Exodus - Oputawanana.
2.
Maranai wei kauai i tuputupua, oroto tagogi Levi ana damei ma wavine ana damei i ravaḡi, 
wavine i raumanawa ma natuna orotona i ḡuni. Ma wavine i ʼnanai da natuna inanana aiaina i tupua, ma natuna i tere-govaḡi da nawaravi tonuḡa i kwa. 
Wate eḡa tagotagogina da ita teregovaḡa-nonoei ma iriga waira modunei voavoana i vaia ma koltei gavogavo i pasi-tomeni da waira eḡa ina rui. Ma tevera au iriga i poai ma waira modui au orai i terei au waira Nile. 
Tevera tuana wavinena aueia i mae ma ana tevera i vineneḡanei da ita inanai awarina aiwai ita tupua. 
Ma Pharaoh natuna gugunina i ḡairai da ita toa. Ma ana taunola waivinei waira au adana i bababara-nae. Pharaoh natuna iriga i ʼnanai modu au orana ma ana taunola i paritawanei da irigana ita neiai. 
Maranai Pharaoh natuna iriga i votawanei ma tevera i toutou i ʼnanai, nuanuana i bolai ma i riwa, “Wei mai Hebrew natui.” 
Tevera tuana wavinena i nae ma Pharaoh natuna i vibaḡai, “Anina bo eḡa da ana nae ma tataovao Hebrewei ana baiei da tevera ina viḡuḡui ma ina ḡamoi?” 
Wavine i vianina ma i riwa, “Anina, ma nae!” Ma tevera i nae ma alo oina i taravainiai. 
Ma Pharaoh natuna wavinena i riwei, “Wei teverana ma viḡuḡui aubaiu ma ana vimaiem.” Ma wavine teverana i naiei ana au numa ma i ḡamoi. 
Ma tevera i eda ma i naiei Pharaoh natuna awarina ma tauna i vaini da natuna. Ma Pharaoh natuna i riwa, “Au waira a sinaepai.” Lamna aubaina ana viwavai Moses. 
Maranai Moses i vilaraga, ma i nae da ana rava oina ita raugenari, ma i ʼnanai menanare mai Egypt ana rava i egari da i nolanola ma i rau-iviapoapoelei, ma i ʼnanai Egyptei Hebrewei i vunuvunui. 
Moses i ʼnana viravira ma eḡa aiai ita inanai, anina ma Egyptei i viraḡeni ma au bubu i doboi. 
Ma marana i tom Moses i naeme, da ana rava ruaḡa i viḡaiḡaiawa i ʼnanai ma ḡaiawa tauvikareina i riwei, “Aiwai aubaina turam Hebrewei e raviravi?” 
Ma orotona i riwa, “Aiai i terem da ma vibadelai bo ma rauetaralai? Tam ma viraḡeniu me Egyptei u viraḡeni nanare bo?” Kampa Moses i rovo ma i riwa, “Rava boiboḡi i aramanei tau aiwai a kauei.” 
Pharaoh wei riwana i nonori ma i ḡoei da menanare Moses ina viraḡenanei, wate Moses Egypt i ruba-tawanei ma i nae au Midian ma waira dogona au adana i kiala.