1-2 Anpalaniya, nil Jesus.angan aak anan want ngul. Aꞌ nil koyam ngul iiy, woꞌuwaynak, chukkunangan moꞌa, Lake Galilee.angan. Kookam ananiy-a, piꞌan weꞌar thamp. Kookam alantaniy-a, namp kuchama, wiyangiy-a, Tiberias waaꞌin. Than pam wanch thaaꞌ-wantanamang monkan-wakin nunang, Jesus.an, than puth kan thathin nunanganiy work piꞌanan yump-yump, pam wanch wiy anangan miyalath thanangana. 3-4 Aak may piꞌan mungkanakan thanttam Jews.antaman kan-kanang wamp-wampa, Passover.an waaꞌantan.

Anpalan-a, nil Jesus-a, ngurp nungantam anangan yoykang matin, aꞌ than angman karpam nyiin-nyiinin. 5 Nil Jesus.angan meeꞌ pal-puy thath, aꞌ pam wanch yot thaaꞌ-wantanaman thath thanang wamp-wampin nungant. Aꞌ nil Philip.ant engk, “Ayyang! Ngamp may wanttinpal piiyāmp a? ngamp yipam may aathāmp thanang, pam wanch yot inangan a?” 6 Nil Jesus.an wik inangan thaw Philip.antan, nil yaan paath nunang, nil yipam ngeeyow Philip.an wanttakan thawow, nil puth Jesus.an ep meeꞌmiy nungantakam nil wanttakan yumpowa. 7 Nil Philip.an thaw Jesus.ant, “Ayyang, nungkway ngamp wukal piꞌan theeꞌimp may aakanakan thant-a, keꞌ two hundred dollars yimanangan-a, an yaꞌangam, than may many anman mungkiythan a!” 8-9 Aꞌ nil ngurp Jesus.antam thonanganana Andrew-a, kuunch Simon Peter.antaman, nil thawant Jesus.ant, “Ayyang, nil puk wuut inan than-than, may buns manyiy five piꞌ-piꞌan aꞌ puth minh ngaꞌ kucham thamp. Puth an yaꞌ, may many thant, an yotantakam puth yaꞌa. Puth wanttak mayan yaarkathimp thant a? maꞌmangkam al-alantan a?” 10 Puth nil Jesus.an thaw thant, ngurp nungantam al-alantan, “Niiy thawān thant aakang nyiinayn.” Aak anana wakathiya. Aꞌ than pam wanch yot anangan aakang nyiinin ngul, an puth pam wanch thaaꞌ-wantanam, five thousand anangan. 11 Nil Jesus.angan-a, mayaniy-a, maꞌang maay, aꞌ meeꞌ-wuthanam God.ant, thankyou thaw nungant may-a, minh aakanakan, aꞌ mayan kan-ngul theeꞌ-theeꞌ thant, pam wanch al-alantan aakangan nyiin-nyiinin. Aꞌ nil minh ngaꞌan thamp theeꞌ-theeꞌ thant, an than kan-kanam may-a, minhan mungk-mungkin ngul. 12 Than yot anangan thip oth kanan weemin-a, nil Jesus.an thaw thant, ngurp nungantam al-alantan, “May nhanth anangan yalmathān a! Keꞌ wantāmp aakanganiya!” 13 Aꞌ than ngurp nungantam al-alangan-a, may nhanth anangan yal-yalmathin, aꞌ yuk basketang wunp-wunpina. May buns nhanth al-alangan baskets twelve thaaꞌ mul maay, than pam wanchangan wantin, keꞌaman mungkin.

14 Than pam wanch al-alangan thathin-a, work wuut piꞌanan nil Jesus.angan yump-a, than thawin thanttakam, “Eeꞌa, in kan-kanama, nil pam piꞌan God.antam, nil pam prophet anana thanan waaꞌin nunang nil palan wampow aak iikanakan.” 15 Nil Jesus.angan kanam thiich thanang thanan keꞌ angman mamiythan nunang, thaachiythan nunang kingan iiyiy thant. Keꞌ-paal nil-nilam ngulan iiy aak yoykakan.

