Act.
18.
Paul Athens i netawanei ma i nae au Corinth. 
Kampa Akwila tauna Jew au Pontus i tupua, marinaota au Italy da i nei awana Prisila maiteni. Aubaina Rome ai gulau Claudius mai Jew anatapui i viaḡaḡei da Rome i opu-tawanei. Paul i nae da taui ita inanai. 
Paul taui maiteni i mae, taui tauampopo, (ḡamoḡamo opina ma gara i popopoi numa aubaina ma i gimagimarei) me Paul ai nola tagogina. 
Sabate patapatana au pari numana tauna mai Jew ma Jentail awari i jima guratana da orai ita sinavirai. 
Maranai Sailas ma Timothy au Masedonia da i ḡetai, Marina Paul Bada riwana ava i raugugulei mai Jew awarii da Iesu tauna anina God ana Vinevine Keriso. 
Wate mai Jew Paul i viḡaviei ma riwa apoapoenei i ririwei. Ma tauna ana gara i rauabuabui ma awari i riwa, “Mepa da o kwako, lamna ona viwavu-melemi, eḡa tau ona viwavuiu! Marina da e nenae, ana nae Jentail awari.” 
Ma taui i voterei ma i nae Jentail wavana Titus Justus ana au numa i mae, tauna God tauviborumeina ma ana numa pari numana au ḡereḡerena. 
Crispus, pari numana ai bada, Bada i vitumaḡanei ana numa ravai maiteni, ma mai Corinth maḡamaḡaui Paul i rautaniḡanei, i vitumaḡana ma i babataito. 
Waguvara tagogi Bada Paul ana au inana i babani i pa, “Eḡa ma rovo, ma babani ma eḡa ma genuana.” 
Aubaina Tau tam maiteni. Ma rava eḡa ina rau-iviapoapoelem aubaina au tauvotaḡotaḡo i maḡa wei au dobuna. 
Ma Paul kampa i mae madeḡa tagogi ma nawaravi six, ma God riwana i jimei. 
Wate maranai Galio i vi-Gavena au Akaia provins, mai Jew kampa i vitagogiei ma Paul i vojijini ma i naei Gavena awarina da ita rauetarei. 
Ma taui i viwavui ʼpa, “Wei orotona ana moruei rava orai e taitaini da God e viviborumei ma ata tarawatu e viviaigai.” 
Ma Paul gamona i laḡi da ita babani ma Galio i babani mai Jew awari i pa, “Mepa da taumi wei ravana o viviwavui da kaua ḡaeḡaei bo kaua apoapoe aubaina, lamna tau au nola da ata rau-taniḡanemi. 
Wate wei taumi ami babani ami wava ma ami tarawatu, ana voterei au urami. Tau eḡa wei kauai ana rauetarei.” 
Ma etara numanei i viaḡaḡana-opunei. 
Taui anatapui pari numana ai bada Sothenis i vojijini ma i vunui etara numana au naona wate Galio taui i ʼnana-tawanei. 
Paul i mae mara aburuna tauvitumaḡana maiteni au Corinth ma wagei i nae au ḡereḡere au Cenkirei waga ai au animae. Prisila ma Akwila maiteni. Ma kampa Paul ana parivainuaḡana aubaina aparana i ḡari, ma anatapui i nae au Syria 
Taui au Ephesus i ḡeta ma Paul, Prisila ma Akwila i voterei. Ma i nae au boru numana Mai Jew awari i jima. 
Rava i vibaḡai da ita mae mara aburuna wate tauna eḡa ita vianina. 
Wate maranai i opu da ita nae ma taui i riwei, “Ana nememei mepa da God ana ḡoana, ma Ephesus i netawanei ma wagei i damana.” 
Maranai i ḡeta au Caesarea ma i nae au Jerusalem da kerisiana i raugenari ma i nae au Antiok. 
Au Antiok i mae mara aburuna ma Galatia provins ma Pirijia provins i naeni ma kerisiana i vovai-virewapani. 
Wei marana Apolos tauna Jew, au Alexandria da Egypt da i nei au Ephesus. Tauna Bada riwana ma ana giruma i aramana-kauei ma rava bababanina. 
Rava ḡelaui, Apolos Bada ana etanai babanina, i viararamani, ma ana tepatorana i jima ma Iesu ana kaua ma ana lawana i viararamana-kauei. Wate tauna John Taubabataito ana babataito babani ava i aramanei. 
Ma i vikarei da ana tepatorana i raugugula au boru-numana. Wate maranai Prisila ma Akwila tauna ana babani i nonori. Ma i ḡorei da maiteni i nae ai au numa ma Bada ana etanai ana babani i viaramana-kauei. 
Maranai Apolos i nenae au Akaia, kerisiana Apolos i vovai-virewapani. Ma kerisiana au Akaia ai pepa i giruma da ita pariverei da tauna ita nebelei. Maranai au Akaia i ḡeta ma taui God ana aguei i vivitumaḡana, agu ḡaeḡaena i verei. 
Tauna ana babaniei au deba mai Jew i vovaiubai. Ma God riwana i vaia ma lamnei rava i viararamani da Iesu anina Keriso.