78
Ana kariimet nanga nasupuling lagara, Kaem ko kiwem ningo
(Asaph wur imi batogam)
1 O aga kariimet, nina aninga den ikialko;
nedegawa ninguru gurugal ale den ani balikko ewere ikialko.
2 Ani mel girakala aratukaso wore sang balik se ikial ale te sinar palagalko;
ale mel saki nengete yumura wore ninguru ko ikialko.
3 Girakala anananga girigir alo ko nanga manorman,
se nadogowa ikiam se ko ikiman.
4 Ana den umu kuriang nongoma te me kaluwunakko;
kuriang gue udagi mu nunga manornak
ale Kaem ko sokel aora garagar
se ko kiwem bibiya duap duap mu me kaluwunakko.
5 Kaem ko munan den Israel kariimet nungaram,
nu Jacob ko kuriang imas munan den imi karo tumonko nungaram.
Nu girakala anananga nanangatak alo iwita nunga maonam,
“Nina aninga munan den imi ninguru
ninga kuriang imas nunga kausalko,” mam.
6 Uwuta mu kuriang gue maingte
aratamon mu, nuna karogo tala ko
ikimon ale aking nunga kuriang gue
te mu nunga kasurmonko.
7 Nuna uwuta betemon mu asele,
kuriang luan udagi mu Kaem ko nongomang ningi nunguning aruk,
se nuna nu mel bibiya nungam mu me ta ko nungamili saparuk,
se ko munan den kasik la mu karo tumonko.
8 Nuna nunga taleng girigir alo nusupuling lagakaso iwita me bagamonko.
Taleng girigir alo mu noko den sawarukasan
ale noko nongomang ningi me nunguning akaso,
se ko den me karo tuikasan.
9 Ephraim digo mu gatu mare karogo,
bare kager barasam mu nuna nagu sapaman.
10 Kaem den nongorak kaolam mu me karo tuman,
ale ko munan den mu karo tumonko nongomang me anikaso.* 1 Samuel 4:10-11.
11 Nuna munan bibiya nu beteram mu ko nungamili saparam,
ale kiwem bibiya nongoma te beteram mu karogo ko nungamili saparam.
12 Nu garuk nomotam te kiwem bibiya duap duap bitakaso;
kiwem mu ali sor Egypt se kuwim Zoan mu te bitakaso.† Zoan mu Egypt sor te. Numbers 13:22 arikko.
13 Kaem gagi pagaru ilagala awuram,
duruk iwita koma singsang awuram,
ale Israel nongorak kusumuri tairam.
14 Kowarkalal mu taiti nuwi ningi baga se taiti nuwi iwita girikaso;
ale tirom mu tama nikim iwita kanikaso ale girikaso.
15 Nu sor maraka garagarayam te manga pakakumukaso
se yu kapakaso se nokasan ale yu ko me tukunangakasan.
16 Nu nungam se yu gotek bo manga ningi bausam,
ale yu biya bo iwita naguram koropong kaoram ale kaparam.‡ Exodus 13:21; 14:21-22; Numbers 20:11.
17 Bare nuna Kaem Kalel Biya mu koma te memek tawun biya bitakasan;
nuna sor maraka te baga se nusupuling lagakaso.§ Exodus 15:24; 17:2; Numbers 11:4; 21:5.
18 Nuna ko iki se wore Kaem ira ariga te bitakasan;
nuna na ko kuakasan ale na nungarukko sail te ko balukasan.
19 Nuna Kaem ilak barimakasan ale
balukasan, “Kaem pa sor maraka
iwita te inang suen biya nangarukko terong agi?” makasan.
20 “Nu manga moram se yu biya aratam.
Bare aitak awuk? Nu inang daro ko yaman ago mu nangarukko terong?”
21 Se tom Yawe umu ikiam mu gomang magaram,
se tama beteram se Jacob ko kariimet nongote tai kaparam,* Numbers 11:1.
ale gomang magara tawun biya Israel ko magaram.
22 Nuna munan mu Kaem kote bitakasan,
mu awuk, nuna noko nongomang ningi me nunguning akaso se nu me nunga sangukko iwita ikikasan.
23 Bare nu umu ko iki se wore taiti gomang sail ago maonam ale
taiti gomang ko songkuring kaogam.
