7
Kari Kaem ko tutera ningo te sangukko niaso
(David nu Benjamin ko kari Cush munan beteram wore ko iki se wur imi iluwam)
1 O Yawe, aninga Kaem, ni aninga yumura kuwim;
kari aga momonko aga karowasan,
se aga sangaru ale aga bataguru toko.
2 Mena mu, nuna lion iwita aga
batutumumon se katir katir kaparikko,
se kariimet bo aga sangukko mena.
3 O Yawe, aninga Kaem, ani memek i bo bitirik se ko ikup angimik te aniruk,
4 agi aga tiran yawara ikup te bitirik,
agi aga kager kari duap mena nunga bita maguwurik mu asele,
5 am agarkiwer se, aga kager kari aga ilumon ale
aga momon maguwumon ale ali te aga sapamon se kua namarikko.
Bare ani memek bo me beterem.
6 Buta se Yawe, gemang memek te bares
ale kari agarak bita karowasan mu nunga maguwurko!
Aninga Kaem, munan diram mu ko sokel ago baluko.
7 Se mu ko, ni kariimet suen la kimik duap te nunga bolala awur ale
nika daiga kuwim kualala mu te baga se
8 suen la nunga tutia saparko.
Ale Yawe, aninga munan diram mu ko aga wetang saparko, O Kaem Kalel Biya.
9 Kariimet memek alo imi nunga munan
memek mu menawur se kariimet ningo mu terong bagamonko,
mu awuk, ni munan diram ko Kaem;
ni kariimet nunga ikia nunga nongomang motam ko iki sapasam.
10 Kaem Kalel Biya mu aninga karem;
nu kariimet nongomang diram mu nunga sangaru taso.
11 Nu tutera ura diram la beteso;
nu pempem ko gomang magara wetang saposo.
12 Se kariimet bo me giris palaguk mu sinar taukko:
Kaem ko batir kore iluwam, ale ko daga wol tagiram ale sinar ago bagoso.
13 Nu kager ko mel nungam burangaram,
ale gatu kore tamatama mu gi awuram se aniso.
14 Ikialko! Kari memek alo ikia memek betemonko ko ikia tasan,
kawel betemonko ko den nungursan,
15 ale kari saki te ningi dagulamonko mutim isan,
bare mu nongota aking ningi dagulasan.
16 Nuna nongota nunga ikia memek betesan umutang te memek to gilingisan;
ale nongota kager daong betesan mu aking peleso nongota nunga moso.
17 Ani wur te Yawe Kaem Kalel Biya mu nup patawurikko,
ale noko munan diram la mu ko amilmil tuekko.