Act.
22.
“Amamau ma varevareiu, ona rautaniḡaneu ma ana viatataiemi da tau eḡa aiwai ata kauana-boai.” 
Maranai patarana Paul i nonori da taui ai ponei i bababani, taui i genuana ma i rautaniḡana. 
I riwa: Tau Jew ei, Tarsus au Silisia provins a tupua wate weka au Jerusalem a rata ma a giruma. Amamata ai tarawatu a girumei ma au tauviararamana Gamaliel. A ḡoana-guratei da God ata voepaepa-kauei me taumi anatapumi nanare. 
Tau Iesu ana etanai tauvotaḡotaḡoina a rau-iviapoapoelei da ḡelaui iʼraḡe. Nelara ma waivine a pani ma au numa panipani a tawana-ruiei. 
Pirisi ḡeḡetelarana ana boru ḡeḡetelarana maiteni i aramanei da tau a ririwa kaua. Taui ai vianina pepana i vereu da ai rava au Damaskas ata verei ma a nae au Damaskas da kerisiana ata pani ma a neiai da kovoḡa ita vaia weka au Jerusalem. 
Aubenai Damaskas a tuḡereḡerei ma maratagogi lalaina gamrina ḡaeḡaena marei i ḡairai da i tunuiai. 
A peu au doa ma pona a nonori i pa, “Saul! Saul! Aiwai aubaina e rarau-iviapoapoeleu?” 
Tau a paribelei, “Bada tam aiai?” Tauna i paribelei, “Iesu Nasaretei e rarau-iviapoapoelei.” 
Rava maiteni a nenae lalalaina i ʼnanai wate babani eḡa ita nonori. 
A paridadana a pa, “Bada Aiwai ana kauei?” Ma Tauna i riwa i pa, “Ma vomairi ma nae au Damaskas. Kampa rava am nola ina pariverem.” 
Lalalaina gamrina i rata guratana ma matau i kamoi da eḡa ata inainana. Ma tauvigwanigwaniana au urai i voa ma i naieu au Damaskas. 
Oroto wavana Ananias kampa i mae tauna God i voepaepai ma ana tarawatu i vovojijina-nonoei. Mai Jew tauna i vivirana-kauei. 
I nei da au ririvau i mairi ma i riwa, “Vareiu Saul ma inana me!” Nai marana a inana me. 
Anina ma i riwa, “Amamata ai God i rautanim, da ana ḡoana ma aramanei, ana Taunola Jijimanina - matamei ma inanai, ma riwana taniḡamei ma nonori. 
Aiwai u inainanai ma u nononori ma vimatematei rava anatapui awarii. 
Marina aiwai e paipaini! Tauai ana babataitoim ma Bada awarina ma raupari da am ḡoʼapoapoei ina oḡa-tawanei.” 
Anina ma a nae au Jerusalem. Au Tempol a raraupari ma matauei kaua a inanai. 
A inanai Bada awariu i bababani i pa, “Rava weka am jima tau aubaiu eḡa nonorana ita ḡoeḡoei. Laḡilaḡina Jerusalem ma opu-tawanei.” 
Wate tau a paribelei, “Bada wei ravai i aramanei da pari numai a nepai da kerisiana a vunui ma a pani-naiei. 
Ma maranai am peroveta Stephen tarana i toi, tau kampa a maimairi ma ana iraḡe a vianinei ma ḡaima tautawanai ai gara a paipaini.” 
Ma Bada i riweu, “Ma nae a paripari-tawanem aueia Jentail awarii.” 
Patarana Paul i rarautaniḡanei ma maranai wei babanina i kauei taui i meji guratana ma i vigaragararei i pa, “Ona viraḡena-tawanei, eḡa ina mae!” 
Taui i vigaragararei, ai kwama i kwajikwajiei ma pokau i tawatawanei awarina. 
Ma sorodia ai bada sorodia i egari da Paul i naiei ai au bareki. Ma i riwei da Paul ita wipi da ita vieḡa aiwai aubaina ana rava amloi i ḡaiḡai ma awarina i garagarara. 
Ma urana ruaḡa i terepai au aidamo ma i raḡiraḡini da ita wipi ma Paul sorodia ai bada i riwei i pa, “Tau Rome-ei, Eḡa ota etareu ma o vunuvunu-labalababaiu. Lamna menanare?” 
Maranai sorodia ai bada wei i nonori ma i nae da ai bada ḡaeḡaena i pariverei. Ma tauna i vitara-virevirei i pa, “Aiwai e kaukauei? Wei ravana Rome-ei!” 
Sorodia ai bada i nae Paul awarina ma i paridadanei, “Ma riweu! Riwa kaua da tam Rome-ei bo?” Ma Paul i paribelei, “Ee, lamna riwa kaua!” 
Sorodia ai bada Paul i riwei, “Tau mane ḡaeḡaena Rome gabemanina a verei da a vimai Rome.” Paul tauna i riwei, “Tau a tupua da Rome-ei.” 
Sorodia i ḡoei da Paul ita etarei wate maratagogi ita ḡori-melei. Ai bada ita ḡori ma i rovo-kaukaua maranai i aramanei da i kauana-boai da Paul, Rome-ei seinei i pani. 
Au maratomna sorodia ai bada i ḡoei da ita aramana-kauei mai Jew ai viwavu aiwai Paul awarina. Ma lamna aubaina Paul ana seini i votawatawanei ma i opunei boru ḡetelarana au naona i vimairini.