Genesis - Karena.
35.
Jacob, Padan-Aramei i nememei au Bethel. God i eḡa me Jacob awarina ma i viaiaini 
ma i riwei i pa: “Tam wavam Jacob, wate marina eḡa ina ḡorei Jacob ma wavam vouna Israel.” Ma i viwavai Israel 
ma i pa: “Tau God Vivirewapana Kaukauana Ma vinatuna guratana ma ma vimaḡaimi Am epaepaia ina virava-ḡaeḡaei ma dam borui ḡaeḡaei awarimei ina tupua ma gulagulau maḡamaḡaui ina viamanei. 
Dobu, Abraham ma Isaac a verei, marina tam ana verem ma am epaepaia muriai wei dobuna ana verei.” 
Ma God i babani vorovei ma i netawanei. 
God weka Jacob awarina i babani lamna matairana Jacob gana i vimairini. Ma au tepana wine i waḡi ana pulo ma Olive monamonana i buloi. 
Weka God Jacob awarina i babani ma lamna aubaina wei gabuna i ḡorei Bethel. 
Muriai Jacob ana dam maiteni Bethel i voterei ma i vaḡai, ma taui uama i rata da au Ephrath ita ḡeta. Ma Rachel malana i vaia da ina vinatuna ma vinatuna i voiana-guratei ma ana iniviara i rata kaua. 
Ma i voivoia ma iniviara i rata ma tauvipipiavoa i riwa, “Eḡa ma rovo! Tevera orotona ḡelauna i tupua!” 
Wate Rachel iʼrairaḡe ma ana lavutu au damona ma tevera i viwavai “Ben-Oni.” Wate amana i viwavai, “Benjamin.” 
Ma Rachel i ʼraḡe ma eta e nenae au Ephrath (marina wavana Bethlehem) au ririvana i doboi. 
Ma Jacob gana i vimairini Rachel ana kokoaga au tepana da i vimataira. Matairana amadodo e mamae. 
Jacob natunatuna nelarai 12: 
Leah natunatuna: Reuben; Jacob ana natuevou Simeon, Levi, Judah, Isakar, ma Zebulun. 
Rachel natunatuna: Joseph ma Benjamin. 
Bilhah - Rachel ana taunola wavine natunatuna: Dan ma Naphtali. 
Zilpah - Leah ana taunola wavine natunatuna: Gad ma Asher. Wei lamna Jacob natunatuna anatapui au Padan-Aram i ḡuni. 
Ma Jacob i nememei amana Isaac awarina au Mamre au Kiriath-Arba; marina e ḡoreḡorei Hebron. Abraham ma Isaac wariaḡa wei dobuna i mae-gubai. 
Isaac i mae da ana madeḡa 180 
ma i magura kaua, i lavutu tawanana ma iraḡe ma amamana i votaḡoi. Natunatuna Esau ma Jacob amai i doboi.