Exodus - Oputawanana.
13.
Bada Moses i riwei, 
“Natuevou nelarai au Israel anatapui ona vovivirei Tau awariu. Roaroa ma ḡamoḡamo natuevoui ororotoi au Israel anatapui, Tau ḡariuei.” Moses mai Israel i riwei,  
“Bada ina ruiemi mai Canaan ai au dobu ma dobuna ina veremi, noinoimi i paripari-vainuaḡani nanare. 
Natuevoumi nelarai ma ami ḡamoḡamo natuevoui ororotoi anatapui Bada ona verei, 
Wate sipu orotona Bada ona verei ma awarina donki natuevouna ona gimara-melei, ma mepa da eḡa ona gimara-melei, lamna donkina uana ona gomui. Taumi natunatumi nelarai natuevoui ona gimara-melei. 
—Ma mara au murina, natunatumi ina vitara-viravira, ‘Aiwai aubaina wei ta kaukauei?’ Tam ma paribelei, ‘Bada urana vivirewapananei i taravaina-opunelai, panipani numanei au Egypt. 
Pharaoh orana i bagibagi ma eḡa mai Israel ita voterei da ita nae. Lamna aubaina Bada natuevou anatapui au Egypt i viraḡeni, rava ma ḡamoḡamo anatapui. Lamna aubaina tau ḡamoḡamo natuevouna Bada a vereverei ma natuevou orotona a gimagimara-melei.’ 
Wei gimara melanana lamna me mataira au uram ma au muruam e oteoteni ma wei e vivimataira da Bada urana vivirewapananei Egyptei i taravaina-opunelai.” 
Mai Israel Sukoth i voterei ma mutulua au giana au Etham i mae-gubai. 
Ma marai Bada i vinao me apau maimairina ma waguvarai Bada i vinao me tuatua araratana maimairina ma lalalainei taui i rau-etaraveni. Ma lamnei, taui marai ma waguvarai i bababara.