14
Kariimet bo Yawe doleng sapara me ikiso
(David ko wur)
1 Kariimet ikia sinar mena mu balsan, “Kaem mena!” masan.
Nunga ikia maga saparam, se nuna munan suen la betesan mu am memek la betesan;
ale bo ta munan ningo me beteso.
2 Yawe duruk wonong te baga se loagoso
se ko kariimet lilim nongote tai kaposo,
nu bo i ikia sinar karogo se nukote la motam bita lagoso wore arigokko loagoso.
3 Bare mena. Nuna suen la lage ningo nubiring tui muruwuman,
ale suen la kilek memek te kapa sapaman,
ale bo ta munan ningo bo me bitawoso, am mena biya.
4 Se kariimet memek bitawara mu awuk? Nuna me ari ikimonko e?
Nuna aninga kariimet bread nokoyam nunga bita maguwusan;
ale Yawe ko ikia me tasan.
5 Bare nuna ninguru nguangamonko,
mu awuk, Kaem kariimet ningo diram betesan mu arungak bagoso.
6 Nina memek betera ko kariimet alo, ikialko!
Nina kariimet kituwura guat nunga ikia bagara parusuwural maguwuralko taisan,
bare Yawe nunga bitarso.
7 O saonga! Aga angamang mu saonga bo Zion barasuk ale Israel kariimet nunga sangukko!
Tom Yawe ko kariimet nunga sanguk se aking daiga bagara ningo arigimon,
mu Jacob ko digo nongomang motam nungeruk se Israel kariimet amilmilamonko!