9
Nguluwi kanguwika ilagano na Nuhu
1 Nguluwi nakamtambichiza Nuhu na wanage, yowalonjela, “Mkalele, mwonjezeche, mkaimemeze isi yeng'ha. 2 Migongolo jeng'ha na videje vyeng'ha vya kilanga na vilumbigwe vyeng'ha vilingutambala muisi na somba zeng'ha za kuli bahali zowa na woga na zowadumba hemwe. Weng'ha wawichigwa hali ludali lwa hemwe. 3 Migongolo jeng'ha jiwele na muhe jowa ndiya ya hemwe, ndanguwapani kota vila londiwapele mizuchila jititime ja nyhule za ndiya ya hemwe. 4 Ila mleche kulya miwunde jiwele na danda, kwa vila ukomu wamumo mli danda. 5 Danda ya ukomu wa hemwe ndoitagusa, kwa chila igongolo na wanhu. Yomkopola miyage, ndoutagusa ukomu wa heye.
6 “Yalingubohola danda ya munhu,
danda ya heye yoboholigwa na munhu,
mina kwa kiwhana na Nguluwi, munhu nakalumbigwa.
7 Namwe mponde na mkonjezeche, mponde kwa winji, mkonjezeche muisi.”
Ipinde lya nhonya
8 Hamba Nguluwi nakamlonjela Nuhu na mwanage, 9 “Ndanguwika ilagano lyangu namwe na lulelo lwenu, 10 na vilumbigwe vyeng'ha viwele vikomu na videje na migongolo ja kudima haluga na ja kisolo, weng'ha walawile mli safina hamwe na hemwe. 11 Ndangwaluchiza ilagano lyangu na hemwe, kuta vilumbigwe vyeng'ha vikomu havibagamizwa ng'oo kwa nhonya, na hailawila kahi nhonya kota ila ya kuiwifya isi.” 12 Kahi Nguluwi nakalonga, “Achi ndo chilajilo cha ilagano londidita kwa heni na hemwe na chila chilumbigwe chikomu chiwele hamwe na hemwe kwa lulelo lweng'ha lulinguya, 13 ndanguwika upinde wa heni kuli ng'hungugu kilanga. Nawo wowa ulajilo wa ilagano lya heni na isi. 14 Hala hondiigubika isi kwa ng'hungugu, na awo upinde wa nhonya howokoneka kuli ng'hungugu, 15 ndokumbuchila ilagano lyangu na hemwe na vilumbigwe vyeng'ha viwele vikomu. Mazi hagomema ng'oo na kuvibagamiza vilumbigwe vyeng'ha viwele vikomu. 16 Awo upinde houlawila kung'ungugu, ndowona na kukumbuchila ilagano alyo lya mazuwa gose kwa heni na vilumbigwe vyeng'ha viwele vikomu muisi.” 17 Nguluwi nakamlonjela Nuhu, “Awu ulajilo wa ilagano lonyhaluchize na vilumbigwe vyeng'ha viwele vikomu muisi.”
Nuhu na wanage
18 Wana wa Nuhu walawile mli safina nawali Shemu na Hamu na Yafeti. Hamu nayali mhaza wa Kanaani. 19 Awo ndo wana wadatu wa Nuhu, na kulawa kwa hewo wanhu nawenela isi yeng'ha.
20 Nuhu yawele mlimi, nayali yaluche kuwa mlimi wa mgunda wa zabibu. 21 Nakanwa divai kulawa kuli zabibu zoyalimile, nakagala, hamba nakawasa mwazi mli chibumuli cha heye. 22 Hamu, mhaza wa Kanaani, nakawona umwazi wa mhaza wa heye, nakalawa kunze na kuwalonjela wang'holoze weli. 23 Ila Shemu na Yafeti nawahola nguwo, watandazula mmayega mwawo, nawaluta chimbelembele na kuugubika umwazi wa mhaza wa hewo. Nawalola kufungo, nahawauwene umwazi wa mhaza wa hewo. 24 Nuhu loyalilimche na kuvizela choyaditilwe na mwanage mdodo, 25 nakalonga,
“Kanaani yapanjilwe!
Kowa chitumagwa wa vitumagwa kwa wang'holoze.”
26 Kahi nakalonga,
“Shemu nayatambichizwe na Mkulu Nguluwi, Nguluwi wa Shemu,
Kanaani nayawe chitumagwa wa heye.
27 Nguluwi nayamtambichize Yafeti,
yekale kuli chibumuli cha Shemu,
Kanaani nayawe mpogozi wa heye.”
28 Loimalile nhonya ya mazi tendema, Nuhu nakekala miyaka miya zidatu na makumi gahano, 29 hamba Nuhu nakabagama loyawele na miyaka miya tisa na makumi gahano.