Ezekiel.
2.
Bada ana boruma a inanai ma au doa a peu. Ma a nonori pona i riweu, i pa, “Rava ota natuna, ma vomairi ma awarim ana babani.” 
I bababani ma God aruana au orau i rui ma i voepaiu ma a nonori awariu i bababani. 
I riwa, “Rava ota natuna, a pariparitawanem dam paripariviravirai mai Israel awarii. Amamai maiteni eḡa ita voteleteleu ma awariu i pariviravira da marina. 
Rava paripariviravirai ma orai badobadoi ma eḡa ita vivivireu. A pariparitawanem da ma riwei, ‘Wei Bada riwana.’ 
Taui paripariviravirai ma ina rautaniḡanem bo eḡa lamna avena, wate ina aramanei da peroveta i ḡetai awarii.”