidu;

Shuning bilen yer yüznining chet-chetlirigiche Xudaning heqiqeten Yaqupqa hökümdarliq qilidighanliqi ayan bolghay!

Sélah.□

14 Derweqe, ular hazirghiche kéchisi qaytip kélip, ghaljir ittek ghazh-ghuzh qilip,

Sheherni aylinip laghaylap yüridu.

15 Itlardek ular ozuq izdep her yerde qatraydu;

Qarni toymighuche huwlap yürmekte;

16 Lékin men bolsam qudritingni küyleymen,

Berheq, seherlerde özgermes muhebbitingni naxsha qilip yangritimen;

Chünki Sen men üchün yuqiri qorghan,

Éghir künlirimde panahgah bolup kelgensen.

17 I méning küchüm Bolghuchi, Sanga küylerni éytimen;

Chünki Xuda méning yuqiri qorghinimdur,

Manga özgermes muhebbet körsetküchi Xudayimdur.■

Zebur
<
59
>

□59:1 «Bu küy Saul padishah Dawutning öyini közleshke paylaqchilarni ewetip, uni öltürüwetmekchi bolghan chaghda yézilghan» —Bu weqe «1Sam.» 19-babta bayan qilinidu.

■59:1 1Sam. 19:12

□59:6 «Ular («qestleshni niyet qilghüchilar») kéchisi qaytip kélip, ghaljir ittek ghazh-ghuzh qilip, sheherni aylinip laghaylap yürmekte» — kona Qanaan (Pelestin) sheherliride ow izdigen itlar belkim kündüzde kishilerning jay-hoylilirigha kirishke pétinalmaytti, peqet ademler uxlighanda kiridu. Dawut xalayiq söygen adem bolghachqa, uni öltürmekchi bolghan kishiler belkim kündüzde qol sélishqa pétinalmaytti, peqet kéchide uning öyige bésip kiridu.

■59:7 Zeb. 10:11; 55:21; 57:4; 94:7

■59:8 Zeb. 2:4

□59:13 «Shuning bilen yer yüznining chet-chetlirigiche Xudaning heqiqeten Yaqupqa hökümdarliq qilidighanliqi ayan bolghay!» — bashqa birxil terjimisi: «Shuning bilen ulargha Xudaning heqiqeten Yaqupqa hem yerning chet-chetlirigiche hökümdarliq qilidighanliqi ayan bolghay!».

■59:17 2Sam. 8:3,13; 1Tar. 18:3,12; Zeb. 144:10