16-17 Aak ngaaꞌ kan-ngulan weem-a, ngurp nungantam anangan pek ukin, kookamak, chukkun thanttamang ngul peyin, aꞌ woꞌuwayn ngul ench-enchin, aak Capernaum aakanakan. Ngaaꞌ kanam ngulan chint-a, puth nil Jesus.an keꞌam yippak wamp thant, 18-19 aꞌ wunt piꞌan ngul wunp-wunp, an puth ngak yeelalan ek-ek. Than ngurp nungantam anangan yaam ench-enchin chukkun thanttamangan, aꞌ than Jesus.an thathin nunang, ngak kenyangkan iiy-iiy um thant, chukkun thanttam aakanakan. Than thathin nunangan-a, than ngangk ikin, aꞌ winynyang moꞌin nungantam. 20 Puth nil Jesus.an thaw thant, “Niiy keꞌ winynyang moꞌān a! In ngayam wampang niiyant a!” 21 Than wikan ngeeyin nunang-a, than keꞌ-ngul winynyang moꞌin, puth ngangk minang thawin nungant nil chukkunangan thaaꞌ peyow. Nil puth Jesus.an-a, chukkunang peya, aꞌ kan-ngul nyiin. Aꞌ yaam keꞌanam-a, than aakan erkam uwin, aak Capernaum.an.

22 Than pam wanch yotam anangan keꞌ iiyin woꞌuwaynakan, than aak angman paanthin, nil Jesus.an thankyou thaw God.ant may aakanakan, aꞌ puth mayan mungkin. Than pam wanch al-alangan kan ngaantam-ngeeyin than ngurp nungantam anangan kanan iiyin chukkun thanttamangan, puth nil Jesus.an keꞌam iiy thanttang.

Ngaaꞌ thonaniy-a, than pam wanch al-alangan chukkun thonam thonakam thathin thompanganiy. 23 Anpalan-a, than chukkun wiy anangan aak Tiberias amanaman wampin aak thomp thanttang thinthan. 24 Than puth Jesus-a, ngurp nungantam weeꞌanang keꞌam thathin thanang, than pam wanch anangan puth chukkun al-alangan peyin, aꞌ Capernaum.ak iiyin, Jesus.ant wenk-wenkin.

25 Anpalan-a, than uwin nunang ngul, wonk woꞌuwayna, aꞌ than thawin nungant, “Ayyang, Teacher-ang! Nint aak iikanakan aak ngeen wampana?” 26 Nil Jesus.an thaw thant, “Ngay wik inan kan-kanam thaw-thawang niiyant: niiy ngathar wenkaniy, puth niiy may breadan mungkan thip oth ngulan iiyana, nanpalan. Niiy keꞌam ngaantam-ngeeyaniy ngayang puth nil God.angan thayanan yump ngayang work piꞌan anan yumpānga! 27 Niiy mayakan work thonakam keꞌ iiy-iiyāna, may ngampan mungkanamp puth erkam kathaman, yaaman keꞌ min wunow, yaꞌa. Niiy puth work ep iiyāna, mayan yipam uwān ngangk niiyantamakan. May anan-a, ngay ngul theeꞌāng niiyant, ngay puth pam anman nil God.angan kuch, may ananiy theeꞌāng niiyant niiy yipam ngangk aak umpuyangaman wunāna God.antangan. Ngay may bread anan ep theeꞌing niiyant puth nil God.angan work inan theeꞌar.”

28 Aꞌ thanan engkin nungant, Jesus.antan, “Ngan puth wanttak yumpān ee? ngan yipam work nungant God.antan iiyān a?” 29 Nil Jesus.an thaw thant, “Nil God.angan kaangk thathow niiyang niiy work inan iiyāna: niiy ngangkang piꞌ-piꞌān nunang, pam anman nil God.angan kuch nunang.” 30 Than thawin nungant, “Nint work piꞌan ngeen yumpāna? ngan yipam thathāna, aꞌ ngaantam-ngeeyān nintangan nint kan-kanama puk nhengk God.antaman. Nint ngeen ngul yumpān ngant a? 31 Wuut mangk nganttam al-alangan keenkanaman-a, may manna anangan mungkin aak pintalang angan keꞌ anman lat ngench thayanangan waaꞌan, ‘Nil may breadan aak inpal kenyan theeꞌ thant mungkanakan.’ ”

