Jonah.
2.
Jonah iana au manawana ma i raupari Bada, ana God awarina. 
I pa, “Au nuabola au orana a tou Bada awarina, ma i paribeleu. Irairaḡei, ai au dobu ma agu a gararei ma au tou u nonori. 
Au gabinou u tawana ḡaireu, boga au gabaura dewadewana. Boga i kwaviviroiu. Rabamam ḡaeḡaei i viaimonumonui. 
Oo Bada! A notai da tau u tereopuneu, ma a notai da eḡa melanai am tempol vivireina ana inana-melei.” 
“Boga i puruiu lavutui i tupo ma aragoma kolau i pani. 
A monu ḡaira ola au kare dewadewana, a vipanipani nai au dobuna, dobuna metaetana guduguduna maemaena. Wate tam Bada au God, u vilawaniu. Lawalawaiu gabinouei u sinaepaiu, 
Malana a vaia au lawana i opuopu, ma Bada a raupari awarim, am au tempol, ma u nonoriu. 
Taui kokoitau labalababa e viviborumei, am nuavaina mamae-nonoana i geduaiei. 
Wate tau ana welem, ana voepaepaim ma au pulo ana apui awarim. Au parivainuaḡa awarim ana kauei lawana maemae nonoana Badei e nenei.” 
Ma Bada iana i egari da Jonah i medana-tawanei au gera.