PSALMS.
58.
(David ko wur) Nina supuling alo, nina kiwem diram la te den arigisan ale tutesan? Nina nunguningta kusumuri ko baga se kariimet nunga ikup tutesan? 
Mena! Nenenga ikia mu munan memek beteralko wore la nengemang te aniso, se nina kariimet suen la nunga maguwuwasan. 
Kariimet memek alo mu nunga bilangara tom te la lage ningo bita taman; nuna nunam tuagu ningi la den kawel ago terong maman. 
Nononga nodogawa mu, kausik daong daongarukko se kotam kuring me ikiso iwita, se nononga den mu kausik ko kore wuli karogo iwita; 
se kariimet bo ta ikia duap duap te nunga lila awurokko me terong, nuna node sisi saparam. 
O Yawe, ni nuguring ningi nogore kulukumur ale nunga norogen sail biagerko! 
Nunga menawur se yu palengoso nama maraka namoso iwita maraka namamonko; ale nunga gatu mare iwita nunga kulukumu waruko. 
Nuna tanan worem nunga kaiso se pasak ala kua namasan iwita, kua maraka namamonko; nuna kuriang gugum motam worem me ariga la kua namara iwita, kua namamonko. 
Kaem kani tama kuamili awote me karso la, nu kariimet memek mu garuk te, se kulak te, pasak ala nunga sarumu warukko. 
Kariimet memek bitawara mu nunga memek koma tamon se kariimet ningo diram mu nungarkamon ale amilmilamonko; kariimet memek mu nunga gue kaparuk se kariimet ningo mu awote aolak ilumonko. 
Asele kariimet balmon, “Nunguningta, Kaem kariimet ningo diram mu koma ningo nungarso; Kaem nunguningta baga se munan diram te ali lilim la tuteso.”