1 Laheli loyawene kota hambe yaponde mwana kwa Yakobo, nakamwonela fihi lumbulyake Lea, nakamlonjela Yakobo, “Ngalile wana, wone huditile ahyo, ndobagama.” 2 Yakobo nakazudizwa na Laheli na kumlonjela, “Ndaze, heni ndiwa honhu ha Nguluwi yakulemeze kuwa na wana?” 3 Laheli nakamwidichila, “Mpogozi wa heni Biliha kabaha. Uwase na heye leka yawe na wana honhu ha heni, nani kahi ndiwe na wana kwa kulawa kwa heye.” 4 Ahyo Laheli nakamgalila Yakobo mpogozi wa heye Biliha, yawe kota mchewake, na heye nakawasa na heye. 5 Biliha nakawa na himila nakampondela Yakobo mwana msongolo. 6 Laheli nakalonga, “Nguluwi nakanhagusa goya, nakahulika chililo cha heni na kungalila mwana msongolo.” Nakamchema mwana ayo Dani* Dani Kwa Chiebulaniya ndo nakanhagusa goya. . 7 Biliha mpogozi wa Laheli, nakawa na himila kahi na nakampondela Yakobo mwana wa keli msongolo. 8 Aho Laheli nakalonga, “Natitowa lukami na lumbulyangu, nani sumya.” Ahyo nakamchema mwana ayo Nafutali† Nafutali Kwa Chiebulaniya ndo kitowa..

9 Lea loyawene nakaleka kuponda, nakamhola mpogozi wa heye Silipa, nakamgalila Yakobo leka yawe kota mchewake. 10 Silipa nakampondela Yakobo mwana msongolo. 11 Lea nakalonga, “Mbuli zangundutila goya.” Ahyo nakamchema mwana ayo Gadi‡ Gadi Kwa Chiebulaniya ndo mbuli zangundutila goya. . 12 Silipa mpogozi wa Lea, nakampondela Yakobo mwana wa keli msongolo. 13 Lea nakalonga, “Ndangusangalala! Lelo wadala wonyhema heni kusangalala.” Ahyo, nakamchema mwana ayo Asheli§ Asheli Kwa Chiebulaniya ndo kusangalala..

14 Nawali mhela wa mbena ya ngano, Lubeni nakaluta kisolo na ako nakahola ifuza lilinguchemigwa mituletule* MituletuleKwa Chiebulaniya ndo ifuza liwele hewo wangutumbila kota wone mdala yolya ifuza alyo lyomwambuza kuponda lukami., nakamgalila mayake, Lea. Laheli nakamlonjela Lea, “Dedede, ngalile jimwe ja ajo mituletule ja mwanago.” 15 Ila Lea nakalonga, “Ndaze, kwangujesa ndo mbuli ndodo kumhola mlume wa heni, na sambi kwangugana kuhola mituletule ja mwana wa heni?” Laheli nakamwidichila, “Loungalila mituletule ja mwanago, Yakobo kowasa kwa hegwe lehano.”

16 Lelo matinazo Yakobo loyawele yohiluka kulawa kumgunda, Lea nakalawa kumbochela, nakamlonjela, “Ndimha mituletule ja mwanangu, ahyo kwanguganigwa kuwasa na heni.” Ahyo Yakobo nakawasa kwa Lea nechilo ayo. 17 Nguluwi nakahulichiza kulanda kwa Lea, na heye nakawa na himila nakampondela Yakobo mwana wa kahano msongolo. 18 Lea nakalonga, “Nguluwi nakangalila chonolo cha heni kwa vila nandimpa mlume wa heni mpogozi wa heni.” Lelo nakamchema mwana ayo Isakali† Isakali Kwa Chiebulaniya ndo chonolo.. 19 Lea nakawa na himila kahi nakampondela Yakobo mwana wa sita msongolo. 20 Lea nakalonga, “Nguluwi nakangalila ndolendole inojile. Lelo mlume wa heni konyhulichiza kwa vila nandimpondela mwana wa sita msongolo.” Ahyo nakamchema mwana ayo Sebuluni‡ Sebuluni Kwa Chiebulaniya ndo kuhulichiza.. 21 Hamba nakaponda mwana mhinza nakamchema Dina.

