4
Nil Christ.angan Karpath Ngampang Maꞌ Nungantanga
1 Niiyalang, ngay in jailang puth ngayan workan iiy-iiyang nungant Christ.antan. In ngeeyāna: nil God.angan waaꞌ niiyang pam wanch nungantamana, yaa, niiyaniya minam iiy-iiyān meeꞌ nungantangan. 2 Niiy keꞌ ulp-ulpanang iiy-iiyāna, keꞌ erkaman man kul wampow niiyanta puth niiyiya thaaꞌ mich-micham thawān thant wiyantana. Than wiy al-alangan nath ngangk way yumpiythan niiyang-a, niiyaniya, anman ngangk minangam iiy-iiyān thant. 3 Nil Ngeen-Wiy Min God.antamang kanam yalmath niiyang pam wanch God.antam yipam iiy-iiyān. Niiy ngangk min anman iiy-iiyān Christians wiy al-alantan, aꞌ anpalana niiyan karpam ngul iiy-iiyān, keꞌ yaarkathwuna. 4 Nil Christ.ana, aꞌ pam wanch nungantaman keꞌ thonam yimanangan iiy-iiyantan ngula. Aꞌ puth Ngeen-Wiy Min God.antam thonam thonaka. Ngampiya, pam wanch Christ.antama, aak thonamaka kuupāmp ngamp yipam aak God.antangan wunāmpa. Nil kanan miꞌ ngampang pam wanch nungantakaman-a, nil thaw nilan ngul kalow ngampang nungantakaman. 5 Nila moom piꞌan thonama, ngampiya ngangk kan theeꞌamp nungantakam thonakam. Than kuchek kanam kuungkin ngampangan-a, an than meenathin ngampar ngampaniya pam wanch God.antam thonakam, wiyantam yaꞌa. 6 An God thonam thonakama, nil piip thonam thonakam ngampara, Christians.antana. Nil moom piꞌan ngamparama. Nil aak thonamang keꞌam wun, nil aak umyompanam wunan, maꞌ nungantangan piꞌ-piꞌan ngampang. Aꞌ Ngeen-Wiy Min nungantamana ngangk ngamparang ngoonch.
7 Ngamp Christians yotam inangan-a, nil Christ.angan maꞌ-aath-aathan ngampang thon-thonan ngamp yipmam work iiyāmp nungant nilan theeꞌow ngampar. 8 Lat ngench thayanangan inan waaꞌ Christ.antama, wikan yimanang thawa:
“Nil Christ.an kenyan mat-a, nil pam wanch yotaman maꞌ nungantang piꞌ-piꞌan thanang,
maꞌ thayanam anman piꞌ-piꞌan thanang.
Nil keenk mat, aꞌ anpalana, nil maꞌ-aath-aathan thanang pam wanch nungantam anangan than yipmam work nungantan iiy-iiyayn aak ingana.”
9-10 Ngay wik inan koochanathāng niiyanta: nil Christ.wey kaꞌathaman keꞌ ukiy aak iikanakan-a, nil kenyana keꞌ matiy, yaꞌa. Puth Christ.an kaꞌathama pal uk aak iikanakan, aꞌ ngulaniya nil keny mat. Anpalana nil aak umyompanam wun, moom piꞌan ngamparam yotantakama. 11 Nil work theeꞌan thant pam wanch nungantamakan. Nil wiyantan work thon theeꞌan, wiy al-alantan thonangan theeꞌan. Nil miꞌ thanang pam wiy anangan aꞌ kuch thanang thaaꞌ-thayanam thawayn wik waaꞌayn God.antamana. Nil wiyaniya kuch thanang pal-puyan iiy-iiyayn wik min weꞌ-weꞌarathayn. Wiyantaniya, thaw thant aak thonamang angman wunayn aꞌ piꞌ-piꞌayn thanang pam wanch God.antam anangan, aꞌ wik min God.antam engkanang waaꞌ-waaꞌayna. 12 Nil pam inangan kuch thanang pam wanch God.antam al-alantan yipam maꞌ-aath-aathayn thanang ngangk thayanam iiyayn. Aꞌ anpalana than thamp nungant Christ.antan work iiyayn, aꞌ than thamp wiy anangan maꞌ-aathayn thanang than yipam monkan-wak-wakayn nunang Christ.ana.
13 Anpalana, ngamp ngulana karpam minam meeꞌmiy nunang Christ.an aꞌ ngangkangan piꞌ-piꞌāmp nunang. Aꞌ anpalmaniya, ngamp keꞌ Christ yimanangan iiy-iiyāmpa, nil God.angan kaangk ngampang keꞌ Christ yimanangan iiyāmp. 14 Amanamana, than pam wanch wiy al-alangan ngampang keꞌ-ngul muukamathiythan keꞌ ngamp puk manyiy yimananga yaꞌa. Than waaꞌwuntan keꞌ than wik Christ.antam waaꞌ-waaꞌantan, puth yaꞌa. Ngamp keꞌ-ngul ngaantam-ngeeyāmp wik thanttam, puth an kan-kanam yaꞌa. Ngampwey nath ngaantam-ngeeyimp wik thanttaman-a, ngamp keꞌ dinghy yimanangan yeelal piꞌanang pal-puyan theeꞌ-theeꞌan, ngamp koochanam keꞌ iiy-iiyanamp, yaꞌa. Than ngampang kaangk muukamathayn wik minan yipam wantāmpa. Puth yaꞌa, ngamp kan-kanam minam ngaantam-ngeey-ngeeyāmp wik Christ.antamana, 15 aꞌ wik waaꞌ-waaꞌāmp wiyantana. Ngamp puth kaangk wunāmp thanta aꞌ thaaꞌ mich-micham thawāmp thanta. Keꞌ Christ.an minam iiy-iiy-a, ngampan yimanang iiy-iiyāmpa. Ngamp puth woyan Christ.antam anman wak-wakāmpa. 16 Nil pam wanch nungantam thon-thon piꞌ-piꞌana, nil karpath ngampangan maꞌ nungantamanga. Nil maꞌ-aath-aathan ngampang ngamp keꞌ nil anman weenāmpa. Ngamp kaangk wunāmp ngamparakama, aꞌ ngamp wik ngeey-ngeeyāmp nunang Christ.an, aꞌ ngamp work min iiy-iiyāmp nungant aꞌ anpalaniy-a, ngampaniy-a, maꞌ-aath-aathwump.