32 Nil Jesus.an thaw thant, “Ngay wik inan kan-kanam thawang niiyant: may nil Moses.angan theeꞌ niiyant-a, an may manna anmana: puth nil piip ngatharamangan-a, may bread thonangan theeꞌow niiyanta, inpal kenya, may inaniy-a, nil-nil, may min-minam paththam, may an min niiyant ngangk niiyantamakana. 33 Nil God.angan puth pam inpal keny kuch nunang, pam inman keꞌ may bread min-minam paththam niiyanta; ngamp yipam ngangk minangam wunāmp ngulakama, God.antanga.” 34 Thanan thawin nungant, “Ayyang, moom-ang, may bread anan-a, ngaaꞌ thon-thonangan theeꞌ-theeꞌān ngant a!”

35 Nil Jesus.an thaw thant, “Pam ngay inmana keꞌ may bread min anmana, ngay nyiingkan waaꞌ-waaꞌang niiyant: ngayana keꞌ may bread niiyantan, ngangk aak umpuyangam wun-wunanakana, piip God.antangan. Nil weeꞌan wampow ngathar-a, ngangkangan piꞌ-piꞌow ngayang murkanim aak umpuyangaman-a, an nil ngangk min ngulakam iiy-iiyowa, ngangkam nyiinow ngul. 36 Ngay kaꞌathangaman kan puth waaꞌangan niiyant, wik inangan: nungkway niiy ngayangan kanam thathan-a, niiy puth wik ngatharaman keꞌ ngeey-ngeeyaniya, yaꞌ paththama. 37 Nil piip ngatharamangan weeꞌ-weeꞌanangan maꞌ ngatharangan want thanang-a, than ngul wampayn ngathar. Nil weeꞌan wampow ngathar-a, ngay keꞌ kenthāng nunang, yaꞌa. 38 Ngay puth inpal keny ukang aak iikanakana, yipam work iiyāng keꞌ nilaman piip ngatharamangan waaꞌar, nilan naakanakan kuchanya, ngay puth ngatharakaman keꞌ ngaantam-ngeeyānga, yaꞌa, ngay puth kaangk piip ngatharaman ngangk min yumpāng nunanga. 39 Nil thawar ngay minam piꞌāng thanang, keꞌ maꞌaman wayathāng thanang pam wanch nilan maꞌ ngatharangan want thanang, puth ngul-ngulaniy-a, aakan minchowan-a, ngay mulaman ngul ekathāng thanang. 40 Puth nil piip ngatharamangan kaangk yimanangan thathow: than weeꞌ-weeꞌanangan nhengk God.antaman thathantan nunangan-a, putha ngangkangan piꞌ-piꞌantan nunangan-a, an than ngulakam wunayn nungantang, God.antangan; aꞌ ngulaniy-a, ngayaniya, mulaman ngul ekathāng thanang aak inan kan-ngulan minchow.”

41 Anpalaniy-a, than Jews ananganiy-a, wik manya thuuchin nunangan waaꞌ-waaꞌin, puth nilan wik yimanangan thaw, “Ngay keꞌ may bread yimanangan inpal kenyan ukang niiyant.” 42 Than yotan puth thawin, “Nil pam inan Jesus a! puk nhengk Joseph.antama! Ngamp yotam puth meeꞌmiy kaath piip nungantam anangan pula! Nil puth wanttak thawan ee! nil inpal kenyan uk a!”

43 Nil Jesus.an thaw thant, “Niiy ngul ngeenak wik many thuuchaniy niiyantakamana? 44 Nil piip ngatharamangan keꞌwey thaaꞌ-palathiy thanang pam wanch anangan-a, an than keꞌ wampiythan ngathar, yaꞌa. Than weeꞌ-weeꞌanangan wampiythan ngathar-a, an ep, ngay mulaman ngul ekathāng thanang, aak inan kanan minchowa. 45 Pam prophetsangan lat ngench thayanangan wik inangan keenkanaman umpina, ‘God.angan ngul thaaꞌ-aathow thanang pam wanch maꞌmangkaman.’ Than weeꞌ-weeꞌanangan wik ngeeyantan nunang piip God.an-a, aꞌ wik nungantam kuchekangan piꞌ-piꞌantan-a, anangan ep wampantan ngathar. 46 Ngay keꞌ thawang niiyant keꞌ niiy God.an thathan nunang, yimanangan yaꞌa, niiy puth piip God.an keꞌ thathanam nunang yaꞌa. Nil pam thonam alangan ep thath nunang God.an, nil puth God.angan kuch nunang, aak inpal kenyan ukow niiyanta, aak iikanakan.

