49
1 Yakobo nakawachema wanage, nakalonga, “Mikungajize hamwe ndiwalonjele mbuli ziwafika hamba.
2 “Mikungajize mhulichize hemwe wana wa Yakobo,
mnyhulichize heni Isilaeli mhaza wa hemwe.
3 “Hegwe Lubeni ndo mlelwa wa heni wa mwaluko,
ludali lwangu na ifuza lya usongolo wa heni.
Hegwe kuna ukulu na mong'ho ng'hatu.
4 Hegwe kwanguwifya kota mazi gamemile tendema.
Ila huwa wa mwaluko kahi,
kwa vila nakukwina mchinhanda cha heni mhaza wa hegwe,
hegwe nakuchidita chikokomoche kwa kuwasa na mchewangu,
ena, hegwe nakuchikwina!
5 “Simeoni na Lawi mwa lukolo,
wangukopola kwa migoha jawo,
6 ila heni sikunda kihanza na nongwa za hewo,
hegwe nhumbula ya heni, uleche kihanza mli nhing'hano za hewo,
mina mli kuzudila kwa hewo, nawawakopola wanhu,
kwa ujuvi wa hewo nawakanha idanha lya isenga.
7 “Ndangupanjila kuzudila kwa Simeoni na Lawi, mina ndo kung'ang'ala lukami,
na ng'alazi ya hewo yahela isungu.
Ndowasambalula kuli isi ya Yakobo,
ndoweneza kuli isi ya Isilaeli.
8 “Hegwe Yuda, wang'holozo wokutogola.
Wang'honyo wa hegwe kowadinga singo,
na wang'holozo wofugama kumwando kwa hegwe.
9 Hegwe Yuda mwanangu ndo kota isimba,
yebatile igongolo na kukwina kuchanya.
Kota vila isimba lilingigolola na kuwasa hasi,
isimba liwele na mong'ho, yalikohi yojeza kulililimla?
10 Idela lya undewa halikuka kwa Yuda,
ne ng'hweku ya ulongozi hali heye,
mbaka hoyofika yula yawichilwe,
yawele kohulichizwa na nhanzi zeng'ha.
11 Kowa na zabibu nyinji, kolikoweleza idogowi lya heye hali mzabibu,
na idogowi lyana kuli mzabibu unojile, leka jilye.
Kwa vila mzabibu naulela lukami,
kohovuga nguwo za heye mli divai,
na mivalo ja heye mli divai ndung'hu kota danda.
12 Meho ga heye nagoneka ganoga kota divai inojile,
mizino ja heye mizelu kota itombo.
13 “Sebuluni kochikala honhu hawele mwhani,
kumwhani kwa heye kowa honhu hakwimizila meli.
Isi ya heye yobakana na Sidoni.
14 “Isakali ndo kota idogowi liwele na mong'ho,
lilinguwasa hagati ha mitunyo ja heye.
15 “Nakona kota kambi inoga,
na kota isi ndo yakunojeza,
nakenamiza mhungo ya heye kupapa itunyo,
nakawa mpogozi kukola mijito kwa lupichi.
16 “Dani kowa mhanyisi wa wanhu wa heye,
kota yumwe wa lukolo lwa Isilaeli.
17 “Dani kowa kota izoka mnzila,
izoka liwele na dunga hafungo mwa nzila,
lilinguluma chisigino cha falasi,
na heye yakwinile falasi kangugwa lung'ata.
18 Hegwe Mkulu Nguluwi, ndangukubeteza undohole.
19 “Gadi, kovadigwa na wabokaji,
ila heye kowawinza kumbele na kuwadumya.
20 Isi ya Asheli yolavya mbena kwa winji,
na heye kolavya chilyo chinonile kwa mndewa.
21 “Nafutali ndo kota ibala lilejehe,
lilingulela wana wanojile.
22 “Yusufu ndo kota igodi lilingulela,
igodi lilingulela hafungo mwa nzasa,
nhagala za igodi zitanda mlukanzi.
23 Walasa misale nawamvada vibi ng'hatu,
wamtozela msale wogana kumgaza lukami.
24 Ila upinde wa heye ung'hali ukakamale,
na moko ga heye nagapegwa uwanzi,
kwa ludali lwa Nayawele na Mong'ho wa Yakobo,
kwa chiwalo cha Mdimi, Italawe lya Isilaeli,
25 kwa Nguluwi wa mhaza wa hegwe yokutanza,
kwa Nguluwi yawele na mong'ho yokutambichiza,
uwe na utambichizo wa nhonya kulawa kuchanya kilanga,
utambichizo wa kuli mazi menji gawele hasi,
utambichizo wa lulelo lwa wachimai na migongolo.
26 Utambichizo wa mhaza wa hegwe usumye utambichizo wa vidunda vya mazuwa gose,
uwe unojile kusinda vidunda vya katali.
Utambichizo awo uwe mchanya mwa mutwi wa Yusufu,
mli chihanga cha heye nayabaguligwe kota chilongozi kwa wang'holoze.
27 “Benjamini ndo libwa lya kisolo ling'ang'ale,
lufuku lyangulya lyolibate,
na matinazo kangugawa upelembi.”
28 Azo ndo nhanzi kumi na mbili za Isilaeli na awo ndo ulonzi woyawalonjele mhaza wa hewo loyawatambichize, chila yumwe wa hewo kota vyoyaganigwe.
Kubagama kwa Yakobo
29 Hamba Isilaeli nakawalajiza wana wa heye ahi, “Heni ndahabehi kubagama na kilumba na wasekulu wa heni. Mkatile lukuli lwangu hamwe na wasekulu wa heni kuli chilaga chiwele kuli mgunda wa Efuloni Mhiti, 30 kula Makipela, kolilawilaga isanya kwa Mamle kuli isi ya Kanaani. Abulahamu nakagula ipalika na mgunda awo kwa Efuloni Mhiti liwe lya heye kutilila wanhu wabagame. 31 Ako ndo kowatiligwe Abulahamu na mchewake Sala, ako ndo kowatiligwe Isaka na mchewake Lebeka na ako ndo kondimtilile Lea. 32 Ipalika alyo na mgunda wake naliguligwa kwa Wahiti.” 33 Yakobo loyasindile kuwalajiza wanage, nakahilusa magulu ga heye mchinhanda, muhe nauleka lukuli nakelumba na wasekulu wa heye.