144
Kaem ko kiwem mu am ningo la
(David ko wur)
1 Ani Yawe nup patawurikko, nu aninga Manga Aora;
nu ani kager ko munan aga kasurso,
ale kager biya ningi namarikko aga nungurso burangoso.
2 Nu aninga kua aisa ko Kaem, se aninga manga gek am;
nu aninga Sangam, se nu tala aninga Bataguru Tata Kari;
nu aninga karem, ani nu kararasam.
Nu sor saki ko kariimet arungu tai ani abowa tuguso.
3 O Yawe, ana ali kariimet mu, anape mel nunguningkiri se
ni ninguru nanga sinar to lagasam?
Ana ali kariimet yam ko gue, wore ni ninguru gemang nangaru lagasam.
4 Ana ali kariimet mu marir pus maso ale mena namoso iwita;
anananga marak bagara ko tom mu
tamarum iwita, tom tukunangta baga mena namoso iwitatala.
5 O Yawe, ni taiti gomang kaguru ale tai
kaparko; duruk nunga kau to se tama bur barasukko.
6 Pure nikim bitar se kaparuk se kager kari memek nunga parusuwurko;
nika gatu mare te nunga karo se nagumonko.
7 Kualala kiting garuku se tai kaparuk se
aninga bataguru to ale aga sangaruko;
yu lom bibiya ewere ningi se,
sor iwareng ko kariimet nuguting te aga bataguru toko.
8 Nononga nuguring mu den kawel ago terong mam,
se nunga nungamili mu guruga patawura karogo tala.
9 O Kaem, ani wur bo iru ilu kisekko;
ani aga gita kolarik ale wur ilu kisekko.
10 Ni king nunga sangorsam se nuna kager te marirasan ko Kaem;
se ani nika ura kari David, baenat kore
memek wore ningi aga bataguru taem.
11 Buta se sor iwareng ko kari nuguting te aga bataguru to ale aga sangaruko!
Nononga nuguring mu den kawel ago terong mam,
se nunga nungamili mu guruga patawura karogo tala.
12 Nanga sangaru se anananga kuriang
kari nunga kulak te la mu, tam bisek ali
welang te aragoso iwita aragamonko;
se nanga nanawusari mu, king ko kawam
biya ko ngatalek bibiya kiwol karogo aora biya iwita bagamonko.
13 Nanga ningam mu inang duap duap karogo terong ma saparukko;
se nanga sipsip mu kuriang ninguru
ilumon se kaparuk ale ninguru sor to saparukko;
14 se nanga bulmakau mu, suen la kuriang
nutagu ningi karogo yukuwa sapamonko.
Se udagi kager memek por kuluka ale utu nagura mu menaruk,
se nanga talipara ale sor iwareng te
nangarak namara mu bo ago me aniruk,
se wonong tuagu ningi yaman ko niara kikira mu mena namarukko.
15 Kariimet marak uwuta nungumik te kaposo mu amilmilamonko;
kariimet awiriya Yawe mu nononga Kaem, mu amilmilamonko.