24 Ale inang manna mu tuwik iwita beteram se namonko kaparam;
nu duruk wonong ko inang imi namonko nungaram.† Exodus 16:4.
25 Se imi mu engel nunga inang wore nuna naman;
nu inang suen biya nungaram se naman.
26 Se udagi aking balam se koma worem bausa mu te marir barasam,
ale ko sokel aora biya mu te balam se yar daula barasam.
27 Ale inangnang beteram se tuwik
muguri iwita kaparam ale kupkup iwita ali bala tuam,
mu inangnang suen biya nunguningkiri
saun muguri iwita kapaman.‡ Numbers 11:31.
28 Te kuwim taman ale bagakasan mu te nu inangnang waram se kaparam
ale sasal suen la duap te sor magaram.
29 Se kariimet ninguru naman ale
nungumik karogo terong ma saparam;
mel ko kueman mu Kaem nungaram.
30 Bare inang mu yam aitak nowaman,
inang nuguring ningi yam aniram se,
31 Kaem gomang magaram se nunga kari
kulak sokel ago mu nunga moram se kueman,
mu kari umu Israel ko kari ningo ningo.§ Numbers 11:33.
32 Kaem kiwem bibiya duap duap nungurukaso ta wore,
kariimet nongomang ningi me nunguning akaso, se memek yam bitawakasan.
33 Buta se nu am motam la
nungarkiwakaso se nuna nguangara ago aolak ilukasan,
ale ko ningo nuam bo me arigiman, am nama kua namakasan.
34 Tom Kaem sang nunga moakaso se kuakasan,
asele sang nongomang gurugukasan ale kote pila taikasan ale sail karogo kote guranek bitakasan.
35 Aitak nungamin ares mam se ko ikiman,
Kaem mu nononga Manga Gek am,
Kaem Kalel Biya mu nunga Saonga Kari.
36 Bare mu kawelakasan, nuguring guang
la balukasan, ale kawel te nungamili gurugu patawukasan.
37 Nuna nongomang motam ningi nunguning te me karo tuikasan,
ale den nongorak kaolam mu diram la me karo tuman.
38 Bare Kaem ko noman bataga nononga
ko wore te se, nunga memek siwukaso ale me nunga maguwukaso.
Tom suen biya noko gomang magara mu
am irakaso se kapakaso, se me nunga maguwukaso.
39 Nu ikikaso mu nuna ali ewere ko
kariimet; nuna marir taiso ale nama
mena namoso iwita, tom tukunangta baga mena namamonko.
40 Nuna sor merang mu te baga se tom suen biya nusupuling lagakaso;
se sor garagarayam mu te baga se gomang motam maguwukasan.
41 Nuna Kaem ira ariga ko munan mu me ta bita to arikasan,
ale Israel ko Kaem Laili mu gomang maguwukasan.
42 Nuna noko sokel aora garagar mu ko nungamin me ta ares makaso,
se tom nu kari memek nuguting te nunga
bataguru tam mu ko nungamili saparam tala.
43 Nu Egypt sor mu te kiwem bibiya duap duap beteram,
ale Zoan sor ningi kausa beteram mu ko nungamin me ares makaso.
44 Nu sor umu te nunga yu gurugam se gue ko aram,
se kariimet umu nunga yu namonko me terong.
45 Nu kuwuling beteram se nunga nokaso,
se gorogoro beteram se nunga daiga bagara maguwukaso.
46 Nu yes memek se usiska kurumurum
beteram, se nunga ningam ningi tam gawa suen la no sapaman.
47 Nu tuwik muguri bibiya mu beteram se
tai kaparam ale nunga tam waen se nunga tam fig maguwu saparam.
48 Nu tuwik biya bo, muguri bibiya, wore
beteram se kaparam se nunga bulmakau kua sapaman;
pure nikim te nunga sipsip anapeya maguwu saparam se kueman tala.
49 Nu ninguru gomang magaram se ninguru nunga maguwuram;
se ko gomang memek mu kuera mateng
ko engel alo kariimet nunga maguwu kam, nunga maguwuram.
50 Nu nogo ko gomang magaram se me nongorak kolaram, mena;
nu kuera biya bo beteram se tai kaparam
se karogo ngual ngual kueman.
