Kaarita Saada-kariwai
Hebrewnao Atiꞌo
Diꞌoraz kaarita dauaꞌo
Aonaa uaitapa-kao kanom saadanii wuruꞌu diꞌoraz kaarita Hebrewnao ati. Mazan wuruꞌu pidan saadaꞌoraz aitapaꞌo naꞌapam Hebrewnao diꞌitinpan Kaimanaꞌo Kuwai dauꞌu, Jesus Christ dauaꞌoraz. Ĩnao dakota-kariwainaouz Jewnao kii naꞌiki Israelitenao kii kapam.
Aizii Hebrewnao, ĩaitapanii ipai wuru dauꞌanaꞌa Kiwiitapaꞌoraz Covenant. Wuruꞌu Kiwiitapaꞌoraz Covenant,* Kiwiitapaꞌo Covenant: Putukapa kaarita tokon ii, Parada-karu Mashaꞌapannaada-kinao diꞌii, ‘covenant’ waranuꞌu. uruu Moses tominapa-kida-kinaaz Israelitenao. Mazan Moses, Tominkaru poitoru karikaonan uruu. Mazan Jesus, uruu Tominkaru dani paꞌan. Utominapa-kida pidannao Paꞌinaꞌo Covenant dauꞌu paꞌan.
Joshua naꞌakan Israelitenao kaimanaꞌo amazada diꞌiti, Tominkaru taaniaz ĩꞌati, turuu kizi ĩmashaapan kaiman Kiwiitapaꞌo Covenant kawanaꞌati. Mazan Jesus naꞌakan waunao, wamishidapan idaꞌan, turuu kizi wamashaapan konaukii Paꞌinaꞌo Covenant kawanaꞌati.
Hebrewnao kainaꞌa ĩfaadaannao Levi takaan-daunnao, Tominkaru Paradan saadinpaꞌo kian kawanaꞌatiꞌo. Umanawunuꞌo Faadaa zowii uzai kida pidannao oian soꞌota-kinao nii. Uzai kida zowiauzo-kao ipai wunu. Mazan Jesus, uruu wafaadaan. Baukapa karikaonan uzowii-kao soꞌotaꞌo nii pidannao oian kida. Jesus mawakan Tominkaru taa kizi Paꞌinaꞌo Covenant, powaꞌaꞌoraz paꞌan ukaimanan. Naꞌiki kaarita Hebrewnao atiꞌoraz kaminkaꞌuta waunao, waaitapa-kinaa nii kanom niꞌo wuruꞌu Tominkaru taanuz Paꞌinaꞌo Covenant.
Kaarita buutinpan kida
Kaimanaiman Christ aidan Tominkaru kaduz 1:1-3
Christ, powaꞌaꞌo zii umanawunun angelnao ai 1:4—2:18
Christ, powaꞌaꞌo zii umanawunun Moses naꞌiki Joshua ai 3:1—4:13
Christ, uruu Faadaa Umanawunuꞌo powaꞌaꞌo zii4:14—7:28
Christ shaꞌapataniaz aimaakan powaꞌaꞌo zii umanawunun 8:1—9:22
Christ taainanuz powaꞌaꞌo zii umanawunun 9:23—10:39
Tominkaru pidanannao umanawunuꞌo ĩmishidapan 11:1-40
Wadaꞌan Jesus kaduz 12:1—13:19
Toriinapa-karu 13:20-21
Ubaukapan naa saadaꞌoraz taan paparadan 13:22-25
1
Tominkaru paradan pauDani idaꞌan
1 Kotuaꞌa naa daꞌi mapuda Tominkaru paradan iriba pabiꞌinaaka kidaꞌo idaꞌan wadokozu-daunnao ati, paprophetinnao idaꞌan. 2 Mazan aizii amazada ikodaꞌanan diꞌitiꞌi naa patokon, Tominkaru paradan waꞌati pauDani idaꞌan paꞌan. Naꞌiki uruu idaꞌanaꞌo utoman aokazi, imiꞌi baara naꞌiki ipai aimaakan kida. Tominkaru zaamata paudani, zaamataꞌo nii ipai aimaakan paꞌidiwau nii. 3 Wuruꞌu udani, naꞌapa ukaduz Tominkaru kaduz kawan manawun. Wuruꞌu umanawununuz, aida-kidaꞌo naꞌapam Tominkaru umanawunun. Uruu zaamatapaꞌo ipai aimaakan paparadan maꞌozakan idaꞌan. Naꞌiki utominan daunaꞌan waꞌoian soꞌotiki nii, usakanatan Tominkaru diwaꞌora antanapu,† Jewnao taapan pidan sakanataꞌo Naobanai diwaꞌora antanapu, umanawunuꞌo uruu ipai baꞌorainao ai umanawunuꞌoraz manawun aokazi ii.
Tominkaru dani, powaꞌaꞌo zii umanawunun angelnao ai
4 Tominkaru Dani, powaꞌaꞌo zii umanawunun angelnao ai. Naꞌapa uꞌuu Tominkaru taaniaz, powaꞌaꞌo zii umanawunun angelnao uu ai. 5 Ushaꞌapanum kauꞌan aonaa naꞌapainim Tominkaru kiauzon angel ati,
“Pugaru õdani.
Aizii Õgaruꞌu naa puDaru nii.”‡ Psalm 2:7
Naꞌiki aonaa naꞌapainim Tominkaru kiauzon kapam angel dauꞌan,
“Õgaruꞌo nii uDaru nii,
naꞌiki uruꞌo nii Õdani nii.”§ 2 Samuel 7:14; 1 Chronicles 17:13
6 Mazan Tominkaru dyuudan donoꞌoraz umanawunuꞌo paudani imiꞌi baara ati, ukian,
“Marii ipai Tominkaru angelinnao
umanawuntapan uruu.”* Deuteronomy 32:43
7 Kaikapaꞌoraꞌa kapam ukian angelnao dauꞌan:
“Tominkaru toman paꞌangelinnao awaru nii kida;
naꞌiki ĩnao upoitorunaouz utoman,
tikazi maodapaꞌo kawan kida.”† Psalm 104:4
 
