HEBREWS.
1.
Girakala mu Kaem tom suen biya te se lage suen biya te, prophet alo nuguring te, anananga taleng girigir alo nongorak munakakaso. 
Bare aitak tom nukum aram taiso imi te mu, nu ko Namar te nangarak munakaram ale am munakawoso. Kaem nu te ali mel suen la nungam, ale nu la melmasak suen la umu kotam awurok ale bituokko balam. 
Noko Namar umu noko koma motam kumik lilim to kuliram nunguningkiri, ale nuet ko nikim biya wore wetang saparam. Ale melmasak suen la mu noko den sokel aora biya mu te ilukuawuram se sokel ago la aniso. Nu anananga memek siwurokko kueram, ale aitak mu Kaem Sokel Karogo mu ko kuting sengam mu te duruk wonong te dagiwoso. 
Nu nup biya nunguningkiri, engel alo nunga nunup mu kia saparam mu aitak tam ale, nu nunga kia saparam ale nup biya kualala biya bagoso. 
Se engel alo nunga ningi engel awuk wore Kaem ko balam ale mam: “Ni mu aninga Namar; se aitak mu ani nika Niet”? Agi mam: “Aitak mu ani noko Nuet, se nu mu aitak aninga Namar”? 
Ale aking Kaem ko Namar suanta mu bitiruk se ali imi te tai kaparukko mu nu mam, “Kaem ko engel alo suen la nubugura kulukurmon ale nup biya tumonko.” 
Bare nu ko engel alo nunga mu iwita balam: “Nu ko ura kari engel alo mu marir iwita nunga beteso se taisan, tama kuamili iwita tai kapasan.” 
Bare noko Namar ko mu iwita balam: “O Kaem, nika king ko bagara mu pempem la butata bagerko, se munan ningo diram mu nika king ko tam iwita, nika kingdom te bitaruko. 
Ni munan ningo diram mu kua tuem ale, munan memek mu biring tuem; bore te se, ani Kaem, nika Kaem, mu amilmil oil sipiling te warem, ale ka saki alo nunga ningi ni kualala biya ka beterem se bagasam.” 
Ale nu akingtala iwita balam: “O Kari Biya, duap te nunguningkiri girakala biya, ni ali imi ko nukuri yager beterem, se taiti gomang kualala mu nika kiting kiwol. 
Melmasak suen la umu mena namamonko, bare ni mu butata baga se lagerko; melmasak suen la umu guang iwita nama gigira amonko. 
Ni guang maiya bo moa patungursan iwita nunga moa patunguruko; guang iwita to sapar ale iru kuwim te bitarko. Bare ni mu koma suanta uwutata pempem baga se lagerko, ni kimik ka menara ko tom mena.” 
Se Kaem engel alo awuk wore bo maonam ale mam: “Ni kuwim nup ago agiting sengam mu te bager se ani kari memek nunga menawu siwik duap ningi nunga awurekko”? 
Se engel alo suen la mu noko ura kari la, nu kariimet nunga sangaru taukko balam se bagasan wore nunga ningi ura betemonko nunga beteso se namasan.