Isaiah.
5.
Ona rautaniḡana ma au nuavainana ana wela ana ravi. Au nuavainana ana grape wapuna i paewi, doa au maumaurana, ola au barana. 
I auni ma ḡaima i viopuni ma i gari ma grape ḡoroḡorovai aiaii, avavai, i paewi. Violaḡa numana i voai ma nanare wine anigudana i bori au kira. Anina ma i vipaipai da grape uena aiaii ita verei, Wate grape anatapui i viḡora. 
Marina taumi Mai Jerusalem ma Mai Judah, Tau ma au grape wapuna ona babiniei! 
Aiwai ḡelauna eḡa ata kauei au wapu? Anatapuna a kauana-paiei! A notai da grape uena aiaii ita vereu wate viviḡorai i vereu. 
Marina ana riwem, wenanare ana kauei au wapu awarina. Garina ana viairikarikai da ḡamoḡamo ina rui Ma wapuna ina ḡara-viravirai. 
Ana voterei da modu ura gogoi ina vinelana ma eḡa aiai grape ina taraḡadaḡadari bo modu ina tuparaguragui. Modu ma donadona, wapuna ina puru-pai. Apau ana egari da eḡa kampa garewa ina atuna. 
Bada Vivirewapana Kaukauana ana grape wapuna lamna, Israel ma grape ḡoroḡorovana ae tuḡuna e rerereḡi lamna ana dam mai Judah, I notanotai da lawana aiaina ita maeni wate i ʼnanai da tara i vitoini; kaua jijimanina ita nelaḡai wate viḡaiḡaiawa gararai i nonori.