68
Kaem kager te mariraram ko amilmil wur
(David ko wur)
1 O Kaem, ni bares ale kariimet ni me ka
kuesan ale ni kerak barimawasan mu
nunga moa parusuwur se nunumi tagimon ale nagumonko.
2 Tama bur marir karogo nama menaso iwita, ni nunga karo parusuwurko;
agi buruk ko welang pakongoso se
karuwusan se palenga nama menaso iwita,
kariimet memek mu ni kema te mena namamonko.
3 Bare kariimet ningo diram mu
nongomang kua kaparuk se Kaem koma te amilmilamonko;
nuna ninguru amilmilamonko.
4 Ana Kaem ko nup patawura ko wur ilunak ale nup patawunakko.
Nup patawuralko. Nu taiti nuwi awote daiga ale namara ko Kaem.
Nu koma te amilmilaralko. Noko nup mu Yawe.
5 Kaem nu ko kuwim laili te bagoso,
ale kuriang nonet nunam kuera mu nunga bitarso,
ale imet nugari kuera mu nunga sinar taso.
6 Nu kariimet nungumik gue suan mena
mu nunga sangarso se launuria gue suan gema gilingisan.
Se kariimet talipara ningi mu nunga giso ale amilmil nungarso.
Bare nusupuling lagara ko kariimet mu
sor garagara kiriyam memek mu ningi baga gilingisan.
7 O Kaem, ni girakala nika kariimet nunga
giem, ale ni girem ale sor maraka merang mu te nongorak aolak iluwem.
8 Tom mu te ni tairem mu tuwik biya
kaparam ale wanara biya tala kaparam se ali yukuam,
mu awuk, ni duruk Sinai ko Kaem, se Israel ko Kaem.
9 Ni tuwik biya beterem se kaparam se nika kariimet yu nungarem,
ale nika ali magaram mu aking na yu welang tuem.
10 Nika kariimet ali mu te kuwim taman ale dagiman;
se nika gemang motam ningo mu te kariimet nungumik mel mena mu nunga bituem.
11 Kari Biya den bo balu paogam,
se imet motam biya giman karogo nama iwita balman:
12 “King arika nunga kager kari memek mu nongorak melmasak warman ale nagu sapaman o!
Se Israel kari gi karogo nama nunga sasal kawam ningi imet nungarman,
se gi parusuwu nunumi tuman o!
13 Bare nina kari am baga se sipsip por
ningi mu nunga bitaruwaman mu karogotala kowo!
Inangnang dora, luman silver te nunga se mone gold te nunga, se mel ningo ningo mu gialko.”
14 Nunguningta, Kaem Sokel Garagar
king alo mu nunga moram parusuwuram se parasaman,
ale taiti nuwi duruk Zalmon ira kaluwuso iwitata sor ereman.
15 O Duruk Bashan, ni duruk sokel garagar,
nika motongar se kuamuru kuting suen biya,* Duruk Bashan mu Jacob ko laun Esau ko sor te duruk bo.
16 ni anape ko duruk Zion, Kaem te
daigok ale pempem te bagarukko atumukiram, wore ko gemang maga lagoso?
Yawe kota umu te tom suen biya baga se lagarukko balam.
17 Ikiko! Kaem ko kager ko mel aora aora
suen biya nunguningkiri, am kaura koma mena.
Kari Biya laili nunguningkiri Duruk Sinai beteram ale tai ko kuwim laili umu te bagoso.
18 O Yawe, ni talipara kari suen biya nunga giem,
ale nongorak nup biya taukko nama tarigirem;† Ephesians 4:8 ago arikko.
se kariimet munan ago tai kisukasan;
nusupuling lagara ko kariimet alo mu agotala munan ago tai kisukasan.
Se nunguningta nunguningkiri, ni Kaem Yawe ka kuwim laili umu te bagasam.
19 Ana Kari Biya nup patawunakko,
nu kota suanta anananga Bataguru Tata ko Kaem;
nu tom pempem la anananga ikup giso.
20 Nu Yawe, anananga Sangaru Tata ko Kaem,
kuera mateng ko lage memek te nanga bataguru taso.
21 Nunguningta, Kaem kager kari memek
nunga nusupuling ita pakakumurokko;
mu awuk, nuna kiwem memek pempem bita lagasan.
22 Kari Biya iwita balam, “Ani Duruk
Bashan ko kager kari memek mu nongorak tai kaparikko;
ale kager kari gagi du biya nukum te
bagamon ta wore nongorak tai bausekko;
23 asele nina mu nunga maguwural ale nunga gue awote aolak iluwalko;
se ninga kausik mu nunga gue namonko.”
24 O Kaem, aninga King, ani kariimet
mugum karogo numi kowom kaoram ale nika nip biya patawumonko
nika temple ningi kapawasan owore nungarkiwasam.
25 Wur iluwa ko kariimet mu giriman se
bawe mora ko kariimet mu nubiring ko;
se galawalang sokelel sisuwura ko
kuriang itiwik mu kusumuri aolak iluwasan.
26 Nuna aisan ale balsan, “Kaem ko kariimet biya, ko nup patawuralko!
Nina Israel ko kariimet, nina Yawe ko nup patawuralko!”
27 Benjamin, kari mom kopa, mu ko gue mu giriman;
se Judah ko kari supuling bibiya mu
Benjamin ko mu nogowom karowasan;
asele Zebulun se Naphtali ko kari
supuling bibiya mu atumukira taiwasan.
28 O Kaem, nika sokel aora garagar mu wetang saparko;
nika sokel girakala nanga kausem iwitata, aking nanga kasuruko.
29 Nika temple mu Jerusalem aniso,
buta se king suen biya nunga munan karogo tai kisimonko.
30 Egypt mu mel diwang memek aora bo yu lom ningi bagoso wore iwita;
se deleng te irako.
Sor saki mu nu bowa ningi buffalo diwang bibiya iwita bagasan,
se sor saki gotektek mu buffalo gotektek iwitatala bagasan,
mu ni suen la nunga nosokel menawurko.
Se mel diwang mu silver mel karogo tai kisokko;
se sor saki gotektek kager ko la kuesan mu nunga karo parusuwur se nagu parasamonko.
31 Sor Egypt mu barowara karu karu
nunga mel ningo ningo bronze te nunga mu karogo tai kisimonko;
Ethiopia kariimet mu nguanga nguanga
nuguting karogo tai kisimonko.
32 Nina ali sor suen la ko kariimet, Kaem ko wur iluwalko;
Kari Biya ko nup patawura ko wur iluwalko.
33 Ikialko. Kaem sokel karogo mu pure nia kam aiso,
nu taiti girakala la nungam se aniso wore te aolak iluso.
34 Nina Kaem ko sokel aora biya owore ko balu paogalko;
nu Israel ko king nikim garagar,
se ko sokel biya mu ana taiti gomang te arigisan.
35 O Kaem, ni am duap bo nunguningkiri,
nika laili kuwim te bagasam.
Ni ana Israel nanga Kaem, se ni sokel ana nangarsam.
Ana Kaem ko nup patawunakko!