8 Mazan pauDani ati ukian paꞌan,
“Pugaru Tominkaru,
karikaonanuꞌo nii punaobanai-tinpan.
Pukazowautapan nii pupidanannao sakitapaꞌo idaꞌan.
9 Pumarainapanii aimaakan sakitapaꞌo,
mazan dikauda kidaꞌo aimaakan,
tuukii pumanaudapakan.
Uruu idi ukauꞌan õgaru,
puTominkarun,
õzaamataniꞌi naa pugaru,
naꞌiki õtaaniꞌi naa puꞌati konaukii-kinai umanawunuꞌoraz paꞌan,
powaꞌa zii õtaan puꞌatizu, õtaan ai puminaudaꞌunao ati.”‡ Psalm 45:6-7
 
10 Tominkaru kian uꞌati koshan,
“Naobanai, pugaru tomaꞌoraz imiꞌi baara amazada sakadinan dono.
Naꞌiki pukaꞌu idi putoman aokazi kapam.
11 Ĩmainaabatinan nii, mazan pugaru, punaꞌan nii karikaonan paꞌan.
Mazan putomanii kida, zaamaꞌo nii ĩdyaun naꞌapa kamicha zaaman kawan.
12 Kamicha narakada-kao kawan, naꞌapaꞌo nii punarakadan ĩdyaun,
Naꞌiki pumuudan nii ĩdyaun panaꞌitinapa.
Mazan pugaru aonaa naꞌapainim pupanaꞌadinauzon.
Naꞌiki pukakupanuz aonaꞌo nii naꞌapainim ukatokon-tinan.”§ Psalm 102:25-27
13 Tominkaru aonaa naꞌapainim ukiauzon angel ati kaikapaꞌa:
“Pusakanata õdazabaꞌa õdiwaꞌora antanapu
atii õmuudan putarubanao puwaranuꞌu.”* Psalm 110:1
14 Mazan angelnao doronai karikaonan ĩdyaun naꞌiki poitoruinao, dyuuda-kariwai Tominkaru diꞌiki, kaminkaꞌutaꞌo nii pidannao kazannaatinaꞌo niꞌoraz.

*^ Kiwiitapaꞌo Covenant: Putukapa kaarita tokon ii, Parada-karu Mashaꞌapannaada-kinao diꞌii, ‘covenant’ waranuꞌu.

†1:3 Jewnao taapan pidan sakanataꞌo Naobanai diwaꞌora antanapu, umanawunuꞌo uruu ipai baꞌorainao ai

‡1:5 Psalm 2:7

§1:5 2 Samuel 7:14; 1 Chronicles 17:13

*1:6 Deuteronomy 32:43

†1:7 Psalm 104:4

‡1:9 Psalm 45:6-7

§1:12 Psalm 102:25-27

*1:13 Psalm 110:1

© 2012 WBT