1 Niiy kaꞌathamana yaꞌ yaarkaman God.antam niiy puth woyan way wak-wakana, 2 aꞌ niiy puth oony way piꞌan anan ngeey-ngeeyan nunang aꞌ monkan-wak-wakan nunang. Nilaniya moom piꞌan iiy-iiyan oony wiy al-alantan, aꞌ in-inman tham nilan maꞌ nungantang piꞌ-piꞌan thanang than God.an keꞌaman ngeey-ngeeyantan nunanga. 3 Ngamp keenkan yimanangan way tham iiy-iiyamp keꞌ than anangan. Ngamp keenkan ngamp-ngamparakam anman ngaantam-ngeey-ngeeyamp aꞌ woyan ngamparakam anman wak-wakamp, keꞌ moom ngamparakaman iiy-iiyamp. Aꞌ in thampa: ngamp wayan ngaantam-ngeeyamp-a, yaa, an ngamp yumpampa. Way al-alangan ngampang ngangk mungkana way yumpanakan. Nil God.an ngangk kul piꞌiy ngampar wayan iiy-iiyanamp, puth yaꞌa, kul keꞌ piꞌan ngampar.

4 Nil puth God.anganiya, kan-kanam ngangk mam ngampang, nilan kaangk maꞌ-aath-aathow ngampang nil puth kaangk wunan ngampar, kan-kanam paththama. 5 Nil kaangk min iiyow ngampar, kaaꞌ-piichanathow ngampang. Ngamp kaꞌathaman yippak woyan wayan wak-wakamp-a, nil God.anganiya anpalan kal ngampang, koyam weentath woyan Christ.antaman wakāmp. 6 In keꞌ God.angan yimanangan ekath ngampang, aꞌ kal ngampang aak nungantamak, aꞌ nyiinath ngampang Christ Jesus.antang, moom piꞌanantang puth ngampaniy pam wanch nungantaman. 7 Nil God.angan kaaꞌ-piichanath ngampang woyan way anpalan nil yipam meenathow thant pam wanchantan nil minaman iiy-iiyan ngampar, chil min yaꞌa, nil min-minam paththam iiy-iiyan ngampar. Nil Christ.an palaman wampow-a, pam wanch yotaman meeꞌmiy ngulakam iiy-iiyayn nil puth minam iiy-iiyan ngampar. Nil kaangk wunan ngampar ngamp weeꞌ-weeꞌanangan karpaman iiy-iiyanamp nungantangan. 8-9 Ngamp ngamparakaman keꞌ kaaꞌ-piichanathwimpa, yaꞌa, ngamp ulp-ulpanang keꞌ thawimpa yimanangan keꞌ ngamp minam iiy-iiyampa, anpalman God.angan kaaꞌ-piichanath ngampang. Nil puth kaangk kaaꞌ-piichanathow ngampang-a, yaa, anpalaniya nil kaaꞌ-piichanath ngampang. Nil keꞌam thaachan ngampang ngangk minangaman iiyāmp nungantan nil yipam puthangkan min iiyow ngampar yaꞌa, nil yimanaman ngangk minangam iiy-iiyan ngampara. 10 Nil God.angan yump ngampang, aꞌ nil wunp ngampang Jesus Christ.antang woyan min angan. Keenkanamana God.angan woyan minan ngaantam-ngeey aꞌ nilan kaangk ngamp woyan anan wak-wakāmpa.

