Genesis - Karena.
42.
Ma au Canaan Jacob i nonori da au Egypt lam ma natunatuna nelarai i riwei, “Aiwaina da o mamae labalababa? 
Anina ona rautaniḡana! A nonori da lam au Egypt. Ona ḡaira kampa ma aubaita lam ona gimarai da tana lawana ma eḡa tana iraḡe.” 
Anina ma Joseph varevareina ten i ḡaira au Egypt da lam ita gimarai. 
Wate Jacob eḡa Joseph ana tevera oiena Benjamin ita paritawanei aubaina i rovo mepa da aiwai apoapoena awarina ita tupua. 
Taui rava ḡelaui maiteni i nae au Egypt da lam ita gimarai aubaina gomara ḡaeḡaena dobu Canaan maiteni i vaia. 
Joseph i vibada ḡaeḡaena au Egypt ma tauna lam i gimagimarei dobu anatapui ravai awari. Varevareina i ḡetai ma Joseph au naona i mae-ḡaira au doa ma i raudune. 
Joseph taui i ʼnanai ma maratagogi i aramanei da taui aiavoi ma i kauana-melei da apamina taui eḡa ita aramanei. Ma riwa bagibaginei i vitara-virevirei, “Taumi meiei o nei?” Taui i paribelei, “Tauai Canaanei a nei da lam ata gimarai.” 
Joseph tuatuana i ʼnanai da i aramanei, wate taui ai tevera i vinua-nainei. 
Ma ana rauboni wariaḡana i notai ma i riwei, “Taumi i paritawanemi da ai dobu ana ḡokokokara ota inanai bo.” 
Taui i paribelei, “Oo bada eḡa! Tauai am laralaraga a nei da lam ana gimarai.” 
Ma taui i babani vivira, “Nai maranaina ata tevera ana ora-viarana agu i toutouei awarita ma, eḡa tata rau-nuʼapoapoelei. Tauta ata wavu lamna kovoḡana marina ta vaivaia.” 
Reuben i paribelei, “Nai maranaina a riwemi, ‘Eḡa ata tevera ona vodadani!’ Wate taumi eḡa ota rautaniḡaneu. Marina ata tevera tarana kovoḡana ta vaivaia.” 
Joseph Egypt ponanei i bababani ma rava ḡelauna taui ai ponei i paripari-verei. Wate taui eḡa ita aramanei da Joseph ai babani i nononori.