Act.
16.
Paul i nae au Derbi da au Listara, kampa tauvotaḡotaḡo i mae wavana Timothy. Tauna alona Jew ei ma kerisiana, Wate amana Jentail. 
Ekalesia au Listara ma Ikoniam Timothy i voepaepana-kauei. 
Paul i ḡoei da tauna ita taravaini ana au vaḡai, lamna aubaina ini bori i verei aubaina mai Jew kampa i aramanei da tauna amana Jentail. 
Maranai taon nununai i nenaeni, ma ekalesia kampa i paripari-verei Apasol ma babada au Jerusalem ai nota, ma i riwei da tarawatu i ririwei ina votaḡotaḡoi. 
Ma ekalesia ai vitumaḡana i vovai-virewapanai ma tauvitumaḡana voui i ruirui marana patapatai. 
Arua Vivivireina Paul ana rava maiteni i viḡaei da eḡa Bada riwana ita jimei au Eisia provins, ma Pirijia ma Galatia paratana i naeni. 
Maranai i nei Maisia ana au provins ma i ḡoei da ita damana au Bithinia provins. Wate Iesu Aruana eḡa ita vianinei. 
Ma Maisia i verautuini da i nae au Troas. 
Waguvaraina Paul ana au inana i ʼnanai oroto Macedoniei i maimairi ma i vivibaḡai i pa, “Ma damanai au Masedonia da ma voaguiai!” 
Paul ana rauboni au murina tauai a vioga da laḡilaḡina ana vomairi Masedonia provins aubaina. Tauai a vitumaḡana da God i ḡorelai da Riwana Aiaina kampa ana jimei. 
Au Troas tauai amkuka, a viaruana damana au Samotreis bonabonana a ḡeta ma au pom ḡela a kuka-nae au Neapolis. 
Ma kampa da a babara nae au Philipai taon au Masedonia provins, weka mai Rome ai sorodia ai bareki ḡaeḡaena i mae, kampa a veraumae. 
Ma au Sabate taon a opu-tawanei ma a nae au waira, a notanotai da kampa boru gabuna wate eḡa. A kiala ma waivine ruaḡa ota kampa i rauriei awari a babani. 
Taurautaniḡana tagogi lamna Jentail wavinena wavana Lidia ma ana dobu Thaiataira. Tauna gara lebalebarina maiana ḡaeḡaena taugimareina ma God i vitumaḡanei, ma God orana i votawanei da aiwai Paul i bababaniei i rautaniḡanana kauei. 
Maranai wavine ana numa ravai i babataito ma i rauḡorelai i pa, “Ona nei au numa mepa da o notanotai da tau kerisiana ririwa kauana.” Ma i egariai da ana au numa a mae. 
Mara tagogi a nenae boru au gabuna ma taunola guguini a nebelei, Tauna au orana arua apoapoena i mae ma lamnei aiwai amapo da ina tupua i vivieḡai. Ma mane ḡaeḡaena i kaukauei ana taniwaga aubaina. 
Tauna Paul ma tauai i votaḡotaḡoiai ma i garagarara “Wei nelarai God ḡeḡetelarana ana taunola! E vivinolanola menanare God e vivilawananei.” 
Wei kauana i kauei au pom biaḡa da Paul i viamlo-ḡaiḡaini da i mae-tavirei ma arua apoapoena i riwei, “Iesu Keriso wavanei a egaegarim da wavine ma opu-tawanei!” Maratagogi arua apoapoena wavine i opu-tawanei. 
Maranai taunola guguini ana taniwaga i aramanei da ai mane etanaina i vine-boai, taui Paul ma Sailas i vojijini ma i taina naiei au deba Gabemani awarii. 
Taui i nei ai taurauetara awarina ma i riwa, “Wei nelarai mai Jew wei dobuna ravai e vivinuaraḡaraḡai. 
Taui ata rava kaua ḡelaui e viviararamani ma wei ata giu e teretereḡairei.” 
Ma patara i rui Paul ma Sailas vunuai aubaina. Ma gabemani Paul ma Sailas, ai gara i sikai ma wipiei i kwapui. 
I vunu-kauei ma i tawana-ruiei au panipani numana. Ma numana badana i egari da ita paina-kauei da eḡa ita ruba. 
Anina ma Panipani badana taui i tawana-ruiei, panipani numana au orana ma aei, ai vivitainei au orana i raḡita-jijini. 
Nubautuvai Paul ma Sailas i raraupari ma i welawela God awarina ma panipani ḡelaui i rarautaniḡana. 
Nanare ma lolo ḡaeḡaeotana dobuna i gui. Ma maratagogi pani numana metaetana i wana-tawatawanei ma panipani anatapui ai sein i dabarara. 
Pani numana badana i vomairi ma ita inanai da metaeta wanatawanana ma i notai da panipani i ruba ma lamna aubaina ana sod i lavui da ita viraḡena-melei. 
Wate Paul i garara, “Eḡa ma vunu-melem! Tauai anatapuai weka!” 
Pani numana badana ana taunola i ḡorei da lalalaina ita neiai ma i ruba-rui ma ana sisisina i mae-peu Paul ma Sailas au naoi. 
Ma i opunei au doa ma i paridadanei, “Babada aiwai ana kauei da ana lawana?” 
Taui i paribelei, “Bada Iesu Keriso ma vitumaḡanei ma ma lawana, am numa ravai maiteni.” 
Ma God riwana i raugugulei tauna ma ana numa ravai awari. 
Nai maranaina avena da waguvarai, pani numana badana Paul ma Sailas i naiei ma keroi i oḡai, Ma maratagogi tauna, ana numa ravai maiteni i babataito. 
Paul ma Sailas i ḡaiei ana au numa da i viambagibagi. Tauna ana numa ravai maiteni i vinuaiai kaua da marina God i vitumaḡanei. 
Ma marana i tom ma tauetara ana taunola i paritawanei pani numana badana awarina ma i egari i pa, “Nelara ma voterei da ina nae.” 
Pani numana badana Paul i riwei, “Taurauetara i egariu da ana voteremi da ona nae. Marina ana nuaubami ona nae.” 
Wate Paul, taurauetara i riwei, “Tauai eḡa ita rauetarelai ma i vunu-kauelai patara au matai. Ma avena da tauai mai Rome, wate marina i ḡoei da govagovaḡanei ina paritawanelai bo? Eḡateni kaua! Ona voterei da taurauetara ina nei weka da ina naielai.” 
Taui wei babanina i naiana-melei da babada i riwei ma taui i rovo kaukaua maranai riwana i nonori da Paul ma Sailas lamna mai Rome. 
Ma i nei au pani numana ma i riwa, “Tauai a kauana-boai, ai ḡoʼapoapoe ona nota-tawanei.” Ma i tere-opunei ma i vibaḡa-guratei da dobuna ita oputawanei. 
Ma Paul ma Sailas pani numana i opu-tawanei ma i nae Lidia ana au numa ma kampa kerisiana maiteni i viboruboru ma i vovai-virewapani. Anina ma taui dobuna i netawanei.