PSALMS.
106.
Ana Yawe nup patawunakko! Nanga Biya amilmil tunakko, mu awuk, nu Kaem ningo; noko kua nangara ko munan mu kumik menara mena. 
Yawe kiwem bibiya beteram mu awiri ko balu saparukko terong? agi awiri noko nup biya mu lilim la wetang saparukko terong? 
Kariimet kiwem ningo diram mu ko munan ilukuawusan, ale sinar la karo tui lagasan, mu amilmilamonko. 
O Yawe, tom ni ka ningo mu ka kariimet nunga kasuruko mu, ani ago ko kamili me saparukko; ni nunga sangaru toko tom te mu, ani agotala aga sangaru toko. 
Ni uwuta aga bitar mu, ani awiriya ni nunga atumukirem mu nunga daiga bagara ningo mu ningi agotala bagarikko; ale ka sor ko balem mu nunga amilmil ningi karogo baga se, nika kariimet keta ka ma balem, mu nongorak nika nip patawurikko. 
Ana girakala nanga nanangatak alo memek bitakasan iwitatala, ana memek beteman; ana munan memek ninguru tala beteman ale kiwem memek duap duap bitakasan. 
Anananga taleng girigir alo Egypt bagakasan mu nuna ni kiwem bibiya duap duap bitakasam mu arikasan, bare me ko ikia tokasan; nuna nika kiwem yawara yawara mu nunga kasurukasam bare mu agotala me ko sinarakasan; ale nongorak tai gagi biya ko nup Red Sea masan mu te mu aking nubiring gurugu kisiman ale kerak barimakasan. 
Bare Yawe kota ko nup biya ningo anirukko se nu nunga saongam, ale noko sokel aora garagar mu nunga kausam ale wetang saparam. 
Nu gagi mu sokel ago maonam se marakam, se sor merang wore te iwita nongorak koma sang te kasu kaparam. 
Noko kariimet nunga bita maguwuwakasan mu nunga bataguru tam, se memek me arigiman. 
Bare kager kari memek mu gagi peleram nunga ira kaluwuram se kua sapaman; bo ta me marak bagaram. 
Asele nuna noko den nongorak kaolam mu ko nongomang ningi nunguning aram, se wur te nup patawukasan. 
Bare tom me maiyam se mel bibiya nu beteram mu aking ko nungamili saparam, se nu kuring te den tamonko me kimi beteman, bare nunga ikia te la mel bitakasan. 
Ale sor garagarayam mu te na inang ningo nuam wore namonko ninguru nongomang anikaso se nu ira ariga te beteman. 
Se mel nuna ko kueman mu nu nungaram, bare udagi te aking kuera memek bo te nunga maguwuram. 
Sor garagarayam mu te sasal sapaman ale bolala baga se, noko sinar kari Moses se Aaron, nu kota noko ura kari ko nunga balu beteram, mu nunga iki maguwuman. 
Dathan Abiram ilak nunga memek ko koma, ali kuring kaigam se nunga kariimet sang ago arungak kapa naguman se nunga iram. 
Ale tama bo pagam ale kariimet nogowom karowara mu nunga kani saparam. 
Nuna Duruk Horeb te bulmakau gotek ko dora nungurman ale perr tuikasan; 
Kaem Nikim Ago mu nubiring tuman ale bulmakau sirsir nowara mu ko dora kuar te kisiman ale nup patawukasan. 
Kaem borta munan bibiya Egypt sor te beteram, ale kiwem duap duap Red Sea te wetang saparam ale nunga sangaru tam, bare am ko ikia bo me ta taman. 
Buta se nu gomang magaram se balam, noko kariimet nunga maguwurokko mam; bare Moses, kota ko ura kari sinar mu, ilak wosenga kira lagaram se aking ko ikia gurugam. 
Se tai ali welang karogo nu balu nungaram mu te pingia se mu, den balam mu te me sanamaman, ale ali mu am biriruwukasan. 
Nuna noko kuring me karo tuikasan, ale nunga sasal ningi baga se nu kumik ko nging ngung kitikituk makasan. 
Buta se nu den bo ikup nuam nungaram ale balam, “Nina sor garagarayam sumutang te baga kua paranga namaral, 
se ninga kuriang gue suen la mu nunga parusuwurik se sor saki saki te namamon ale bagamonko!” 
Bare nuna aking sor Peor mu ko kaem kawel Baal bowa naguman; ale tama bita kaem kawel nodora mena mu nungaru se, nuna na inang mu karogotala nokasan. 
Nuna nunga kiwem memek umu te Yawe gomang maguwuman, se nu kuera ikes memek bo beteram se nungumik te kaparam. 
Bare Phinehas barasam ale kariimet awiriya memek beteman mu nunga moram se kueman, asele kuera memek umu menaram. 
Se kiwem ningo beteram mu te nu kari ningo diram ko balman, se kariimet gue gue te pempem la ko iki se lagamonko. 
Israel alo tai yu Meribah duap te baga se mu, aking Yawe ko gomang motam yaman tuman, se ko ikup mu Moses giam. 
Nuna kiwem memek umu beteman se Moses gomang motam ninguru magaram se gomang memek te alis ago ining nungaram. 
Se nuna aking Yawe kuring kulukurman ale nu kariimet nunga momon se kuemonko balam mu nuna uwuta me beteman. 
Bare aking nuna nongorak nunumi giman, ale nunga kiwem memek karo tuikasan. 
Nuna sor mu arungak nunga kaem kawel mu nunup patawukasan, ale kiwem memek mu ko talipara ningi kapaman. 
Nuna nunga kuriang imet se kuriang kari mu nunga ilu talipi kaem kawel alo mu tama bita nungarukasan. 
Nunga kuriang nungumik den mena mu nunga moakasan se kuakasan se tama bita Canaan nunga kaem kawel umu nungarukasan; se kuriang umu nunga gue kaparam mu te ali sor lilim la ikup giam. 
Nuna Kaem kota suanta ilak bagara mena, kaem kawel nobowa nagukasan, ale kiwem umu te memek tagi nongota nungumik te beteman. 
Buta se Yawe noko kariimet nunga gomang magaram se me ta nunga kuakaso, ale buring gurugu nungaram. 
Ale nunga giam ale sor saki nongorak kagerawara umu nuguting te nunga awuram se nunga nobowa ningi bagakasan. 
Se ninguru nunga ereman nongorak kapaman ale mel yam ko nunga bitakasan. 
Kari Biya nu tom suen biya nunga sangaru tokaso, bare nuna nongota nu ilak dun kopa ilukasan, ale nunga memek umu te eng am memek biya arigiman. 
Bare nuna ikup ningi baga se nukote ai niakasan, mu nu nuguring ikikaso ale nunga gomang batagakaso. 
Nu ko den nongorak kaolam mu ko kuamin ares mam se noko kua nungara mu te gomang lila nungaram. 
Nuna sor saki nobowa ningi memek bagaman mu nu sor umu nongomang motam gurugam se noko kariimet aking nongomang lila nungarukasan. 
O Yawe, anananga Kaem, nanga sangaruko. Sor saki saki nobowa ningi bagasan imi nanga gi ale nanga wonong duap te nanga bolala awur se ana amilmil kisinak ale ka nip laili mu patawunakko. 
Ana Yawe nup patawunakko, nu ana Israel nanga Kaem; nu kumik menara mena, pempem butata bagoso. Buta se kariimet suen la nigiring bolala beteral ale “Nunguningta!” malko. Aleluya!