NAHUM
Nahum mu Yawe ilak tuatara ko kari bo. Se batoga imi te nu Assyria wonong Nineveh memek taukko wore ko den baluwoso.
Assyria alo nunga munan mu memek nunguningkiri. Nuna sor saki nongote geraga se, ikup yaman nungaru se, ninguru nunga bita maguwukasan. Yia tom 722 B.C. mu te mu nuna Israel moa mituwuman. Se aking yia tom 663 B.C. mu te nuna Egypt alo arungu kagerman ale nunga kiaman (3:8-10 arikko). Se ko udagi, tom Nahum den imi batogam ko tom mu te agila, Judah nunga king alo betelatala Assyria nunga nobowa ningi baga se pempem manga melmasak nungarukasan.
Bare Yawe Nahum kuring te giram balam butata, yia tom 609 B.C. mu te, kager kari alo taiman ale Nineveh wonong biya mu maguwu sapaman. Se wonong mu aitak me aniso.
Nup Nahum mu ko nunguning mu “nongomang ira ko kari”.
1
1 Den imi ningi Kaem Nineveh nunga den balam. Kausa yumura imi Nahum kote tairam. Nahum mu Elkosh ko kari bo.
Yawe Nineveh alo nunga gomang magaram
2 Yawe mu munan memek mu ko gomang
magara ale koma betera ko Kaem;
nu kariimet nu la bowa ningi me baga se
nu la karo tusan mu ko gomang magara diram la nungarso.
Nu ko kager kari memek motam la me nungarkoso, mena,
noko gomang magara nunga maguwurokko mu butata pempem ani lagoso.* Yawe mu munan memek ko gomang magara ale koma betera ko Kaem: Romans 12:19; Hebrews 12:29; Revelation 6:15-17.
3 Yawe mu gomang motam pasak ala me
magoso, bare nu mu sokel garagar nunguningkiri.
Yawe kariimet memek mu motam la me
nungarkoso, mena, mu koma memek nungarso.
Yar daula samamer mu noko sokel wetang te beteso;
se tom nu aolak iluso, mu taiti nuwi mu
noko doleng bowa ningi kupkup iwita barasoso.
4 Nu gagi manarso se maraka saposo;
nu balso se yu bibiya maraka gilingisan.
Duruk Bashan se Carmel ko sirsir luan te mu maraka namasan;
se Lebanon ko diri sisik yawara yawara
mu kutukutuk ma kapa gilingisan.
5 Duruk nu arigisan ale wanara ko
kapasan, se motongar kuting gotektek mu parasa namasan.
Ali lilim la ko melmasak suen la karogo nu arigiso ale uririkiso.
6 Tom nu gomang magoso mu, awiri nu
koma te bagarukko terong?
Mena. Noko gomang magara mu tama
kuamili iwita kaposo ale manga kai pakakumu saposo.
7 Yawe mu ningo;
nu ikup ningi mu ko kariimet nunga yumura kuwim bagoso.
Nu arikaya nu te ira sanamoso mu sangarso.
8 Bare yu lom biya te Nineveh
menawurok, ale ko kariimet nunga
karo kuera mateng ko tiromorom ningi nunga warukko.
9 Nuna memek aguwaya Yawe kote
betemonko ikia kaloman mu nu menawurokko.
Ale tom suanta ko menawuso mu ta menawuso.
10 Nuna kariimet yu no nguala kam ngualamon sipimon,
ale mayang kore ago mu te sora kam soramon,
se tama betera se kani sapa kam kani sapamonko.
11 Nineveh, nika ningi kari memek bo
aratam ale Yawe ilak barimarukko ikia tuati guruguwoso,
ale nu saki alo nu sangarmonko nongorak munakawoso.
12 Bare Yawe iwita balso:
“Nineveh alo sor saki ko kager kari
nongorak nunumi nuguting iluman ale nuna suen biya nunguningkiri,
bare ani nunga menawurik se menamonko.
O Judah, nunguningta ani memek ningi ka beterem,
bare udagi uwuta me ka bitirikko.
13 Aitak mu ani nononga sokel ninga
iramuram mu menawu saparikko,
ale nunga mayang aora te ninga talipaman mu batutumu warikko.”
14 Yawe den aora biya balu ni Nineveh kisam mu iwita:
“Ni mu aitak kimik kuriang gue bo nika nip giokko mu mena.
Ani ni melmasak dora, tam te kisi
awurem se ka kaem kawel alo nunga
kuar nika temple ningi anisan sumu,
nunga kulukumu biagi maguwu saparikko.
Ale nika nip te ka kuera mutim ilu bitirikko,
mu awuk, ni memek nunguningkiri!”
15 O Judah, duruk luan awote loagerko,
kari bo den gilalong ningo giam ale ago taiwoso,
nu marolila se bagara welang ko den bala ko kari!† Isaiah den bo uwutatala balam: Isaiah 52:7. Romans 10:15 ago arikko.
Nika kagin ko biguwura tom bibiya mu te mu amilmilerko!
Ale anapeya mel Kaem tuiko ilak den kalem mu tuiko!
Memek bo udagi me utu nagurok ale ka maguwurokko, mena;
mu nuna mena sapaman.
*1:2: Yawe mu munan memek ko gomang magara ale koma betera ko Kaem: Romans 12:19; Hebrews 12:29; Revelation 6:15-17.
†1:15: Isaiah den bo uwutatala balam: Isaiah 52:7. Romans 10:15 ago arikko.