PSALMS.
136.
Ana Yawe amilmil tunakko, mu awuk, nu ningo nunguningkiri. 
Ana Kaem amilmil tunakko, mu awuk, nu kaem kawel suen la nunga kiaram ale nu la Biya. 
Ana Kari Biya amilmil tunakko, mu awuk, nu kari bibiya suen la nunga kiaram ale nu la Kari Biya. 
Yawe amilmil tunakko. Nu kota kiwem bibiya duap duap beteso. 
Noko ikia te la taiti lilim beteram se aratam. 
Nu ali yu guang awote murakoyam muru beteram. 
Nu nikim ko melmasak bibiya nunga beteram. 
Worem mu woremkalal nikim tuokko. 
Sige se baras mu tirom nikim tumonko. 
Yawe amilmil tunakko. Nu Egypt kariimet nunga kuriang gira bilangara mu nunga moram se kua sapaman. 
Nu Egypt alo nunga ningi Israel kariimet nunga giam ale nongorak aratam. 
Noko kuting sokel aora biya mu te nunga giam. 
Nu gagi biya Red Sea bataguru ilagala awuram. 
Ale ko kariimet arungu moke sang te namaram. 
Bare Pharaoh ko kager kari karogo mu gagi nunga moa mituwuram. 
Yawe amilmil tunakko. Nu ko kariimet nunga giam ale nu giri giri nongorak sor merang garagarayam mu ningi aolak ilukaso. 
Nu sor saki ko king sokel garagar mu nunga iram se kapaman. 
Nu king nunup bibiya nunga moram se kueman. 
Sor Amor nunga king Sihon. 
Se sor Bashan nunga king Og, mu nunga moram se kueman. 
Nu nunga ali sor mu bataguru noko kariimet Israel nungaram. 
Se ali umu eng am nungara nunguning ko kariimet nungaram. 
Yawe amilmil tunakko. Nu ana ikup memek biya ningi kapaman bare nago ko gomang batagam. 
Nu kager kari memek alo nuguting te nanga bataguru tam. 
Nu kariimet se mel suen la inang nungarso. 
Buta se, ana tom suen biya anananga Kaem duruk wonong te bagoso mu amilmil tui se laganakko. Noko kua nangara mu kumik menara mena. Nunguningta.