51 Nu Egypt nunga kuriang gira bilangara mu nunga moram se kua sapaman;
kuriang kari, kari ko gue kuagi, Ham ko gue te, mu nunga maguwuram.* Egypt sor mu Noah ko namar Ham ko gue te arataman: Genesis 10:1,6.
52 Bare nu ko kariimet mu sipsip iwita nunga giam,
ale sor garagarayam mu te lage nunga kausam.
53 Nu nunga giam ale nunga bitaru se
nongorak namakaso se me nguangakasan;
bare nunga kager kari memek mu gagi biya tairam ale nunga ira kaluwuram.
54 Nu nunga giam nongorak tai kota ko duruk laili mu te aratam,
sor duruk ali mu nu kota ko sail te bataguru tam.
55 Nu kariimet iwareng giriman ale ali umu te bagaman mu nunga kaoram,
ale ali mu pakakumu Israel kariimet nungaram;
ale digo digo te kuwim nungaram se te dagiman.
56 Bare Israel kariimet aking Kaem Kalel
Biya mu ira ariga te bitakasan ale ilak nusupuling lagakaso;
nuna ko munan den me karo tuikasan.
57 Nuna kiwem girakala nunga taleng girigir alo bitakasan iwitatala,
nuna nusupuling lagakaso se Kaem kuring kulukurukasan;
mare pateweteng se tagira mu me diram namaruk iwita bitakasan.
58 Nuna kaem kawel nunga tama betera kuwim kalokasan,
se Kaem gomang ninguru magakaso;
ale nunga kaem kawel umu te Kaem gomang motam maguwukasan.
59 Kaem nunga kiwem ewere arigam mu nu gomang ninguru magaram,
se buring lilim la gurugu ko kariimet Israel nungaram.
60 Ale ko sasal Shiloh mu betela buring tuam,
noko sasal mu kariimet nunga wonong kusumuri anikaso wore beteram.
61 Ale yam kager kari memek
nungarkiwaram se noko Kunup Laili mu gi ago nama gilingiman;
Kunup umu noko nup biya se ko nikim nunga kasurukaso.† Joshua 18:1; 1 Samuel 4:3,11.
62 Nu ko kariimet nogo ko gomang
magaram se kager kari memek am
nungarkiwaram se ko kariimet nunga moman se kua gilingiman.
63 Nunga kari kulak mu tama nunga lakumu saparam,
se nunga kuriang itiwik mu kari kulak bo nongorak namonko mu mena.
64 Nunga priest arika mu kager kari
memek nunga moman se kua sapaman,
se nunga imet mu nungumik ma niara mena.
65 Asele Kari Biya kari bo aniwa barasa iwita barasam,
ale kari yu nana ale alis ago aira iwitata airam.
66 Ale kager kari memek nongorak
kageraram ale nunga kaoram ale nongorak peleram;
nu ninguru tala nunga maguwuram se
dolaman ale udagi me kagermonko.
67 Nu Joseph ko gue te ko kariimet mu
nunga sarumu due ko nunga awuram,
ale Ephraim ko gue te mu me nunga atumukiram tala.
68 Bare nu Judah ko gue te ko kariimet mu nunga atumukiram, se
duruk Zion mu noko gomang motam.
69 Se noko kawam digo laili mu duruk umutang te kaolam,
se ali nu nungam se aora biya aniso iwitatala aora biya aniso.
70 Kaem ko ura kari David atumukiram.
71 Nu sipsip nunga bitaruwaram se Kaem aru tam ale
nu ko kariimet Israel nunga bitua kari ko bagarukko beteram.
72 Se David noko ura mu gomang
ninguru tuam, ale kariimet ninguru nunga bitarukaso.
*78:10: 1 Samuel 4:10-11.
†78:12: Zoan mu Egypt sor te. Numbers 13:22 arikko.
‡78:16: Exodus 13:21; 14:21-22; Numbers 20:11.
§78:17: Exodus 15:24; 17:2; Numbers 11:4; 21:5.
*78:21: Numbers 11:1.
†78:24: Exodus 16:4.
‡78:27: Numbers 11:31.
§78:31: Numbers 11:33.
*78:51: Egypt sor mu Noah ko namar Ham ko gue te arataman: Genesis 10:1,6.
†78:61: Joshua 18:1; 1 Samuel 4:3,11.