Samuel Viruaina.
11.
Omra e tomtom maranaina gulagulau e opuopu ḡavia aubaina. David sorodia ai bada Joab ma Israel ana sorodia i paritawanei da mai Ammon ai sorodia ita vipupui. Ma ai taon Rabbah etanaina i matave-potai da ravai eḡa ita rui bo ita opu, David eḡa ita nae ma au Jerusalem i mae. 
Mara tagogi aubigai David i matave-vomairi ma ana au poewa vatavatarana i bababara-nae. Ma i ʼnana damana da wavine i ʼnanai i toatoa, i oḡaoḡa-melei aubaina marina ana nawaravi doriana i kwa, wavine inanana aiai kaukauana anina ma David, rava i paritawanei da ita aramanei tauna aiai. Ravana i ḡeta memei ma i pariverei i pa, “Wavine wavana Bathsheba, Eliam natuna ma Uriah Hitti ei awana.” Ma David ana taunola i paritawanei da wavinena i neiai awarina ma tauna maiteni i matave ma i nae me au numa. 
Wavinena i duama ma riwa i paritawanei David awarina i pa, “Tau a duama.” 
David riwa i paritawanei Joab awarina i pa, “Uriah Hitti ei ma paritawanei awariu.” Ma Uriah i paritawanei David awarina. 
Maranai i ḡeta David awarina ma David tauna i paridadanei, “Joab ana sorodia maiteni menanare, anina bo eḡa? Ma ḡavia menanare?” 
Ma David Uriah i riwei, “Ma nae au numa ma ma vilauvitau.” Ma Uriah gulau ana numa i opu-tawanei da i nae ma au murina David ana pulo i paritawanei Uriah ana au numa. 
Wate Uriah eḡa ita nae ana au numa, ma kampa ana au metaeta ana bada ana taunola maiteni i vimatave lana. 
Ma taui David i riwei, “Uriah eḡa ita nae au numa.” David Uriah i riwei, “Tam u vaḡavaḡai da u nei. Aiwai aubaina eḡa uta nae am au numa?” 
Uriah David i riwei i pa, “Parivainuaḡana bokisina, mai Israel ma Judah ai sorodia au numa gara e matamatave. Au bada Joab ana sorodia maiteni au wapu i rauḡaravu, wei lamna aubaina eḡa ata nae au numa da ata am ma ata uma ma awau maiteni ata matave. Lamna eḡa ana kauei, eḡateni!” 
Anina ma David Uriah i riwei, “Weka ma mae amadodo ma au maratom ana paritawana-melem.” Uriah au Jerusalem i mae da au pom ḡela. 
Ma David Uriah i rauḡorei da maiteni i am ma i viuma-buai. Wate waguvarai Uriah i opu David ana taunola awarii da ana au aravi i matave; eḡa ita nae ana au numa. 
Ma ubaubanaina David pepa i girumi ma i paritawanei Joab awarina. 
Pepa au orana i giruma i pa, “Mepa ḡavia potopotona kampa Uriah ma terei ma am sorodia ma tere-opunei da tauna ava ina mae ma ina kero ma ina iraḡe.” 
Joab Rabbah taona i vivineneḡanei da i aramanei mepa ḡavia i virewapana kaua ma kampa Uriah i terei. 
Ḡavia taonei i opui ma Joab ana sorodia maiteni i viḡavia ma David ana sorodia ḡelaui i viraḡeni. Taui Uriah oroto Hitti ei maiteni i viraḡeni. 
Ma Uriah awana riwana i vaia da awana Uriah i ʼraḡe ma i touei ma i moguei. 
Maranai i mogu-vorovei David rava i paritawanei da i neiai ana au numa da awana ḡelauna, ma tauna David natuna orotona i ḡuni. Wate David aiwai i kauei, Bada eḡa ita vinuaiaiei.