47 “Yaa, ngay in wik kan-kanam paththam waaꞌāng niiyant: than weeꞌ-weeꞌanangan ngangkangan piꞌ-piꞌantan ngayang-a, than aak umpuyangam wunayn God.antangan. 48 Ngay keꞌ may bread yimanangan niiyant, niiy yipam piip God.antangan ngulakam wunān. 49 Wuut mangk niiyantam al-alangan-a, keenkanaman may manna.an mungk-mungkin, aak pintalangan. May manna alangan man-yetham piꞌ-piꞌ thanang, puth ngulakaman yaꞌa, puth than uth-uthamin ngula. 50 Ngay puth may bread thonanganan ep waaꞌ-waaꞌang niiyanta, may bread inpal kenyan uka, an nil-nil. May breadanwey mungkiythan-a, an than keꞌ uthamiythan, yaꞌa. 51 Ngay keꞌ may bread min yimanangan, inpal kenyan ukang niiyant, may min anman wun-wuna, keꞌ may nyiingkanam anman wun. Than weeꞌ-weeꞌanangan may inan mungkayn-a, murkanim anman man-yetham iiy-iiyayn. May bread inan-a, keꞌ kemp ngatharam ngay ngulan theeꞌāng niiyant; niiyantakam thonakam yaꞌa, puth pam wanch al-alantan thamp ngulan wunayn, than weeꞌ-weeꞌanangan ngangkang piꞌ-piꞌayn ngayang.”

52 Anpalan-a, than Jews anangan-a, man kul wampin nungant than thaaꞌ ngul thay-thayanamin wik nungantaman ngeeyin Jesus.an thaw. Than thawin thanttakaman, “In puth want-wanttak e? nil kemp nungantaman theeꞌiy ngampar mungkanakan ey?” 53 Nil Jesus.an thaw thant, “Ngay kan-kanam thawang niiyant: niiy keꞌan kemp nungantaman mungkinwey-a, pam alantaman God.angan kuch nunang-a, aꞌ niiy chaapar nungantam thamp keꞌan mungkinwey-a, an nil piip God.an ngangk niiyantamangan keꞌ wuniya, yaꞌa. 54 Than weeꞌ-weeꞌanangan kemp ngatharaman mungkayn-a, aꞌ putha chaapar ngatharaman mungkayn-a, an than epa aak umpuyam wunayn nungantang, God.antangan, aꞌ ngul-ngulan-a, aak inan kan-ngulan minchow-a, ngay ngul ekathāng thanang, koyaman mulaman man-yetham ngul iiy-iiyayn. 55 In puth kan-kanama, kemp ngatharamaniy-a, keꞌ may bread yimanangan niiyant; puth chaapar ngatharamaniy-a, keꞌ ngak min yimanangan niiyant. 56 Than weeꞌ-weeꞌanangan kemp ngatharamana puth chaapar ngatharaman mungkayn-a, than anangan ngatharangan wunayn, puth ngayiy-a, thanttang wunāng. 57 Nil piip ngatharaman-a, man-yetham anman murkanim wun-wunan, nilan kuch ngayanga. Ngayiy puth-a, yim-yimanaman murkanim man-yetham anman wun-wunang nungantang, ngay puth pam inaniya nhengk nungantam, God.antam. Puth than weeꞌ-weeꞌanangan kemp aꞌ chaapar ngatharaman mungkayn-a, an ngay ngulakam man-yetham ngul piꞌ-piꞌāng thanang. 58 Ngay nyiingkan waaꞌang niiyant-a, may bread inaniy-a, inpal kenyan uk. An may bread nil-nila, keꞌ may manna yimanangan yaꞌa, than wuut mangk al-alangan keenkan mungk-mungkin. An puth ngangk aak umpuyangam keꞌam piꞌ-piꞌ thanang, yaꞌa, puth ngul-ngulan-a, uth-uthamin ngul. Than weeꞌ-weeꞌanangan may bread minan mungkayn ngatharaman-a, an than ep man-yetham aak umpuyangam wunayn.” 59 Nil Jesus.angan wik inangan thaaꞌ-aath-aath thanangan-a, aakiy-a, ang churchang, aak angana, Capernaum.ang.

