PSALMS.
32.
(David ko wur) Awiriya ko munan memek Kaem buring tuam ale ko memek siwu saparam mu amilmilarukko. 
Awiriya gomang ningi nunguning te ko memek wetang te balu saparam se Yawe siwu tuam mu amilmilarukko. 
Tom aninga memek ira kaluwukasam mu ani tirom woremkalal yaman karogo niara kikira te angimik sokel menakaso. 
Mu awuk, tirom woremkalal nika kiting ko ikup aga moakaso, se worem sirsir kaiso se marakaso iwitata, angimik sokel maraka saparam. 
Bare ani ari ko ikiem ale aga memek wetang te ni Yawe kema te balu saperem, se ni aga ikup memek mu suen la siwu saperem. 
Buta se awiriya ni karo kisu lagoso mu noko ikup kam ningi pasak ala nikate airukko; se tom yu lom biya lairuk tarigiruk, mu nu te memek bo me taukko. 
Ni aninga yumura kuwim; ni ikup kam ningi aga bitarsam ale aga sangaru tasam, ale sangaru ta ko wur amilmil angamang ningi betesam. 
Yawe iwita balam: Ani ka kiti gurugek ale lage te namarko mu ka kausekko; ani de ilu se, ni aninga amotam te la bagerko. 
Ni horse se donkey, ikia mena se mayang te diram nusumulak kalosan ale nunga tagisan, uwuta me bagerko. 
Kariimet memek mu ikup yaman tamonko; bare awiriya Yawe kote ikia gomang bita lagoso, mu nu pempem gomang nungarso ale nunga sinar taso. 
Se nina kariimet diram alo, mu Yawe ko amilmilaralko; nina noko kuring karo tusan, mu wur iluwal ale amilmil kelagalko!