Psalm - Wela ma Pari.
95.
Ona nei! Tana wela Bada awarina. Ana nuaiaita tana wela God ata tauvilawana vivirewapana awarina. 
Tana nei au naona ma tana viegualauei ma welei tana voepaepai. 
Aubaina Bada lamna God virewapana kaukauna, ma god anatapui e inainana-ḡairei. 
Dobu anatapuna au urana, guba ḡaeḡaei doa au orana da ola ḡaeḡaei au tepai. 
Boga tauna ḡarinei, tauna i kauei ma nanare tauna uranei dobu alalana i tere-kauei. 
Ona nei ma tana raudune ma tana vimaeḡaeḡaeni, ae tututa tana tapeḡaroei taukaueta Bada awarina. 
Aubaina tauna ata God. Tauta natunatuna. Ana sipu ma e ḡamoḡamoita ana au wapu. Mepa da ponana o nonori amadodo, 
E riwei i pa “Eḡa orami ona gudui me amamami au Meribah; me au mutulua au Massah. 
Kampa amamami i ʼnanai, kauababai a kauei wate eḡa ita vitumaḡaneu, ma i raudadaniu. 
Madeḡa 40 wei kimtana awari amlou i ḡaiḡai ma a riwa, ‘Wei ravai orai i bagibagi ḡaḡa! Eḡa ita rarautaniḡaneu.’ 
Ana mejiu a parivainuaḡani, ‘Gabu a vokaukauei ami lauvitau aubaina wate kampa eḡa melanai ona rui.”