Genesis - Karena.
2.
Ma nanare God mara ma dobu ma anataputapuna au orana i vitupui.
 God ana nola i vorovei ma mara au vi-seven-na i vilauvitau. 
Ana nola i vikwai ma lamna aubaina God wei marana vi-seven-na i viaiaini ma i vovivirei.
Wei lamna mara ma dobu ana virarautua. Menanare Bada God mara ma dobu i vitupui. 
Ma Bada God doa pokauna i vaia ma oroto i voai ma lavutu lawalawaina au giaganana i uveni ma oroto i lawana.
Ma Bada God peipei Eden i paewi au maramatanei ma kampa orotona i vivitupuia i terei da i mae. 
Ma Bada God ai inanana aiaina ma uana amna aiaina anatapui i paewi ma peipei au pouna ai vinevinei ruaḡa i gogo. Ai tagogi uana lamna lawana tauvereina ma ai ḡelauna uana lamna nota rava ina verei da metauna aiaina ma metauna apoapoena. 
Ma Bada God oroto au peipei Eden i terei da ita nolei ma ita paini. 
Ma Bada God riwa bagibaginei i riwei i pa, “Ai uana anatapui au peipei am ḡoanei ma ani. 
Wate a viviḡaem da nota aiaii ma nota apoapoei aina uana eḡa ma ani! Mepa da u ani, tam nai au marana ma iraḡe!”
 Bada God i riwa i pa, “Oroto ainelana e mamae ma lamna eḡa ita ai. Ana tauagu ana kauei da ina voagui.”
Ma Bada God doa pokauna i vaia ma ḡamoḡamo anatapui ma kiu anatapui i kauei. Ma taui i neiai oroto awarina da ita viwavai. Ma oroto aiwai i viwavai, nanare ai wava i mae. 
Ma oroto kiu ma ḡamoḡamo maramaraḡamai ma moduei, wava i verei. Wate Adam eḡa ana tauagu ita nelaḡai da ita voagui.
Ma Bada God oroto i kauei da i matave ma maranaina i raunuavuru kaua, torotorona tagogi i votawanei ma vioa i pota-melei ana au gabu. 
Ma Bada God oroto torotoronei wavine i kauei ma wavinena i neiai oroto awarina.
Anina ma oroto i auepai ma i riwa,“Ee wei tauna! Marina gelama tau gelamiueima vioa tauvioauei,wei tauna awariu i votawanei,lamna aubaina, ana ḡorei Wavine.”
 Ma nanare i tupua ma lamna aubaina oroto, amana ma alona e vovoterei ma awana maiteni e vivitagogiei.
Oroto awana maiteni, ana kovakovai, wate eḡa ita vinimala.