22 Hamba Nguluwi nakamkumbuchila Laheli, nakahulichiza kulanda kwa heye nakamdita yawe na wana. 23 Laheli nakawa na himila, nakaponda mwana msongolo, nakalonga, “Nguluwi nakambusila soni ya heni.” 24 Ahyo nakamchema mwana ayo Yusufu, yolonga, “Mkulu Nguluwi nayanyonjezele mwana yunji msongolo.”

25 Laheli loyampondile Yusufu, Yakobo nakamlonjela Labani, “Ng'hundize nyiluche hakaye hangu, hali isi ya heni. 26 Ngalile wadala wa heni na wana wa heni wapondigwe kwa kukukolela mijito hegwe, mbuche na hewo. Kwanguvizela kota nandikukolela mijito goya.” 27 Ila Labani nakamlonjela, “Ng'hundize kwa uganililo nani ndonje. Ndivizela kwa kulagula kota Mkulu Nguluwi nakamha utambichizo kwa chiwalo cha hegwe. 28 Ulonje sendi zilinga, nani ndokugalila.” 29 Yakobo nakamlonjela, “Hegwe kwanguvizela ndaze vyondikukolele mijito, na ndaze vyondijilolele migongolo ja hegwe. 30 Kwa vila londing'hali kuya kuno nawali na lufufu ludo hela ila kulawa lofichile, lufufu lwa hegwe lonjezeka ng'hatu, na Mkulu Nguluwi nakakutambichiza chila hondilinguluta. Ila sambi ndowalolela nili wang'holozangu?”

31 Labani nakamuuza, “Ndikugalile choni?” Yakobo nakamwidichila, “Humha chinhu choneche. Ndolutilila kujilolela migongolo ja hegwe wone konditila mbuli ayi. 32 Ng'hundize ng'hole hagati hali migongolo ja hegwe jeng'ha lehano, ndibagule hali ilundo chila ing'holo lyana liwele na usalagwe na utoletole na chila ing'holo lyana lititu na chila mhene iwele na usalagwe na utoletole. Azo ndo zowa sendi za heni. 33 Ahyo, mazuwa galinguya, kutanganika kwa heni kokoneka hazelu hala hondipegwa sendi za heni. Mhene yoneche yohaiwele na utoletole ama ing'holo lyana lyoneche lyohaliwele lititu likoneka hali ilundo lya heni, alyo lyowa lihizigwa.” 34 Labani nakalonga, “Goya! Na iwe kota vyoulonjile.” 35 Ila Labani zuwa lilyo nakaluta kujibagula mipongo jeng'ha jiwele usalagwe na utoletole na mhene zinji ndala ziwele na utoletole na usalagwe na uzelu na chila ing'holo lyana lititu na nakaziwika hali wamizi wa wanage leka jiwe ja Yakobo. 36 Migongolo ja Labani na migongolo ja Yakobo najibaguligwa kwa utali wa kujenda mazuwa gadatu.

Yakobo nakapona bahala yodima migongolo ja Labani jiponile. 37 Lelo Yakobo nakahola fito za migodi jidatu jilivinji nakajibadula mibadu leka misitali mizelu joneche kuli fito azo. 38 Nakazimiza fito azo zoyazibadule hali migongolo hali mibuli ja kunwezela mazi, honhu hawele migongolo najuya kunwa mazi, 39 migongolo milume najikwina midala najiwa na nyinda hali fito azo, najilela migongolo jinji jiwele na usalagwe na utoletole. 40 Yakobo nakajibagula ajo ming'holo myana, hamba nakajilajila kuli migongolo jiwele na usalagwe na mititu kuli chilundo cha Labani. Kwa nzila ino, Yakobo nakawa na chilundo cha heye yuye, na hambe yahanzile na chilundo cha Labani. 41 Naiwa chila mhela wa migongolo jinenehe kuhola nyinda, Yakobo nakawikaga fito azo kumwando mwa ajo migongolo hali mibuli ja kunwezela mazi, leka wahole nyinda hali fito azo. 42 Ila nahawichile fito azo kumwando mwa migongolo jiwele ng'hochele lojali jihola nyinda. Baho du, migongolo jigandile najali ja Labani, na migongolo jinenehe najali ja Yakobo. 43 Lelo Yakobo nakawa na lufufu lukami, nakawa na vilundo vikulu vya migongolo na wakolamijito wa heye wadala na walume na ngamiya na midogowi.