PSALMS.
10.
O Yawe, ni awuk se bagara suwuta? Kariimet ikup arigisan bare awuk se ni me kasagasam? 
Kariimet memek alo nunumi patawusan, ale nunga ikia memek mu dagarok iwita nungursan ale kariimet kituwura guat te ilusan. 
Nuna nunga ikia memek mu ko nunumi patawusan ale nunga sikisaki kawel te mel gemasan mu nunga atumu sangorsan; bare nuna Yawe nubiring tusan. 
Nuna nunga nusupuling lagara te Kaem mel yam ko betesan, ale nongota nunga ikia nongomang karo tusan. 
Nuna mel suen biya betesan mu terong la aratu saposo, se kualala biya namasan ale nika munan nubiring tusan, ale nunga kager kari mu nunga nusuwik sapasan. 
Ale nongomang ningi la balsan, “Ana sokel ago bagasan; bo me ta nanga bita maguwurokko,” masan. 
Nononga nuguring mu bala memek se kawel karogo terong mam; nguangara ko den nungamili kopa te aniso. 
Nuna wonong duap te yumusan ale loaga guruguwa, kariimet yam am ngual nunga ilusan ale nunga mosan se kuesan. 
Ale lion iwita yumusan ale kariimet nongota nunumi sangarmonko me terong wore nunga loaga guruguwa, nunga ilusan ale nunga guratasan nongorak namasan. 
Se kariimet mu memek biya arigisan ale maga namasan; kiwem mu te kariimet moa nobowa tugusan, 
ale balsan, “Kaem koma motam kaluwuram ale mel imi me ari ko ikiokko,” masan. 
O Yawe, bares ale kasager lulumerko! O Kaem, kariimet ikup ningi bagasan ewere nunga sangaruko! 
Nuna awuk se ni Kaem mel yam ko ka betesan? Ale balsan, “Nu ananangate mel bo me bitirukko pa!” masan. 
Bare O Kaem, ni kariimet umu nunga ikup yaman ko niara mu arigem ale koma bitarko; kariimet nungumik saonga mena mu nikate la loaga lagasan, mu awuk, ni kariimet nungumik nokotam mena mu nunga sangorsam. 
Ni kariimet memek mu nunga nosokel menawurko! Ale nunga kiwem yumura nunguning umu ko koma ikup yaman ninguru ninguru nungaruko! 
Yawe, ni King ko butata pempem baga lagasam; se kariimet ni mel yam ko ka betesan mu nika ali te mena namamonko. 
O Yawe, ani ko ikisam, ni kariimet memek ningi baga se kete niasan aisan mu ni nuguring ilup ale nongomang motam sokel tuiko. 
Ale ni kuriang marmar se kariimet kituwura guat mu nunga sangaru se ali ko kariimet memek mu udagi me nunga nguangamonko.