22
Kari ikup karogo ko aira, se aking Kaem nup patawura ko den
(David ko wur)
1 Aninga Kaem, aninga Kaem, ni awuk se biring gurugu aisem?* Matthew 27:46 ago arikko.
Ni awuk se aninga aira me ikisam, ale awuk se ani me aga sangorsam?
2 O aga Kaem, ani woremkalal ka arusam, bare ni ani agiring me ilusam;
aking tirom ai lagasam, aeman me sapasam.
3 Bare ni King, keta laili nunguningkiri;
ana Israel suen la ni nip patawusan.
4 Nanga taleng girigir ni ko ko nongomang ningi nunguning aram,
se ni memek ningi nunga sangem ale nunga giem.
5 Nuna nikate niaman, se ni nunga sangem;
nuna ni ko ko nongomang ningi nunguning aram,
se ni me nunga bita tokasam, am nunga sangarukasam, ale nunga giem.
6 Bare ani kariimet iwita mena, ani ali ko malalok iwita;
kariimet suen la ani agarki maguwusan ale aga gusisan.
7 Ale suen la agarkasan mu den kolara balsan,
ale nusumulak daleluwu sapasan ale nusupuling sapa gilingisan.
8 Ale aga manorsan, “Ni Yawe ko gemang
ningi nunguning masam, bare awuk se me ka sangarso?
E nu nika kueso, mu awuk se me ka sangarso?” iwita aga balu gilingisan.
9 Bare ni keta ani ayam tuagu ningi
yawarakala aga sinar taem se bilangerem;
ale tom ani amin nowakasam mu ni ninguru aga sinar tokasam.
10 Ani bilanga se la, ni ko ko angamang ningi nunguning aram;
se ni aninga Kaem bagerem tai aitak.
11 Ani ikup aga iram, se ni ani me aga bitarko!
Ani kariimet ito aga sangukko mena.
12 Bulmakau diwang iwita aga taluluru gilingiman;
nuna sokel ago nunguningkiri, Bashan sor ko bulmakau turan.
13 Nuna lion iwita mel bo momonko ngang masan ale niasan iwita,
aga momon maguwumonko bagasan.
14 Se yu ali awote kaposo ale palenga
namoso iwitata, ani asokel mena saparam;
ani angimik sokel kutukutuk ma saparam.
Aninga angamang motam ningi mu
candle iwita kaniram ale palengam kaposo.
15 Ani adogotak garagara mam,
ale angamili tarigi gek mam;
ni ani kuerikko aga beterem, se ani kuesam.
16 Kausik memek aga taluluru guruguman iwita,
kari memek aga taluluru guruguman.
Nuna aga asiwik agiting usi barukuman.
17 Se aninga angimik sokel suen la mu ani ko ikiwasam;
kariimet ani agarkasan ale “terong memek tam” ma balsan.
18 Nuna aninga angimik guang kututuwu giman ale pagaru nunumi tuman;
ale aga guang bo kolamon ale awiriya taukko mu ko kola gilingiman.
19 Bare Yawe, ni awar biya me bagerko!
Ni aninga Saonga Kari, tairatela tair ale aga sangaruko!
20 Batir kore ningi aga sangaru toko!
Kausik nogore ningi ni aga sangaru toko!
21 Lion nuguring ningi aga bataguru toko!
Bulmakau daong memek mu ko aga sangaru toko!
22 Ani ka nip, ka dugu duap aga singsang nunga manikko;
ale biguwura ningi ka nip patawurikko.
23 Ale nunga manik, nina arikaya Yawe
kuring bowa ningi bagasan mu ko nup patawuralko!
Nina Jacob ko taleng girigir, nup biya tualko!
Nina Israel ko taleng girigir, nguanga se nup patawuralko!
24 Mu awuk, awiriya ikup memek arigiso, bare nu me ari pateso,
ale koma motam me kaluwu namoso, mena;
nu aninga aira ikiam, ale aga saongam.
25 Biguwura biya te ani ka nip patawurikko;
ale anapeya munan bita kisekko mu,
kariimet nika kiring bowa ningi bagasan mu nomokete bita kisekko.
26 Se kariimet nunup mena, kituwura guat mu, na namon nungumik ago terong maukko;
kariimet ni ko ko kuesan mu nika nip patawumonko.
O Yawe, marak nungaru, se tom suen biya amilmil ago la bagamonko!
27 Ali koma suen la te, kariimet Yawe ko
ikimon ale giris palagamon ale kote taimonko;
ali lilim ko kariimet nu koma te nubugura kulukurmonko,
28 mu awuk, Yawe nu King Biya;
nu ali sor suen la nunga bitarso.
29 Kariimet nungumik mel karogo mu no gi se nup patawumonko;
kariimet tom tukunangta baga kua iwi namasan,
mu suen la koma dugu te nubugura kulukurmon ale nup patawumonko,
mu awuk, nuna pempem marak me baga lagamonko.
30 Se kariimet gue udagi taiwasan mu nu bowa ningi bagamonko;
ale nunga kuriang gue mu Kari Biya ko
dugu duap nunga manarmon se ikimonko.
31 Nuna noko kiwem ningo umu balu pagarmon ale balmon,
“Nu nanga sangaru tam!” mamon se
kariimet gue me bilangasan mu maingte karogo ikimonko.