60 Than ngurp nungantam yot al-alangan wik anangan ngeeyin-a, thanan-a, thawin thanttakaman, “Wik inangan thayan paththam ngampar, an ngamp keꞌ thiichimp wik anangan nil ngeenan waaꞌ-waaꞌan ngampara. Ngamp ngul ngeenak ngeeyāmp nunang a?” 61 Nil puth Jesus.angan kanam thiich thanang ngurp nungantam anangan, than wik manyan thuuch-thuuchina, wik nungantam anpalana nilan thaw. Aꞌ nil puth thaw thant, “Wik inangan ngayan thawangan niiyant-a, niiy nanpalan ey? kaangk keꞌ-ngul monkan-wakān ngayang ey? 62 Niiywey nath thathin nunang-a, pam anman nil God.angan kuch nunang-a, nilwey koyaman matiywey aak-aakanakaman aak nilan kaꞌathangaman wun-wun-a, niiy an-aniyangan ep ey? ngaantam-ngeeyin nunang min-min ngul ey? 63 Wik inan thamp ngeeyāna: nil pam weeꞌ-nath woyan God.antaman wak-wakiywey-a, nil woyanangan nungantakam wunpiy ey? An yaꞌa! Nil Ngeen-Wiy Min God.antamangan ngangkangan ngoonchow nungantangan-a, an ep nil woyan God.antaman ngul wak-wakow. Ngay wik inangan waaꞌang niiyant nil Ngeen-Wiy Min God.antaman yipam ngangkang ngoonchow niiyantanga, aꞌ niiy yipam God.antangan ngulakam wun-wunān, 64 puth niiy puungk wiyangiy-a, keꞌam yippak ngaantam-ngeeyaniy ngayang a! yaꞌ paththam.” (Nil puth Jesus.angan-a, nathpalman thiich thanang, than weeꞌ-weeꞌanangan keꞌaman monkan-wak-wakantan nunang, aꞌ puth weeꞌangan theetathow nunangan pam way al-alantana.) 65 Aꞌ nil puth Jesus.an thaw thant ngul, “Ngay nanpalan nyiingkaniy thawangan niiyant: pam nil-nilaman puth keꞌ wampiy ngathar. Nil piip ngatharamangan maꞌ-aath-aathiy nunangan wampow ngatharan-a, an nil ep wampow ngathar.”

66 Anpalan-a, than wik inangan Jesus.an kanan ngeeyin nunang-a, than ngurp wiy al-alangan man-mangkam ngul theeꞌin nungant, keꞌ-ngul monkan-wakin nunang, yaꞌ-ngul. 67 Aꞌ nil Jesus.an thaw thant, ngurp nungantamakan, pam twelve al-alantan. “Niiy il-ilangan thamp kaangk ngayang wantān yimanangan ey?” 68 Nil Simon Peter.an thaw nungant, “Ayyang, Lord-ang, ngan puth weeꞌant ngul iiyān a? Nint puth wik min paththam thaaꞌ-aath-aathangan nganang, aak umpuyangam wun-wunanak nungantang God.antangan a! 69 Ngan puth kan-ngul thiichanan, ngaantam-ngeeyanan nintangan, nint pam anmana, pam min-minam inpal kenyan ukan God.antamana, nint way thak keꞌ yumpanam.” 70 Nil Jesus.an thaw thant, “Ngay puth miꞌang niiyang ey! Niiy pam twelve inangan ey! Puth nil-niiyantiy-a, pam thonamaniy-a, oony way alantaman woyan wak-wakan a!” 71 Nil Jesus.anganiy-a, pam Judas anman waaꞌ-waaꞌ nunang, pam nhengk Simon Iscariot.antaman. Ngulaniy-a, pam ilangaman-a, ngurp nungantam Judas.angana, Jesus.ana theetathowan ngul thant pam way al-alantan.