Joshua.
24.
Muriai Joshua dam anatapui i ḡorei da au Shekem ita vitagogiei. Maranai kampa i ḡeta Joshua, dogadogara, dam babadai ma melagai babadai i ḡoreiai da ita nae Bada au naona ita mairi. 
Joshua rava anatapui i riwei i pa, “Bada mai Israel ai God e ririwa, ‘Wariaḡa noimi Terah ma natunatuna Abraham ma Nahor waira Euphrates au baba ḡelauna i mae, ma god maḡamaḡaui i raraudunelei. 
Wate noimi Abraham nai dobunei a vaitawanei ma i naiei da Canaan doana ana tapuna a viatataiei, ma ana epaepaia a vimaḡai. Ma natuna Isaac a verei. 
—‘Tau dobu a veremi ana debagauna ma ana peipeina, doana eḡa ota nolei ma taon gaeḡaei a vereoimi, marina o maemaeni, eḡa ota voai, ma grape ma olive o amam wate eḡa, taumi ota paewi.’ 
—Lamna aubaina Bada ona voteletelei ma orami taputapunei ona vipatutu. Noinoimi god morumorui kokoitau, i raraudunelei au Egypt bo au waira Euphrates ona kwajiei au modu ma Bada ainelana ona viborumei. 
Wate mepa da Bada viborumeina o geduaiei, lamna amadodo ona vine da noinoimi ai god waira Euphrates au baba ḡelauna bo marina ravai ai au dobu o mamae mai Amori ai god ona nolei. Wate tau au numa ravai maiteni Bada ana viborumei.” 
Ma rava i paribelei, “Tauai eḡa melanai ai Bada ana voterei ma god ḡelaui ana viborumei. 
Bada ata God tauoina au Egypt i tere-opuneta noinoita maiteni maranai au Egypt ta vilaraga. Ma kaua vivirewapanai ma aniba i kauei au mataiai. Ma ai au vaḡai manamanaina i painiai dam ḡelaui au poui da wei au paratana. 
Mai Amori ma dam ḡelaui wei au dobuna i mamae wate Bada aubaiai ravai i viaḡaḡana-opunei. Lamna aubaina tauai Bada ana borumei, aubaina tauna ainelana ata God.”