Woyan Niiy Kaꞌathaman Wakan-a, Wantāna, Niiy Pam Wanch Nyiingkanam Ngul Iiyāna
17 Ngay wik thayanam thawang niiyanta — in wik ngatharam yaꞌa, in wik Christ.antam. Ngeeyān a! Niiy keꞌ iiyān keꞌ pam wanch wiy anangan than keꞌaman thiichin nunang God.ana, than puth way anman ngaantam-ngeey-ngeeyantana. 18 Kuchek thanttamana keꞌ ngaaꞌ wunan yimanangan than puth keꞌam thiichin nunang God.an. Thana waankam iiy-iiyantan nungantama, puth than way anman ngangkangan piꞌ-piꞌantan, kaangk keꞌ ngaantam-ngeeyayn nunang, kuchek thayan weenin nungant God.antana. 19 Than keꞌ weekwuntan woyan way anpalan yaꞌa. Than keꞌ-ngoongkam way anman iiy-iiyantana. Than wayan iiy-iiyantan-a, than ngul-nyaaꞌ keꞌam weentan, yaꞌa. Than way anman yump-yumpantan, than kaangk way thon-thonan yumpayn, way anangan kaangk keꞌ wantayna.
20 Puth ngananiya keꞌam meenathan niiyant wayana, ngan woyan minan meenathan Christ.antamana. 21 Ngan keenk wik min Jesus.antam kan-kanam waaꞌ-waaꞌan niiyanta, Christians al-alantan, aꞌ niiy kanam ngeeyan aꞌ min anman ngaantam-ngeeyan. 22 Aꞌ inan tham ngeeyāna: woyan niiy kaꞌathaman wakan-a, an waya, niiy way-wayathwun niiyantakama, niiy puth keꞌ-ngoongkam wayim ngaantam-ngeey-ngeeyan. Niiy paththam kan-kanam wayan wantāna. 23 Niiy maꞌ God.antang iiy-iiyān nil yipam weentathow niiyang niiy yipam min anman ngaantam-ngeey-ngeeyāna. 24 Niiy woyan min anman wak-wakān, koochanam iiy-iiyān maꞌ God.antanga nil yipam min yumpow niiyang keꞌ nil anman iiy-iiyana.
25 Yaa, niiy Christians nanangan keꞌ wik uuyamāna. Niiy wik kan-kanam anman thawān, Christians wiy al-alantan puth niiy yotam nanangana keꞌ thonam yimanangan iiyaniy karpam nungantang Christ.antangana. 26-27 Man kul nath wampiy niiyant wiyantan-a, way keꞌ yumpāna, aꞌ kinch ongkana man kulana keꞌ piꞌāna. Kinch keꞌan yippak ukow-a, kulan wantāna, ngangk minangam iiy-iiyān thanta, yipam oony way alangan keꞌ thaachow niiyang wayan yumpān. 28 Niiy puth Christians keꞌaman yippak iiyan-a, niiy nathwey maꞌ-kuchathana way min wukal thakan pam wanch wiyantama. Niiy keꞌ-ngul maꞌ-kuchathāna, niiy kan wantāna. Niiy work min anman iiy-iiyān, aꞌ min-min piꞌwuna, niiy yipam wukal-a, may thakan theeꞌān thant than wukal keꞌanangan wuntan. 29 Niiy wik thaaꞌ poch-pochan keꞌ thaw-thawān thant wiyantan, yaꞌa. Niiy min iiy-iiyān thant. Thaaꞌ mich-micham thaw-thawān thant, niiy yipam maꞌ-aath-aathān thanang ngangk thayanam iiy-iiyaynweya. 30 Niiy ngangkangan Ngeen-Wiy Min God.antaman keꞌ wayathān puth nil God.angan kuch ngampar, ngamp meeꞌmiy yipam iiy-iiyāmp ngamp pam wanch nungantam inangana. Nil Christ palaman wampow-a, nil Ngeen-Wiy Min God.antam alangan ngul meenathow ngampar yotamant ngamp pam wanch weeꞌ-weeꞌanangan nungantama, aꞌ nil God.angana ngampang minam ngul piꞌ-piꞌow pam wanch nungantam anangan. An kan-kanam paththama. 31 Yaa, niiyaniy-a, keꞌ thaaꞌ poch-pocham thaw-thawān aꞌ keꞌ man kul wampow niiyant, keꞌ ngangk kul piꞌ-piꞌān niiyantakamana, keꞌ akān thanang wiy anangana, aꞌ puth wayan keꞌ yumpān thanta. 32 Nil Christ.an utham niiyant nil God.angan yipam keꞌ-ngul ngaantam-ngeeyow way niiyantamana. Yaa, niiyaniya, yimanangan ngangk minangam iiy-iiyān thant wiy al-alantan, ngangk mam-mamān thananga. Way thanan yump-yumpin niiyant-a, niiy keꞌ ngaantam-ngeeyān, kon-ngathow niiyang ngula.