2
Jonah ko guranek
1 Jonah wal tuagu ningi baga se, Yawe, noko Kaem, mu kote guranek beteram, 2 ale mam:
“Ani ikup memek ningi baga se Yawe nika
aurem, se ni ani agiring iluwem.
Ani kuera mutim ningi baga se saonga ko
niarem, se ni aninga niara ikiem.
3 Ni ani gagi du biya wore ningi aga saperem se nama dagulem,
ale du biya kaperem se gagi ko lalol ninguru aga lautam;
ka tamun bibiya kelagakasan ale angimik ko namakasan.
4 Ani ikiem mu ani ta ni kema te mena
namerem, ale udagi nika temple laili mu me arigekko iwita ikiem.
5 Ani gagi aga ira kaluwuram se naung du biya mu ningi bagakasam,
se gagi ko sirsir mel asupuling amone isi gurugam.
6 Ani sarengem ale kaperem nama laga gagi ko duruk duap ningi aratem,
ale kua iwi namarikko lage te namerem.
Bare ni Yawe aninga Kaem, ani mutim
du biya wore ningi aga patawu taem.
7 “Tom ani angimik lilim ago maga
nama se mu, ani Yawe ni ko ko angamin ares mam,
se aninga guranek mu nika temple laili mu te nama tarigiram.
8 “Arikaya kaem kawel alo mu nunga
ilukuawusan mu nika gemang lila bowa ningi me bagasan.
9 Bare ani mu, wur amilmil ilu se
anapeya tama mel tama bita kisekko balem umu bita kisekko.
Ale balik, ‘Sangaru tata ko munan mu Yawe kote taiso!’ maikko.”
10 Se Yawe wal aromemek mu kiti gurugam se Jonah ilak nama kapa saun te kapi beteram.