147
Kaem Jerusalem bitarso wore ko amilmil wur
1 Yawe ko nup patawunakko!
Anananga Kaem wur te nup patawura mu kiwem ningo,
noko nup patawura ko kiwem mu yawarakala se diram!
2 Yawe akingtala Jerusalem kuwim kuwim te kaloso;
nu Israel ko kariimet parasaman sor saki
te bagakasan wore nunga gi bolala nunga awuso.
3 Nu kariimet nongomang motam parasaram mu nongomang taso,
ale nunga lot gawir kalo nungurso.
4 Nu baras suen la nunga iki saposo,
ale suan suan nunup awu awu karogo namaram.
5 Anananga Kari Biya nup biya, se sokel garagar;
noko ikia sinar mu kumik ko tom batoga bo mena.
6 Yawe mu kariimet nunumi ago kapasan mu nunga tagi patawuso,
bare kariimet memek bitawara mu
nongorak kapa ali ago nunga beteso.
7 Yawe wur amilmil ilu tualko;
bawe te yagowom gurugu anananga Kaem tualko.
8 Nu taiti nuwi beteso se arataso ale taiti gomang kaluwuso;
nu tuwik ali lilim tuso se sirsir duruk motongar te aragoso.
9 Nu bulmakau na nungarso,
ale inangnang ko gotek na ko niasan mu na nungarso.
10 Horse ko sokel mu tamatama, bare
umu Kaem gomang motam amilmil me tuso.
Turan te, kari nuar sokel tamatama mu
ko, Kaem gomang motam me barasoso tala, mena.
11 Bare kariimet noko nguanga se,
noko kua nangara ko munan
nongomang tui se kote loaga lagasan,
mu nu ninguru nunga amilmiloso.
12 O Jerusalem, ni Yawe nup patawurko;
O Zion, nika Kaem nup patawurko.
13 Mu awuk, nu nika sor kuring sokel tuso,
ale nika kariimet nika ningi bagasan, mu marak sokel nungarso.
14 Nu nika ali ko tom bitarso se terong aniso,
se inang ningo nuam kisiso se ni karogo terong masam.
15 Noko den balso se tairate ali imi te tai kaposo ale nunguning kaposo.
16 Nu tama bur beteso se sor ereso,
ale sor ninguru ipiso ale birigira ningi taiso, se ali awote sirar ma saposo.
17 Nu tuwik muguri bibiya manga
karakarang iwita mu warso se kaposo.
Se awiri tuwik ipi birigira karogo kaposo mu te bagarukko terong?
18 Aking nu balso se yu ipiram ale auram mu palenga yu ko namoso;
nu noko marir guruguso patawuso se yu palengoso ale naguso.
19 Nu noko munan den mu Israel nungaram,
noko kiti guruga ko den se noko karo tuata ko den mu ko kariimet umutang nungaram.
20 Bare nu munan imi sor bo ta nongote me bita arigam, mena;
nuna noko munan den me ko ikisan.
Yawe ko nup patawunakko!