11-12 Niiy Jews yaꞌ anangana, niiyang keꞌ kon-ngathow kaꞌathamaniya niiy God keꞌaman meeꞌmiy nunang yaꞌana, niiy pam wanch nungantam yaꞌan yippak, niiy thanttam Jews.antaman pok-pokkapang kiikathwun. Than wiyangan niiyang ngeen-wiy peꞌanan keꞌam umpin, yaꞌa, keꞌ-paal than Jews al-alangan waaꞌantan niiyang kompan keꞌananga. Niiy kaꞌathaman Christ.an meeꞌmiy yaꞌa, niiy ngangk keꞌam yippak theeꞌan nunganta, niiy keꞌ Jews yimanangan keꞌam iiy-iiyan, niiy puth kaꞌathaman pam wanch God.antam yaꞌan yippak. Niiy kaꞌathaman wik minan meeꞌmiy yaꞌa, wik God.an thaw thant nil kan-kanaman ngul yumpow thant. Niiyaniy keꞌam ngaantam-ngeeyana niiy ngulakaman wunin God.antangan. 13 Niiy kaꞌathangaman kech iiy-iiyan God.antam, keꞌam ngaantam-ngeeyan nunang, puth yimanangan yaꞌ-ngula, niiy puth ngangk kan theeꞌan nungant Christ.antan, aꞌ pam wanch nungantam ngul iiy-iiyaniy puth nil chaapar nungantam theetath niiyant, aꞌ nil thintham wampath niiyang God.antan. 14-16 Aꞌ nil Christ.angan ngampang yalmath Jews aꞌ Jews yaꞌ anangan — ngamp keꞌ kuunch yimanang iiy-iiyanamp. Aꞌ nil maꞌ-aathan ngampang puth ngamp ngangk minangam iiy-iiyāmp ngamparakam. Kaꞌathamana Jews aꞌ Jews yaꞌ anangan ngamp ngangk-wayangam kalwump ngamparakaman, ngamp pok-pokkap kiikathwumpa an keꞌ wall achantang than menhangan ngampar. Wik thayan Moses.antaman keꞌ wall than-than yimananga. Keenkanamana ngan Jews.ang thonakam wik thayan Moses.antaman ngeey-ngeeyan puth niiy Jews yaꞌ al-alangan keꞌam ngeey-ngeeyan, yaꞌa. Nil puth Christ.an utham ngampar-a, nil wallan yaꞌ keekath, aꞌ yaꞌ-ngul wun, ngamp yipam karpam ngul iiy-iiyāmp keꞌ kuunch yimanangan, keꞌ thonam ngul nungantang, Christ.antang. Nil karpam yalmath ngampang Jews aꞌ Jews yaꞌ anangan, aꞌ Christ.an God.ant thaaꞌ-pant thaw way ngamparaman, anpalana, ngamp ngangk minangam iiy-iiyāmp God.anta, aꞌ ngamparakam thama. 17 Nil Christ.an aak iikanakan uk, anpalana nil utham aꞌ keny koyam mat. Anpalaniya, nil Ngeen-Wiy Min God.antaman wamp ngampar, waaꞌ ngampar nil Christ.an thaaꞌ-pant thaw-thawan way ngampan yump-yumpanamp, ngamp anangan wik thayan Moses.antaman kaꞌathaman thiichamp, aꞌ puth ngamp wiy anangan wik kaꞌathaman keꞌaman thiichamp. Yaa, ngamp karpam ngangk minangam ngul iiy-iiyāmp God.antang. 18 Nil puth Ngeen-Wiy Minaniya ngangk ngamparamangan wunan ngul, aꞌ God.angan ngangk minangam ngeey-ngeeyan ngampang - Jews aꞌ Jews yaꞌ anangan, puth nil Jesus.an utham ngampar aꞌ nil karpam wampath ngampang God.antan.

19 Aꞌ ngay puth thawang niiyant Jews yaꞌ al-alantan, niiy Christians anangana, niiy keꞌ-ngul pokkapang wunān pam wanch God.antam al-alantaman niiy puth pam wanch God.antam ngul iiy-iiyaniy thampa. Christians wiy anangan-a, keꞌ kuunch niiyantam yimanangana, aꞌ aak niiyantamaniya aak God.antam ngula. 20-22 Iniya keꞌ God.angan aawuch piꞌan kaachan. Nil keenkanamana pam kuch thanang wik nungantaman kalayn wiyantan. Anpalaniya nil Jesus Christ.ang pam wiy anangan kuch wik nungantaman waaꞌayn pam wanchantan. Wik thanttamana keꞌ yuk yimanangan kaꞌathaman thanathantan aawuchan kaachantan. Nil Christ.aniya keꞌ yuk anangan aawuch pal pekkuw wuntan, nil aawuchan yipam thayan anman than-thanow, keꞌ keekiya. Ngampiya keꞌ yuk wiy anangan than karpaman than-thanathantan aawuch pal pekkuwamana. Nil God.angan ngampang keꞌ aawuch nungantakam kaach-kaachan, aꞌ Ngeen-Wiy Min nungantaman angman wun-wunan ngamparang aawuchang angman. An keꞌ God.ang yimanangan yal-yalmathan ngampang karpam Christians anangan, aꞌ karpathan ngampang nungantang Christ.antang, ngamp yipmam keꞌ aawuch thayan thanāmp aꞌ nil yipmam ngampang maꞌ-aathow keꞌ aawuch min yimanangan wun-wunāmp nungant God.antan.