PROVERBS.
29.
Kari ko memek kasuru lagasan bare am dogowa sisi lagoso mu, kam me maiyuk se memek kumik nungera mena mu arigokko. 
Tom kariimet ningo diram kuwim gi gi namasan, mu amilmil biya kaposo; bare tom kari memek alo nama sanamasan, mu niara kikira biya sor ereso. 
Kari ikia sinar ko kua lagoso mu nuet amilmil tuso; bare awiriya lage luan imet nongorak nagu aratu lagoso, mu ko manga mel suen biya waru saposo. 
King diram la betera ko munan te sor bitarso se gek am aora la aniso; bare king kariimet nongote manga gira agowom la gi lagoso, mu sor parusuwuso maguwuso. 
Munan memek betera ko kari gomang kuluka ko den mu, dagarok memek kira bita kam. 
Memek betera ko kari mu ko memek umu dagarok iwita taliposo; bare kari ningo diram wur iluwok ale amilmilarukko. 
Kari ningo diram mu, diram ningo la kariimet kituwura nungumik te betera mu ko sail tagi lagoso; bare kari memek mu uwuta me beteso. 
Ikia sinar suwik sapara ko kari alo mu kariimet ngual nungarsan se wonong tuagu ningi kager pagoso; bare kari sinar alo mu nongomang memek ko munan biriruwu gilingisan. 
Kari sinar bo munak te kari ngualara mu ilak aratukko, bare kari ngualara mu gomang magaruk se sail sail te baluk ale bala umu te ningo bo me aratukko. 
Kari nuguting gue ago mu, kari munan diram la bita lagoso mu me ta ko kuesan ale nunga momon se kuemonko lage kupusan. 
Kari ngualara mu ko gomang magara mu tama iwita pagoso; bare kari ikia sinar ago mu ko gomang magara mu ninguru kiti guruguso. 
Kari dom biya pempem la den kawel ko dogowa gurugu lagoso, mu ko supuling alo nu bowa ningi mu kari memek ko aratu sapamonko. 
Kari kituwura ta se kari nu bita maguwuso mu ta, nuna wete mu Yawe nomotam nungaram ale marak nungaram. 
King bo kariimet suen la ningo la nunga beteso uwutatala kariimet kituwura nunga beteso, mu nu kam maiya biya king ko lagarukko. 
Kuriang ko memek te kausa ko bu mu ikia sinar kuriang tuso; bare kuriang katir me due iluwa mu nuam gomang ikup tuso. 
Tom kari memek kuwim gi gi namasan, mu kiwem memek karogo la sokel taso; bare tairate kariimet ningo diram mu nomotam te dagulu namamonko. 
Ka namar kiti gurugu se noko kiwem mu gemang lila kisokko; nu gemang motam amilmil tuokko. 
Tom prophet alo nunga nuguring te ko den bo me arataso, mu kariimet am ngual kasik namasan; bare awiriya Yawe ko den karo tuso mu amilmilarukko. 
Ni ka ura kari due toko kiring te la me manaruko; nu nika den ikiok, bare me karo tuokko; bu tua mu nu sangukko. 
Kari ngualara ma balsan mu saonga taukko lage katir karogo. Bare ikiko! Ngual kasik munakara ko kari munakoso mu saonga taukko lage bo mena. 
Kari dom bo ko ura kari gotektir la mel kasik biya te kuring la karo tui lagoso, mu munan umu te maguwuram se maingte gomang bataga tuokko. 
Kari ko gomang motam magara tairate mu, memek suen biya beteso, ale ining singi tagi kariimet ningi beteso. 
Nanimi patawura ko munan te nup memek tasan; bare nanimi karogo kapara ko munan te nup ningo tasan. 
Tere kari ilak nimi gi se atumu sangaru, mu ni keta nimi maguwusam; mu awuk, den te ka betemon bare ni ninguru duap saguwurko. 
Ali imi ko kari ko nguangara mu dagarok iwita ka taliposo; bare awiriya Yawe te la ira sanami lagoso, mu terong la lagoso. 
Kariimet suen biya mu nunga supuling nongomang motam tamonko karogo kaeya lagasan; bare ninguru ikinakko, Yawe kota suanta kote diram la tutera ko munan taiso. 
Ningo diram la betera ko kariimet mu memek betera ko kariimet mu ninguru nunga biriruwusan; uwutatala, memek betera ko kariimet mu ningo diram la betera ko kariimet mu ninguru nunga biriruwusan tala.